Por seguro ke se sakudyeron las tierras de Israel kon la kantika Hebrea ke gano el primer lugar. La gente estavan lokos de alegriya espesyalmente en estos diyas tan difisil ke Israel se afronta kon los terroristos del Hamas ke solo pensan komo derrokar las frontieras, entrar en Yerushalayim i matar lo mas de muestros ermanos… Se alokesyeron espesyalmente dospues de la avyertura de la Embassada de los Estados Unidos en Yerushalayim ke a mi opinion fue el mas grande regalo de Trump al Puevlo Judyo. Ke Di-o le de todo bueno i kreyo ke bastaran i sovraran todas las bendisyones i orasyones ke este Puevlo izo de korason… i yo mizma aki…
En el artikolo de Shimon se da importansya sovre todo a las mujeres ke deven ser akseptadas mizmo si son godras i feyas…. Yo no esto del mizmo avizo porke somos todos Sus kreaturas i El NUNKA apartara los feyos de los ermozos ni los rikos de los povres porke seramos juzgados solo kon muestra konsiensya i lo bueno i lo negro ke izimos en muestra egzistensya….
Dunke, rechesar una persona solo pormodo de su aspekto fiziko es un grande pekado ! I la verdad, yo la topi muy simpatika, kon muncho talento, una boz maraviyoza i por seguro meresyente de ganar esta kompetisyon. Es godrika i vino el tiempo de echar de la sena estas anoreksikas ke la miran den alto kon despresyo…. Estava una munyekita de manseva i ya se esta viendo en las vitrinas de las butikas el stilo de su vistimienta ke plazyo a todos…. Hourrahhhhhh !
Mis applozos por este triumfo, la orijinalitad de su kantika, su talento para kantar de manera tan perfekta i manyetizar la gente kon su show !
Shimon mos trava la attensyon a la politika de esta kompetisyon. Kero dizir ke los payizes amigos se dan los altos puntos…. Gresya i Cyprus, Espanya i Portugal, Norvegia Swedia i Denmarka i otros ansina….. No lo niego ! Israel no konta munchos partizanos ma Netta supo ganar “kon sus dientes” dizimos, el Eurovision, gritando en scena kuanto ama su payis i ke la otra vez, la kompetisyon sera en muestra kapital, Yerushalayim…. Be ezrat ha Shem !
Sharope Blanco
[email protected]
Artículos Relacionados: