Keridos Amigos i mis Amigitas.
El Medyo Oryente, es una rejyon muy kaynte en odyos, en amistades, en diferentes politikas yevados a los ekstremos ande la etnisita, las relijyones i los sentimientos tienen muy muncha
importansya… Es difisil de mantener paz i estabilidad en estas kondisyones, ademas dospues del punta ke infortunadamente se
yego… EL konflikto Arabo-Israeliano ! Un konflikto ke no parese terminar kon una paz duravle entre los payizes arabos i el
uniko chikichikitiko giante ke es Israel !
Siempre anoti ke lo ke no asemeja a la majoritad se odya ! Ansi fue por el holokosto i antes por la inkizisyon, agora kon los israelianos en medyo del mundo arabo ets… El puevlo judyo es diferente de kualker otro puevlo por la manera diferente de bivir… Mete un pashariko chiko en una kasha yenna de pasharos de espesya diferente i observa lo ke se pasa aryento !… En Canada i en los Estados Unidos de America los judyos son tolerados mijor por la unika razon ke en estos payizes la populasyon es miksta, ay gente de todos los lugares i dunke la importansya de la “appartenensya” amingua. Ay munchas
razones por rechesar una minoritad… No kero entrar en este sujeto muy largo agora ma solo sulinyar los faktos. No es koza de inyegar… Somos minoritarios en todos los payizes a la
eksepsyon de Israel, muestra kaza ande mos sintimos libres ! Oy, dospues de eksperiyensar tantas dezgrasyas, puedemos dizir klaramente ke todos los attakes kontra el puevlo judyo son por kavza de su diferensya kon los otros, siendo una minoritad ! EN Turkiya, dospues del Emperyo Ottomano, la toleransya era muncho mas grande ( i en tiempo del Emperyo mas ke en tiempo de la Republika) porke era una kestyon establisida al empesijo ! El SULTAN, dunke el duenyo del payis, el ke teniya poder absoluto sovre todo en el Emperyo, dyo la permision, kijo (!) ke este puevle venga i se installe en sus tierras… Porke keriya pueblasyon, porke saviya ke es un puevlo laborioso i muy intelijente, porke aviya munchos savyos, porke era un puevlo pasifisto ke no kreariya problemes en el emperyo porke ivan adelantar el payis ets….I muy probablamente porke la mujer o la madre o la nona o la mujer ke engrandesyo el Sultan era judiya ! Ya savemos ke la madre del mas grande Sultan del Emperyo
Ottomano KANUNI SULTAN SULEYMAN, Soleiman el
Manyifiko, era Helga, una judiya de Polonia, nombrada Hafsa Sultan, la mujer del grande YAVUZ SULTAN SELIM. Era una mujer de las mas rafinadas, savya i enstruida de su tiempo !
Savemos ke Nurbanu Sultan, la madre del Sultan Murat III i mujer del ijo de Soleiman i Hurrem Sutan (Roxelane), Sultan SELIM II era tambien judiya i muy poderoza en el Emporyo !
El pishkado empesa a fieder/hedor de su kavesa ! El governo no estava kontra los judyos dunke ni el puevlo lo estava ! El governo dava altos puestos a los judyos i los respektava dunke el
puevlo tambien los respektava ! Mientres ke en los payizes de Europa i arabos los judyos arivaron sin ke seyan dezeados, sin un pakto ke justifikava sus prezensyas, se multiplikaron i
yegaron a rikezas i respektabilitad afilu mas de los duenyos del payiz de una etnika totalmente diferente, i siendo minoritaryos ! No los puederon tolerar ! Lo mas los egzilyaron i si no se puediyan liberar de eyos los mataron ! NO LOS KIJYERON I NO LOS KEREN ! Dunke la sola solusyon >>> ISRAEL !
Derechos humanos, justisya, demokrasiya, modernizasyon, globalizasyon … Todos estos biervos no valen NADA delantre de los instinktos naturales ke rechesa lo ke no es suyo ! No egziste paryente ke no va kerer ke su ijo/ija se kaze kon
uno de los suyos. Va akseptar otro/otra ? S..si … Ma mijor no ! Fanatikos diran NOOOOOO ! Judyos disheron NO ! Es agora ke empeso la asimilasyon i ke ay munchos kazamyentos mikstos
(ke no se mirados de un buen ojo ..)
Todo el tiempo ke los judyos kontinuaran a vistirsen, a avlar, a komer, a bivir, a dizir ke son el puevlo amado de Di-o, de apartarsen kon los de mas, de no mesklarsen de manera igual kon los de mas en los payizes ande son minoritaryos, avran dezgrasyas… No solo kon los arabos ke se deklararon enemigos de los judyos de mil fason ma kon todo el resto de los puevlos… Los ke keren bivir komo judyos asigun los komandamientos de sus Rabbis devran ir a Israel.. No tiendran otro remedyo ! Porke el odyo es un sentimento natural ke no se puede kontrolar kon la razon, ni la edukasyon ni kon nada ! I kale ke el puevlo judyo
entyenda ke no son keridos “de esta manera” en dingun lugar ! Es difisil ? Si ! Ma es la sola solusyon… Ser komo todos o ir a Israel i saver maniar armas i ser fuerte para sobrebivir en una
demografiya hostil ma libres i kon la frente alta ! Porke muestro payis lo defenderemos kon las unyas si kale ! Porke en ISrael somos mozotros los duenyos i biviremos komo lo keremos, kon la etika, sin la etika, kon muestros pekadores i kon muestros santos i Tsahal i la bandiera dezeada por un tiempo ke mos vino
komo la eternitad !
Muestro himno nasyonal es la TIKVA = la ESPERANSA !
Kon esperansa i amistad siempre
Sharope blanco
Artículos Relacionados: