Erase una vez una sivdad ande abashó un mabul de espantar. El papaz kedó emprezo en la klisya ke s’estava inchendo de agua a poko a poko. Ya teniya el papaz las pachás enteras en la agua. Pishín vinyeron los tulumbadjís ande él para ayudarle i le rogaron al dezmazalado de papaz ke salyera kon eyos afuera.
Ma el papaz no kijo salirse del santo luguar i arespondyóles : « Si kere el Dyo, me vo a salvar » (ou « kon la ayuda del Dyo, ya me vo a salvar »). I estuvo rogando al Dyo, a la Panayá i a los santos a ke lo kitaran de estrechura.
Duspués de kinze puntos la agua le asuviya fin a los ombros i tornaron los tulumbadjís a dizirle al papaz ke salyera de la klisya kon eyos porké se iva a undirse i aogarse. Ma el papaz refuzó de muevo dizyendo « Si kere el Dyo, me vo a salvar » Pasaron kinze puntos, la agua le yegó fin a la boka.
Esta vez vinyeron kon barko los tulumbadjís, arrogándole ke salyera de vista de la klisya i vinyera kon eyos. El papaz ya no podiya mas avlar por la agua ke le intchiya la boka, kon la kavesa amostró ke no keriya salir de ninguna manera.
Kuando otra vez tornaron los tulumbadjís, ya toparon ke el papaz se aviya aogado por entero.
Myentres ke los tulumbadjís kitavan el puerpo del papaz de la klisya, su alma vino al pye de su Kriyador. El papaz le avló al Dyo kon birra dizyendo : « Sinyor Dyo, me enganyates a mí ! Duspués de rogarte vida entera desde la demanyana matrana fin a la noche, por una vez ke tuve menester de tu ayuda, me la arefuzates ! ».
El Dyo se ensanyó i le arespondyó kon ravya : « Me izites rizil ! Tres vezes te mandí los tulumbadjís i tres vezes les aboltates la kara metyendo inat » i lo arondjó de vista a Geinam.
Kontado por R. AZAR
Redaktado por MATLDA KOEN-SARANO
Artículos Relacionados: