No es una broma…. Vemos el Prezidente de Turkiya Recep Tayyip Erdogan bezando la mano del ijo del Sheikh Arabo….
I YO DIGO EL KARINYO ANTES DE TODO !
Grasyas mil, kerido Martin (UK) por tus dulses biervos, por enkorajarme a eskrivir mas i mas, por apresyar tanto lo ke meldas de mi pluma… So yo ke te so rekonosiente por tu karinyo.
La foto aki arriva es un buen egzemplo de la egzibisyon del respekto i la valor ke se da a la klasa, al rango i a la rikeza de la persona en el Oriente Medyo en la majoritad de los payizes de Afrika i en el Oriente, i esto se mostra fizikamente de munchas maneras. Kreyo ke en estos kavzos, puedriya sin yerrarme muncho dizir ke es una forma de lograr postos altos, lavoro, favores i dinero tambien….
Yo mensyonare aki unas kuantas formas ke se uzan dayinda en Turkiya. Sin duda estos kedaron de los uzos del Emperyo Otomano.
El “temanna” ke tu dizes no es el bezar-mano ma otra forma de saludar una persona de alto rango. Se aboka la persona asta muy abasho i beza la tunika, el kaftan, ke los “de-al-tiempo” uzavan komo vestimienta.
Mas dospues el temenna troko de forma i la persona se aboko muncho tambien i kon la mano derecha izo solo el djesto de bezar el fostan trayer su mano a su boka i dospues ensima de su kavesa. Esta forma de saludo no egziste mas en muestros diyas. Portanto egziste dayinda por siertos i espesyalmente en los entornos relijyozos.
El beza-mano en sinyo de respekto, par kontra, se uza muncha dayinda en las famiyas turkas, ma no lo tengo visto en las famiyas djudiyas. Yo tambien a mi edad (I kuando era manseva por seguro) si me topava al lado de una persona turka muncho mas aedada de mi saludava en bezando la mano i trayendo su mano a mi frente komo todos. Mis studentes tienen tambien esta maniya de bezarme la mano malgrado ke les digo siempre de ezvacharsen de este respekto !
Ay i otros sinyos de respekto komo no fumar, no meter una pierna sovre pierna, no tomar alkol, pierna sovre pierna, no alevantarse de la meza antes de los grandes, no alevantar la boz i por seguro dar su lugar al aedado o en prezensya de personas a ken devemos respekto.
Esto es la kultura Otomana… Si me demandas a mi, yo tengo respekto solo al saver i al esfuerso para yegar ande uno kere… Al lavoro ke demanda pasyensya i perseveransya….
A la edad i a la fortuna de la persona no tendre dingun respekto…I muncho mas del respekto dare importansya al kerer bien, a la responsabilitad i al dover porke kerer bien una persona es todo…No ay limitos a nada…. I kerer es abrasar, karesar, soriyir, dar tiempo, kudyar, ayudar, mantener i dar konfiyensya sovre todo…. Esto es lo importante entre marido i mujer, las kreaturas i sus paryentes, amigos buenos….
La mas negra koza del mundo es la soledad i el espanto de toparse solo… Bivir sin afeksyon i sin kudyado…. El respekto ? De mi parte se puede ir a la kozina ! Konosko muy muncha gente ke dariyan todo el respekto del mundo para el amor de un perro, de un kavayo… Esto es el amor vedradero, sinsero i sin limitos. Logro el Gan Eden en este mundo ken tiene munchos ke lo keren de vedra, komo yo lo entyendo esto …..
Ke nunka vos manke el karinyo de los vuestros…I no mankesh de abrasarlos !
Artículos Relacionados: