El Mazal I La Anegdota

Por:
- - Visto 439 veces

Diario Judío México-
EL MAZAL ? AFERRALO !
CATCH IT ! TITFOS OTO ! YAKALA ONU ! ATTRAPPE-LE !

BUENOS DIAS
Keridos Amigos i mis Amigitas,
Oy, el 12 de Novembre 2018 a las 6 de la demanyana empesi el diya kon un mail en Hebreo de un amigo…. Soriyi i pensi ke el mazal de kada uno i uno puede briyar en un tiempo o en unos momentos solo de su vida i es a la persona ke kaye de aferrar lo/los por las orejas, los kaveyos, la mano o ….. la kola ! A vezes mos azemos pishman (lo regretamos) dospues ke es demasyado tadre i mos se bolo de las manos el pashariko del mazal, de la felisitad o de la rikeza… No sierve a nada de pensar sin kavos a esto Noooooo ! Ma tomar una lisyon i avrir los ojos i las orejas en ventikuatro para una otra okazyon. En estas muy raras okazyones, lo mas del tiempo, no tenemos la alternativa de pensar doz vezes i kale azer pasos o desidar muy presto. La intuisyon, los sentimentos, la eksperyensya, i por seguro, la intelijensya mos yevaran al mazal o no !
NO EGZISTE PERSONA SIN MAZAL i Di-o avre las puertas bastante vezes para ke pasemos de la solombra a la luz.
La anegdota en hebreyo kontava ke (trokada por Sharope) :
” Aviya una vez un hombre muy triste porke pensava ke no teniya del todo mazal… Un diya desidyo de irse al Di-o i kesharse de esta vida sin sal i sin pimienta, sin un diya horozo i sin una ganansiya ke le permeteriya de salir de la monotoniya de su vida en bivyendo komo un hombre muy prove !


En kamino vido un arvole, seko a los tres kuartos i yorando.. Le demando ke teniya i el arvole le disho ke ay agua al derredor ma no le esta parvinendo i se esta muryendo de sed ! El chelebon ( fellow, tipo, herif ) le konto ke se esta indo al Elohim i Le va avlar i por el.

Mas aya vido una mujer manseva i ermoza, asentada a los eskalones de su chosa (cabane) la kavesa entre sus manos i los ojos pedridos en los leshos. Se aserko de eya i le demando kualo le mankava en la vida. Eya supiro i le disho ke nunka aviya konosido el amor i ke no teniya un hombre para kompartir su vida, dar i aresivir afeksyon, tener kreaturas i gozar de su propria famiya… Muestro amigo penso ke teniya razon la ijika i le disho ke iva avlar i por eya kuando Le iva dizir sus dertes (kozas ke lo preokuvan a el) al Santo Bendicho.

Unas kuantas horas dospues le salio en medio del kamino un leon bastante viejo i medyo siego… Ambierto i kansado. Lo saludo, le demando el hatir (komo se sintiya) i oyo sus keshas kuando le disho ke estava ambiyerto por ser viejo i sin bastante fuersas para apanyar gazelas i ke mijor valiya murir por el ke de travar ansina … El buenacho le ekspliko ke, i el, teniya keshas i se estava indo al Elohim para avlarLe i por seguro Le avlariya i del sinyor
leon.

ELOHIM, lo sintyo i pezo todo lo ke este humano Le konto. A la fin le disho ke teniya letras para kada uno ke renkontro en kamino i ke le estava avriendo su mazal i ke kaliya ke korrera para apanyarlo !

El chelebon Lo reingrasyo mil vezes i se metyo en kamino koryendo para ir a su kaza i aferrar el MAZAL aprometido !

Vido el arvole, le dyo su letra. El arvole le disho ke un sako de diamantes blokava sus raises para yegar a la agua. Le demando su ayudo ma el le disho ke teniya de korrer para aferrar su mazal i no puediya piedrer tiempo !

Vido la mansevika, ermoza de las ermozas. Le dyo su letra. Eya le konta lo ke aviya en la letra. Di-o le estava dizyendo ” Al hombre ke te va salir delantre de los ojos kuando vas a meldar esta letra dize le ke lo keres i ke
se kaze kon ti. Vos va bendizir i serash muy horozos i vash a bivir en la abundensya !” El no teniya tiempo ! Le disho ke teniya de azer presto (apurarse) si keriya aferrar su Mazal ke lo estava asperando !

Vido el sinyor leon i le dyo su letra tambien. Di-o le aviya eskrivido a leon “Si este idiota yega fina ti kometelo kon keif porke ni vale la pena ke biva!”

Ke pasesh un diya muy alegre, yenno de sol i de ermozas sorprezas…..

Vuestra [email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: