El mundo animal akompanya i integra el mundo de los ombres, i no pudia ser ke en el reflan no uviera una emportante interaksion entre los dos mundos. Munchas vezes vemos los animales en el mundo real, en sus vida al lado del ombre i para el ombre, i otras vezes los vemos komo metafora, debasho de la kuala se eskonde el ombre mizmo. I esto afita en todas las kulturas.
Para poder avlar de este sujeto en manera satisfaziente, devemos divizarlo en dos partes: en la primera trataremos de los mamiferos, i en la sigunda de las aves, los reptiles, los pishkados i los insektos.
Kual es el animal ke topamos mas frekuentemente en el reflan djudeo-espanyol? El azno, naturalmente, ke fin a poko tiempo antes, kuando deynda no avian las makinas, servia al ombre en el verdadero senso de la palavra. Ma no por esto vinia apresiado en su djusta valor, porke komia haftona, le davan poko a komer i lo tinian en muy basha konsiderasion. Komo de fakto se dize Ken azno nase azno muere o Ken lava la kavesa al azno, piedre la lishía i el shavon, ke kere dizir ke el azno no puede trokar en dinguna manera su natura, i ansi el ombre ke le viene komparado.
De otra parte se dize Azno kayado por savio kontado, i kuando se trata de de un personaje ke pensa ser muy emportante se dize El azno de rey pisho en mi puerta. Ke onor!
Ay tambien el refran El azno trae la paja i el se la kome, i esto no es poko, komo ayudo al ombre, ke no se komporta bien kon el. Otro refran ke dize Aspera azno a la yerva mueva es uzado para uno ke esta asperando una koza ke no tiene munchas shanses de realizarse en serka tiempo, komo la yerva mueva ke viene mezes despues ke la vieja ya se seko. Ma en fin de kuento el azno es fuerte i puede suportar muncho, komo dize el reflan Azno no muere de tikiya
Despues del azno enkontramos al gameo, animal muy util al ombre, sovre todo en el pasado. Ma esto no le dio un lugar de onor en muestro folklor, porke todos los reflanes ke lo veen komo protagonista no lo alavan ni lo rengrasian. Se dize El gameo no vee su korkova, vee la de su vizino. Un yerro de takto o de protokolo se yama ande mozotros una gameeda. I una persona poko edukada o poko entelijente o no enstruida se yama gameo. I kuando una persona tiene kavesa muy dura, se dize ke tiene kin de gameo.
Del kavayo dizimos Mijor un azno ke me yeve, i no un kavayo ke me eche, porke ya savemos ke no mos podemos fiyar de el. De otra parte, si resivimos un regalo, devemos akodrarmos ke A kavayo regalado no mires los dientes, ke son el sinyo mas klaro de la kondision i la edad del kavayo mizmo.
Otros animales domestikos ke aparesen en muestro reflan son el gato, el perro, el kodrero, la oveja i el raton. Mientres ke las bestias salvajes son el leon, el elefantei el lovo.
Se dize ke El gato no kome el raton por los buenos ojos de su patron, ma naturalmente por su entereso personal. Mientres ke Kuando el gato no esta los ratones baylan, i esto mos aze ver kuanto los ratones se espantan del gato, ke aki aparese muy potente. De otra parte lo vemos chiko i flako en otras dichas komo en la famoza gerra entre el i el perro, ke mo lo aze ver fuyendo: De perro a gato. I kuando keremos dizir ke mos estan trokando las kartas enriva la meza (en manera metaforika, naturalmente), dizimos ke la koza fue trokada de pato a gato. A una kriatura kaprichoza en el komer, la madre le demanda si kere komer un gatiko asado, mientres ke una kumida dezgustoza se yama ande mozotros gumito de gato.Ya savemos ke el gato tiene memoria muy kurta, ansi ke a una persona ke tiene la tendensia a ulvidar todo, se dize ke tiene tino de gato. Ma ya savemos tambien ke el reflan dize i el kontrario: Gato eskaldado fuye de la agua friya. I mizmo si tenemos un gato blanko, devemos de saver ke De noche todos los gatos son pretos.
El perro, ke es el mijor amigo del ombre, tiene su lugar en muestro reflan, ma no podemos dizir ke su lugar en el reflan sea muy pozitivo. Komo de fakto se dize Boz de perro no suve al sielo. Kuando se kere demonstrar la kalidad negativa del dinero se dize Kon la para bayla el perro, ande el perro simboliza un ombre o una situasion muy basha. El perro del guertelano ni durme, ni desha durmir, muy probablemente porke esta siempre atento a la vinida de los ladrones ke keren rovar la fruta o la vedrura del kampo. De otra parte Dingun perro no fuye de la boda, ke kere dizir ke ay personas ke deven siempre toparsen en lugares ande ay tavatur. Kuando uno tiene un korajenegativo, se dize ke tiene animo de perro. I kuando un kuple no se averguensa de azer amor por las kayes, se dize ke Se estan travando komo los perros.
Mos keda un sola konsolasion, ke puede ser tomada i ironikamente: Perro kon perro no se modren.
Del raton ya empesimos avlar mas arriva, ma devemos adjustar dos otros reflanes: El doktor i el raton bozean el heshbon, kada uno a su manera, naturalmente. Otro reflan muy edukativo, ma en muestros dias diskutible, mos dize ke es Mijor ser kola de leon i no kavesa de raton.
Si avlamos del kodrero, el reflan ke lo konserna mos dize: Ken se kome un kodrero entero, ya se puede komer i la kola, ke exorta a eskapar una ovra empesada al ke no tiene la fuersa o la gana de terminarla. De otra parte se dize Kada kodrero kon su pie s`enkolge, ke da a kada uno la responsabilidad de sus aksiones, diziendole: “No enkulpes los otros de la boveda de tus aksiones, i date de ti para ti el kastigo ke te mereses.”
No podemos avlar de la oveja sin atarla al lovo, dos animales ke estan de las dos partes de la barikada, ma ke vienen adjuntados en el reflan ke dize El lovo i la oveja, todo la mizma konseja. Ma la koza peor ke podemos azer es Enkomendar la oveja al lovo porke la kondenamos a ser komida.
El lovo es muy fuerte i temible, porke tiene piskueso godro, porke se aze el echo solo.
Mas temible es el leon. Komo de fakto se dize El leon esta durmiendo, no lo despertes, ma mas temible de el es el benadam, porke se dize Boka de leon ke te koma, i no ojo de benadam. En todo modo es Mijor ser kola de leon ke no kavesa de raton, komo ya dishimos. I kuando uno es muy korajozo, se dize ke tiene koraje de leon, ma ya afito ke uno Vino komo un leon, se fue komo un makarron.
Terminaremos kon el elefante, ke es una de las bestias mas grandes ke konosemos. Ma si keremos azerlo kazar kon una… urmiga? Dizimos semplemente, para todos los ke meten obstakolos en las kozas ke deven ser echas, Kon pasensia i kon fatiga se kaza el elefante kon la urmiga. Este reflan umoristiko kere dizir ke mizmo las kozas mas difisiles se pueden kumplir kon muncha
Artículos Relacionados: