En varias publikasiones istorikas ya se toko a la buena nombradia ke tenian los medikos sefaradis en los siglos 17-19 i a la mizura en la kuala dieron kudios medikales a las personalidades mas ilustres de sus tiempo. Uvo, en efekto, medikos sefaradis en los palasios de los reyes de Fransia, Ingletierra, Rusia, Danimarka, Suedia i Polonia; de prinsipes i otras altas personalidades en el Vatikano, Almanya, Raguza, Goa i Mozambique, ansi komo de los sultanes del Imperio Otomano, de los maharadjas en India i mas.
Un enshemplo mas de esto mos es dado en un estudio de Zo’har Amar, publikado por Yad Ben Zvi i onde es apuntado ke el ke trusho la medesina moderna a Yerushalayim fue un mediko sefaradi, el Dr. David de Silva, konosido tambien komo el Rada”s (a baza de las insialas de su nombre Ribi David de Silva).
No se save exaktamente kuando nasio i es solo tomando en kuento varios akontesimientos de su famiya ke podemos estimar ke esto fue al deredor del anyo 1684. El era el ijo del rabino Hezekia de Silva ke nasio en Livorno, Italia, en 1656, de una famiya djudia de Portugal, i ke es muy konosido entre los ke se dedikan al estudio de los komentarios de la Tora i de la relijion djudia. Su livro sovre el Shulhan Aruh, “Pri Hadash” (Fruta mueva), fue estudiado en munchas komunidades djudias.
A la edad de 20 anyos (en 1676) ribi Hezekia vino a bivir en Yerushalayim. Dos anyos mas tadre, en 1678, se kazo kon Hana, ija de ribi Rafael Mordehay Malki, de una famiya sefaradi de Yerushalayim, ke era tambien kurandero (mediko popular).
En akeyos tiempos la medesina en Yerushalayim estava en manos de kuranderas i kuranderos, algunos de entre los kualos avian estudiado en las “medreses” serka de las meshkitas, i otros se avian embezado este ufisio por tradision, de otros kuranderos. Avia tambien una farmasia ke apartenia a un monasterio fransiskano.
Ribi Hezekia murio muy mansevo, a la edad de 39 anyos, i David ke era su ijo uniko, fue edukado por su papu. Kuando se engrandesio, el desidio de publikar los livros de su padre i de viajar afuera del paiz afin de resivir ayudo de miembros de su famiya ke bivian en Livorno, Amsterdam i Londra ansi ke de las komunidades sefaradis en estas sivdades.
En uno de estos viajes el enkontro al mediko Moshe Orobio, el ijo del gran filozofo, eskritor i mediko Yitshak Orobio de Castro, ke lo invito a estudiar medesina en la Universidad de Leyden, en Holanda. Despues el kontinuo i izo mas estudios en Italia, Ingletierra, Turkia i Holanda, kurando tambien hazinos ke sufrian de malatias diversas en estos paizes.
De retorno a Yerushalayim el se dediko yenamente a la medesina, tratando sin distinksion hazinos djudios, arabos i kristianos ke sufrian entre otras de malaria, tikia, pesta, lepra, melankolia i otras hazinuras mas, introdusiendo ansina la medesina moderna a la Tierra Santa.
Aprovechando la eksperiensia medikala de su papu, Malki, ansi ke su propia saviduria moderna, el estudio las plantas de la Tierra Santa i sus posibilidades kurativas, publikando los rezultados en dos estudios farmaseutikos ke son klasikos en la medesina: “Pri Hadas” i “Pri Megadim”
David de Silva, el Rada”s, murio en Yerushalayim en 1740, siendo akompanyado a su ultima morada, en el bedahem del Monte de los Olivos, por una muchidumbre de djente. El es un enshemplo mas de la grandeza djudia en las sensias en jeneral, i en la medesina de manera mas partikulara.
Artículos Relacionados: