Mas de 800 anyos despues ke fue eskrito en una de las komunidades djudias de Espanya i unos 60 anyos despues ke fue salvado de los almanes ke okuparon a Rodes, un antiguo Sefer Tora del kal Shalom en esta sivdad yego al kal de la komunidad “Or ve Shalom” en Atlanta, Estados Unidos, ke esta selebrando oganyo su 90en aniversario.
El Sefer Tora yego a Atlanta sovre la inisiativa del avokato Aron Hasson ke ocho anyos atras fue a vijitar a Rodes, djuntos kon su famiya, para ver la kaza onde nasieron i bivieron sus antepasados. Eyos vijitaron en el kal Shalom onde les fue kontado sovre la storia de este Sefer Tora ke fue yevado de Espanya a Rodes, probablamente en 1492, i uzado ayi durante mas de 450 anyos, asta 1944. Es entonses ke el rabino de Rodes, espantandose ke los almanes ke avian okupado la izla vendrian a tomarlo, lo entrego al gran mufti de la meshkita turka, ke lo eskondio de manera ke no pueda ser topado.
En este mizmo anyo 1600 djudios ke bivian ainda en Rodes fueron deportados a los kampos de eksterminasion onde murieron 1500 de entre eyos. Kuando tornaron a Rodes los pokos sovrebivientes de entre eyos, el gran mufti dio atras el Sefer Tora al kal Shalom, onde kedo asta 1984, kuando fue yevado al kal Shalom de Buenos Aires, en Arjentina.
Hasson (ke puede ser visto en la fotografia ke damos aki, de la seremonia de dezvelamiento del Sefer Tora) yego a un akordo para ke este Sefer Tora sea emprestado por largo tiempo a su komunidad, en Atlanta, onde kreo a su propio kuento, un Muzeo Djudio de Rodes. Ayi se topa tambien una ekspozision foto-grafika sovre la vida djudia en Rodes entre los anyos 1900-1930.
“Si esta Tora puedia avlar, ke istoria mos kontaria? – apunto rabi Haim Casorla ke fue elijido ultimamente komo rabino de la komunidad Or ve Shalom – Para mozotros este no es solo un simple Sefer Tora sino ke una istoria biva” – istoria kompartida por munchas komunidades sefaradis, viktimas de la Shoa, ke estan tratando agora de reorganizarsen i rekuperar sus istoria i kultura.
impresionante historia Baruch Hashem