Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke el proksimo atelye de konversasyon de Vidas Largas se tendra el lunes 18 de mayo, de las tres a las sinko, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir kuando se kyere, eya sola, o de toda manera se puede oir indose kuando se kyere al kavo de la redifuzyon de la emisyon del djueves a la tadre.
Oy me pensi de avlarvos del Templo de Yerushalayim, ke se yama en lashon el Bet Amikdash, la Kaza de Santedad.
Vos akodro ke, en el dezyerto del Sinaï, el Dyo enkomendo a Moshe Rabenu de fraguar una “aron aedut” (arka del testimonyo, mas konosida komo arka de la alyansa). En esta arka, un ermozo kuti de madera kon oro, kon dos anjeles sheruvin ensima, se topavan las tavlas de la Ley. I, sovre todo, ande se topava la arka se topava la shehina. Ya konti esto todo en una de mis primeras emisyones, una emisyon ke yo aviya echo sovre la shehina.
El Dyo demando a Moshe Rabenu de meter esta arka de alyansa en una fragua de madera serrada por tapetes i ke se puediya trasportar: esto era el mishkan o ohel moed.
I de este tyempo los djudyos se ivan de un lugar a un otro kon el mishkan i la arka de alyansa yevada por ijos de Levi, yamados los korasim. I se dize ke si la alkunya Carasso es alkunya de Levi, esto vyene de ke syertos Levis eran korassim.
Kuando Yeoshua Bin Nun entro en Kenaan en traversando el Yarden, el Tanah (Yeoshua III, 15) mos konta ke esta vez, fueron los Cohanim ke yevaron la arka, i ke kuando metyeron el pye en la agua del riyo, la agua se fue i los djudyos pasaron a pye seko (komo aviyan traversado la mar kolorada. Si eran kapaches de traversar una mar a pye seko, kualo era un riyo para eyos!)
Los djudyos teniyan la arka delantre de eyos kuando aziyan la gerra, delantre las paredes de Jericho, por egzemplo. Una vez los djudyos izyeron una bataya kontra los Pelishtim, del tyempo del profeta Shemuel, sin la arka ke se topava en Shilo. I pedryeron la bataya, kon munchos muertos. Vyendo esto, se fueron a bushkar la arka en Shilo, i tuvyeron una sigunda bataya kontra los Pelishtim, esta vez tenyendo la arka kon eyos. Ama malorozamente yene pedryeron la bataya i los Pelishtim tomaron la arka para eyos, i la yevaron ande eyos, en Ashdod, ande la metyeron al lado de la estatua del Dyo Dagon.
El diya despues los Pelishtim toparon la estatua de Dagon rumpida sin kavesa, i los Pelishtim kayeron todos hazinos (de almorranas). El Tanah (Shemuel I, kapitulo 5) mos konta komo, a kada vez, los Pelishtim trokan la arka de sivdad (Gat, Ekron) i a kada vez es la misma koza. Al kavo son los Pelishtim eyos mismos ke dyeron atras la arka a los Djudyos tresalidos, ke la metyeron en la sivdad de Kiryat Yearim. Kuando David se izo rey i konkisto la sivdad de Yerushalayim, dechido de ir a tomar la arka, i se la yevo en su mueva sivdad, Yerushalayim, baylando de alegriya en su kamino; su mujer Mihal (ija del rey Shaul) vyendolo baylar se burlo de el, i por esto no tuvo nunka kriaturas.
Una vez ke tuvo la arka de aliansa en su sivdad Yerushalayim, el Rey David tuvo la entisyon de fraguar un templo para meter en el el mishkan i sovre todo la arka de alyansa. El profeta Nathan va dizir a David, de parte del Dyo (Shemuel II, 11 a 13): “Denuncio a ti Adonay ke kaza fara a ti Adonay. Quando se cumplieren tus dias, y yazieres con tus padres, y afirmaré a tu simiente en pos ti que saldra de tus entranyas, y comporné a su reino. El edificara casa para mi nombre, y comporné a silla de su reino fasta siempre.”
I de fakto, no fue David, demaziya okupado por sus gerras, ama su ijo Shelomo ke se auno kon su amigo Hiram, rey Phenisyano de Tyr, para fraguar este templo ande meter el mishkan i la arka. Por esto Hiram dava la madera de los magnifikos arvoles del Levanon (alarzes i boshes, cèdres et cyprès) i Shelomo le dava trigo i azete de azitunas (Reyes I, kapitulo 5, pesukim 10 i 11).
El Tanah mos konta kon detalyos la fragua del templo i su ermozura, kuando fue kuvyerto de oro. Los Cohanim, ke ya aziyan los sakrifisyos i las kozas de la ley en el mishkan, los izyeron indimas en el templo (Bet amikdash). El kapo era el Cohen gadol, el Cohen bashi, ke solo puediya entrar en el lugar el mas santo del templo, i solo un diya en el anyo, el Diya de Kipur, i aya pronunsyava el nombre del Dyo.
Basho el, aviya los otros Cohanim, ke aziyan los sakrifisyos i las orasyones, i los ombres de Levi ke no eran Cohanim los ayudavan. Aviya un solo templo en toda erets Israel, era en Yerushalayim, i no se puediyan azer sakrifisyos en otro lugar.
Para las fyestas de mikra kodesh (konvokasyon santa) komo Rosh Ashana o Kipur, kada djudyo se teniya de venir a Yerushalayim para ofreser su sakrifisyo.
Esto era del tyempo del rey Shelomo. Ama, komo ya lo savesh, a su muerte, sus ijos Roboam i Jeroboam se pelearon, i kada uno se izo rey, Roboam guadrando a Yerushalayim kon los trivos de Yehuda (ke era el trivo del rey ) i de Binyamin (ke era el trivo del rey antes de David, el rey Shaul). Se disho rey de Yehuda i su reyno fue yamado reyno de Yehuda.
Los diez otros trivos se metyeron basho el rey Jeroboam, ke fundyo el reyno dicho de Israel, ke va al kavo tomar Shomron komo kapitala. Ama, komo ya lo savesh, este reyno de Israel va kaer unos dozyentos anyos despues, en 720 antes del kristo, kontra los Asyryanos, i los pokos ke van a kedar van a ser yamados Samaritanos. Van a fraguar, eyos tambyen, un templo en el monte Garizim en los anyos 300 antes del kristo, ama este templo va ser derrokado en 108 antes del kristo por Hyrcanos, kapo de los djudyos despues de la muerte de Shimon Makabi, su padre.
Esto todo es lo ke mos es kontado por el Tanah, el livro de los Makabim i Flavius Josephe. Kualo dizen los istoryanos? Eyos se fundan sovre la arkeolojiya, i la arkeolojiya es muy prove para konfirmar lo ke mos konta el Tanah sovre el templo de Shelomo. Deke es muy prove? Kale saver ke, asigun el Tanah, el Templo de Shelomo fue fraguado al mismo lugar ande fueron fraguados el Sigundo Templo i el de Herodes, de los kuales vo avlar mas despues, i despues de eyos el Domo de la Roka i la Meshkita Al Aksa (La Leshana) por los Musulmanes. Halbuki, afillu si los djudyos tomaron la entera sivdad de Yerushalayim para Israel en 1967, desharon a los Muzulmanos la administrasyon de lo ke eyos mizmos yaman “la esplanada de las Meshkitas” (i ke los djudyos yaman Har abayit, el Monte de la Kaza). I no solo los Muzulmanos defenden toda bushkedad arkeolojika de basho de la esplanada, kijo dizir djusto ande se topava el Bet Amikdash, ama ensima de esto an derrokado en 1996 kon buldozeres, sözde para fraguar una mueva meshkita (Al Marwani) basho la esplanada, al lugar yamado “los ahires de Shelomo”, la tyerra ke se topava aya.
Las gazetas avlaron muncho, estos diyas, de las destruksyones arkeolojikas por los talibanes o por Daesh, ama no oyi ni un byervo sovre este krimen arkeolojiko. La razon es ke fue echo kon la permisyon del primo ministro Ehud Barak, ke se espantava de una intifada.
Los arkeologos israelyanos tuvyeron de luchar kontra sus propyas autoridades para pueder bushkar lo ke se topava en la tyerra echada por los Muzulmanos. Al kavo ganaron, i el profesor Gavriel Barkaï, ayudado por…70.000 veluntaryos venidos del mundo entero, pudo empesar su bushkedad, i topo varyas kozas, ama muy poko, o nada, sovre el templo de Shelomo.
Asigun los arkeologos, tenemos una preva ke un rey David egzistyo, es una laja deskuvyerta en 1993 en Tel Dan (en el Norte de Israel, no leshos del Kibuts Dan ande me fui en julyo 1967). Es la primera vez ke el nombre de David fue topado en arkeolojiya. Es una laja eskrita en arameo por un rey de Sirya, sea Hazael, sea su ijo Bar-Hadad II. Son enemigos de los djudyos, i son orguyozos de tener ganado una gerra kontra eyos. I eskriven , asigun el arkeologo André Lemaire: “Mati a Yoram ijo de Achab, i mati a Ahazyahu ijo de Yoram rey de la kaza de David (Beth David)”. Lo ke mos interesa, es ke estos dos reyes son dichos de la kaza de David, i esto es una preva de la egzistensya de un rey David ke mos vyene de enemigos.
Por lo tanto, no ay otras prevas arkeolojikas sovre el Templo de Shelomo, por la buena razon ke para topar prevas, kale bushkar de basho de la esplanada, i esto lo Muzulmanos no lo permeten.
Esto dicho, ya savesh ke, de toda manera, Yerushalayim fue konkistada en 586 antes del kristo por el rey de Bavel Nebuhanetsar, la sivdad i el templo derrokados i kemados el 9 de av, diya de tisha beav, i parte de la povlasyon yevada en Bavel.
Ya savesh tambyen ke, en 538 antes del kristo, el rey de Persia Cyrus konkisto Bavel i permityo a los djudyos ke lo keriyan de aboltar en Yerushalayim i de fraguar un muevo Templo, ke se va yamar el Sigundo Templo. Esto va ser el echo de Ezra i Zerubavel. Lo fraguan al mismo lugar ande se topava el primer. La fragua va surear unos vente anyos i el Templo va ser inogurado en 516.
Ama, esta vez, van a faltar la arka de aliansa (vos akodro ke el primer templo fue fraguado djustamente para resivir esta arka en lugar del Mishkan), i tambyen las tavlas de la ley, los urim i tumim del Cohen Gadol, ets. A la diferensya del primer, tyene un lugar para los gerim, ke sin ser djudyos kyeren venir al templo.
Este templo, komo Yerushalayim, va pasar de la dominasyon persa a la dominasyon grega kuando Alexandros konkista Yerushalayim en 331, i despues a los reyes desendyentes de Seleucos, uno de los kapos de armada de Alexandros. I komo lo savesh tambyen, Antiochos Epiphanes kyere ovligar a los djudyos a alavar al Dyo Zeus, i mete su estatua en el templo en 168 antes el kristo.
Vyendo esto, los djudyos dirijidos por los Makabim izyeron una rebuelta ke reusho i, en 165 antes del kristo, el templo de Yerushalayim fue lavado de lo ke lo teniya enkonado, i inogurado de muevo. Esto dyo la fyesta de Hanuka, ke azemos asta oy kada 25 de Kislev.
Yerushalayim i su templo van a kedar independyentes basho los reyes djudyos hashmonaim, desendyentes de los Makabim, ama esto va turar solo un siglo, porke en 63 antes del kristo los Romanos van a entrar en Yerushalayim i meter un governador. Deshan un rey djudyo, ama sin haliz poder.
Los Hashmonayim son remplasados por un rey djudyo ijo de Antipater, ke aviya sido konvertido al djudaismo. Se yama Herodes, i va ser rey entre los anyos 37 i 4 antes del kristo. El va aprovar de plazer tanto a los Romanos komo a los Djudyos. Para plazer a los Romanos va, entre otras kozas, azer fraguar una sivdad entera ke va yamar Cesarea, del nombre de los Cesares Julius i Augusto. I para komplazer a los Djudyos, ke no lo keriyan por modo de su amistad kon los Romanos, va azer fraguar muy importantes agrandesimyentos al sigundo Templo.
Por esto va tomar 10.000 ovreros i para mirar si todo va ser cacher toma a mil Cohanim. Los lavores empesaron en 19 antes del kristo i el templo fue inogurado del tyempo del rey, ama en vedra va ser enteramente eskapado solo en 63 despues del kristo…solo syete anyos antes ke sea derrokado por Titus! Ama dainda no estamos en esto. Herode va azer fraguar una pared de 500 metros para sostener una esplanada. Ya puedemos ver lo ke keda de esta magnifika pared mirando el Kotel, la pared oksidentala. En kuanto al Templo el mismo, era muy impozante, riko i ermozo, esto es una koza sigura.
Malorozamente, en 70, ay una rebuelta djudiya i las armadas romanas de Titus enserran Yerushalayim ke se defende asta la muerte, ombres i mujeres en djuntos. El templo, defendido por sus fuertes paredes, reziste yene un tyempo, ama al kavo kaye el tambyen un diya de tisha beav. Los Romanos meten el fuego al Templo i lo destruyen tanto ke no va pueder mas servir. De este diya no va aver mas sakrifisyos i los Cohanim guadran solo una onor ama no tyenen mas utilidad en la sosyeta djudiya. Los Romanos se yevan kon eyos un alay de prezoneros i tambyen las rikezas del Templo, inkluyendo la menora de oro, lo ke se puede ver sovre el arko de triumfo de Titus, fraguado por esta okazyon.
Los djudyos van a trokar la manera de pratikar la relijyon, remplasando los sakrifisyos por orasyones, lo ke asigun mi es mijor… afillu si syertos hahamim kyeren fraguar un treser Templo
Yene los djudyos van a azer, en 135, una mueva rebuelta kontra los Romanos kon Bar Kohba, ama van a pedrer la gerra de muevo, i esta vez el emperador romano Hadriano va derrokar toda la sivdad i lo ke kedava del templo, salvo estas godras paredes komo las del kotel, ke va solo kedar komo rekodro para los djudyos. Hadriano va mismo asta trokar el nombre de la sivdad Yerushalayim, yamada Aelia Capitolina, i el nombre del pais, ke en vez de Judea va yamar Palestina.
Kuando los emperadores romanos se van a azer kristyanos, van a aprovar de topar los lugares ande estavan los monumentos de la vida i de la muerte del kristo, i aya fraguar iglesyas. Ama kon la venida de los Arabos, las kozas trokan de muevo. Afillu si el Koran no avla nunka de Yerushalayim, dizen ke aya muryo el profeta Muhammad, i fraguan sovre la esplanada del Templo el Domo de la Roka i la meshkita Al Aksa.
Yerushalayim va trokar munchas vezes de konkistadores asta ser de muevo djudiya i unida desde 1967.
Artículos Relacionados: