Aun ke es apenas konosida, la prezensia de konversos i de la Iglezia Katolika en los viajes de Cristobal Colon a Amerika fue muy demprana. En el primer viaje, en 1492, estuvo el fraile Antonio Perez de Marchena, ke era de orijin “konverso” i ke se avia echo amigo de Colon kuando paso la frontiera de Portugal a la Espanya i el les dio abrigo, a el i a su ijo, en el konvento de “La Rabida”. Este konverso apenas mentado por los istoriadores, era tambien entendido en astronomia.
En el sigundo viaje, ke fue en 1493, vinieron algunos otros konversos ma la Reyna Isabela se okupo de embiar a “las Indias” al fraile benediktino Bernardo Buyl, kon el kargo de “Vikario Apostoliko” de Roma para las ditas “Indias”; lo ke mos amostra ke la Iglezia ya estava prezente en la Amerika ainda antes ke fuera konkistada enteramente por los espanyoles.
En este mizmo anyo la Reina dio tambien un orden defendiendo de ir a las “Indias” a los “kristianos muevos”, espesialmente a los ke avian sido kastigados por la Inkizision, djuntos kon sus desendientes. La diskriminasion enverso los konversos ya avia pasado de ser relijioza a ser rasista por el establesimiento de las reglas de la “limpieza de sangre”. Solo akeyos ke podian amostrar ke eran “kristianos viejos” por kuatro jeneransios de padre i madre, podian viajar a las muevas tierras.
El papaz Buyl, ariva enmentado, fue el primer reprezentante de la Iglezia a demandar de las atoridades espanyolas ke se establesiera la Inkizision en las tierras resien deskuviertas. En 1508 los frailes de la izla La Espaniola (Haiti i Santo Domingo), demandaron ke se ekspulsaran los konversos de la dita isla; ma siendo ke no avia bastante rekursos monetarios, el Inkizitor Tomas de Torquemada tomo la desizion de nombrar a kada ovispo o autorita de la Iglezia, en kada lugar onde se topavan, a ovrar en las “kavzas de la fe”. Este metodo ke ya avia sido uzado en la epoka medievala, es konosido en la istoria de la Amerika kon el nombre de “Inkizision Apostolika”. El turo asta el anyo 1570, kuando se establesieron los “Tribunales del Santo Ofisio de la Inkizision”, el primer en Lima (Peru), el sigundo en la Mueva Espanya (Mexico), i el tresero en 1610 en Cartagena de Indias (oy Colombia).
Entre 1510 i 1511 empesaron las konkistas de las izlas de Jamaika, Porto Rico i Juana (ke es la actuala Cuba), i en el 1519 el Inkizitor Jeneral Alonso Manrique nombro al ovispo Alonso Manso, en Puerto Rico, i a Pedro de Cordoba en La Espanyola, komo los “Inkizitores Jenerales de todas las Indias Oksidentalas”.
Existe un dokumento de 1512 del Padre Bartolome de las Casas (desendiente de konversos de la famia Cazes) i ke fue muy protektor de los indianos ma no de los de su estirpe, en el kual demanda ke se estableska una Inkizision komo la de Espanya, informando ke en las Indias ya se avian djuzgado a 14 konversos i ke avian kemado a unos 4 – ma no savemos los nombres ni si fueron kemados en la Amerika o embiados a Espanya.
La enformasion de la aktuasion de los ovispos-inkizitores en estos primeros tiempos es muy poka; ma se save ke algunos konversos fueron embiados de La Espanyola a Espanya (espesifikamente a Sevilla) i ke sus bienes fueron konfiskados i lo mizmo akontesio en las otras grandes islas del Caribe.
Asta agora, los istoriadores eskriven ke el primer konverso ke fue kemado fue el eskrivano Alonso de Escalante, un konverso nasido en Jaen i ke en primero morava en 1514 en Verapaz (La Espanyola); en el 1516 se fue a la chika sivdad de Bayamo (Cuba) ande fue el eskrivano i despues el “fundidor de oro” en la sivdad de Santiago de Cuba; este era un ufisio muy importante por ke solo existia un lugar ande dirritir el oro ke los indianos kitavan de las minas i los rios i ayi era ande se apartava la taksa de la kinta parte ke era para el Rey. Escalante fue detenido por orden del inkizitor Alonso Manso i embiado a Sevilia ande fue kondenado a ser “relaksado” i kemado en el anio 1523.
Existe otruna letra ke data de Oktobre 1518, embiada a Don Gonzalo de Guzman (ke mas tadre fue Governador de Cuba), en la kuala le eskriven ke le estan dando 200 pezos de los bienes ke fueron de un “Yndio Espanyolisado” nombrado “JU Muñ.”[Juan Muñoz] i “que fue quemado en esa ysla [Cuba] hace ocho meses mas o menos”. La mayoria de los istoriadores no se apersivieron ke en la mizma letra se eskrive mas abasho ke el kemado era por ser “Yudio”.
Agora komo se eksplika lo ke parese ser un yerro del eskrivano: era indiano o era djidio? Kale ke sepamos ke en akeyos anyos, los eskrivanos uzavan a eskrivir, intensionalmente, la palavra “Yndio” i “Yudio” komo iguales, en trokando la “u” por la “n”. El buto era amostrar ke los indianos amerikanos eran desendientes de djudios ke avian ido a la Amerika en bushkeda de las tierras de “Ofir” ande se topava el oro ke yevavan el Rey Shelomo, i ke en konsekuensa los indianos eran desendientes de las diez tribus pedridas de Israel. De esta manera los espanyoles dizian ke la “maldad” de los indianos era por ser desendientes de djudios i por tanto meresian de ser esklavizados.
No ay duda ke Escalante i Muñoz fueron akuzados de ser “eretikos”, en la izla de Cuba en el 1517; la sola diferensia es ke el primero fue embiado a Sevilla i kemado ayi sinko anyos despues, mientres ke el sigundo fue kemado en Cuba a prinsipios del 1517, lo ke sinyifika ke Muñoz fue el primer martir djudio en la Amerika.
Artículos Relacionados: