EL SEKRETO
del Baron Simon Wolff de Rotschild (1836-1923)
El Baron era un hombre justo ke kreiya en Di-o. Se komportava kon mezura i kon modestiya malgrado su immensa fortuna. Sus varios echos no le tomavan el diya entero i puediya konsakrarse a sus orasyones tres vezes al diya i a su estudyo de la Tora.
Por seguro ke no le mankava enimigos ke tratavan de kavzarle danyo kuando lo puediyan !
En su grande morada el Baron teniya una kamareta de lakuala el solo teniya la yave i dingunos a parte de el puediyan entrar aryento. Era su lugar sekreto.
Un diya los enemigos del Baron oyeron la egzistensya de esta kamareta sekreta i no esperaron del todo para informar la polisiya ke el Baron guadrava paras en una kamareta i uzava estas paras para azer echos illegales, dunke fuyir sekretamente impuestos del governo !
Los tres polises ke vinyeron en seguida a su morada le amostraron los dokumentos ofisyales, permetyendoles de azer bushkadas en la kaza entera…. El Baron no kijo del todo amostrarles su kamareta i les propozo mizmo montantes astronomikos para ke lo deshen en paz ma no reusho i tuvo ke avrirles la puerta.
Los polises fueron muy muy sorprendidos de toparsen en una kamareta vaziya kon unikamente una tomba al nombre del Baron de Rotschild Z”l en medyo de la kamareta !Avriyeron la tomba.. Estava vaziya i no avya mas nada aya.
Alora, el Baron les ekspliko :
“Tengo espanto ke mi rikeza i mis echos me agan orgulyozo i me olvide de la sufriyensya i de las nesesitades de los povres… El mundo material en el kual bivo me puede azer olvidar lo mas importante. Ansina, entro kada diya en esta kamareta i me meto en frente de la tomba. Me akodro ke un diya mi alma va salir de mi puerpo i yevara solo sus “mitsvot”.
No me yevare dinguna koza en mi posession ke tenga valor ma solamente las buendades ke me kayen de azer.
PS > No enkuentri dingunos de su nombre en los Rotschild de Europa i no esto segura si se trata de un senyor de esta dinastiya…. Este parese ser un sivdadino de los Estados Unidos de Amerika. Los Rotschild eran bankeros i fabrikantes de vinos en majoritad. No meldi dinguna informasyon sovre lo ke muestro senyor aziya en su vida.
Kon todo esto penso ke es un artikulo remarkavle por lo ke mos kere transmitir….
Artículos Relacionados: