Munchos livros i artikolos i livros ya fueron eskritos sovre la kestion si Cristobal Colon (o Cristoforo Colombo sigun es tambien konosido) era verdaderamente italiano, de Genova, en konformidad kon la teza akseptada kaje universalmente asta pokas diezenas de anyos atras, o bien, sigun es afirmado ultimamente por numerozos investigadores, un eksplorador espanyol i posiblemente desendiente de anusim, de los ke fuyeron de Espanya despues de las matansas de 1391 i se refujiaron en una de las Izlas Baleares.
En presedentes numeros de Aki Yerushalayim ya publikimos unos kuantos artikolos sovre las opiniones de algunos de estos investigadores, ma malgrado ke los argumentos ke eyos prezentan son bastante konvensientes, por las oras kada parte keda firme en sus opiniones. Djuntos kon esto, kontinuan a ser publikados artikolos, notas i informasiones ke echan un poko mas de luz sovre esta kestion – komo por exemplo esta kurta nota ke mos yego pokas semanas atras, sovre el testamento del deskuvridor del kontinente amerikano, i en la kuala es apuntado entre otras ke:
….. Colon firmo el 19 de Mayo de 1506 su ultimo testamento en el kual inkluyo sinko kuriozas i reveladoras dispozisiones.
Dos de eyas, entregar la diezena parte de sus bienes a los proves i dar una dota anonima a ninyas proves, eran tradisiones djudias.
El demando tambien ke sea dada una sierta suma de dinero a un djudio ke bivia a la entrada del kuartier djudio de Lisbon.
En algunos dokumentos, Colon utilizava una firma triangular de puntos i letras, ke asemeja a las inskripsiones enkontradas en algunas lajas de simeterios djudios en Espanya. El ordeno a sus eredores de utilizar esta firma a perpetuidad. Segun “La Istoria de los Marranos”, del istoriador djudio inglez Cecil Roth, este anagrama es una version kriptika del Kadish, la orasion resitada en la sinagoga, despues de la muerte de un ser kerido i en los meldados anuales, en memoria de los difuntos. De esta manera, Colon permetio a sus ijos de dizir el Kadish por sus padre kuando murio.
En fin, Colon desho dinero para apoyar la kruzada ke esperava ke sus suksesores realizarian para liberar la Tierra Santa.
Aun ke para mozotros estas dispozisiones puedan pareser muy sinyifikativas, djuntandosen a todos los argumentos ke apoyan la posibilidad ke Colon era desendiente de anusim, es tambien probable ke eyas seran interpretadas, por los ke e opozan a esta teza, de una manera diferente i ke la polemika a este sujeto se kontinuara ainda largos anyos.
Artículos Relacionados: