BOKER TOV, GUNAYDIN,
BONJOUR, GOOD MORNING
BUENOS DIYAS MIS KERIDOS !
Diya de ermozuras i de salud para todos… Oy es Mierkoles el 25 de Julyo 2018 (aaaaaaa ! No estavamos en Junio ?)
A mi ventana un sielo blanko i grizo en Istanbul i es un tiempo maraviyozo para ir a kaminar. El sol no esta ezmayandomos de kalor ! Las tempestas de los dos diyas de alkavo fue un verdadero Harmagedon ! Madre miya bendicha ! Mil guerkos del Gehinnam ! A medya noche el sielo estava aklarado por las alamparas unas despues de las otras sin kedar… El bruido de los tirguelos komo una orkestra de salvajes akompanyando estas alamparas ensodresavan muestros oyidos i Bilge i yo bushkavamos ande eskondermos ! Kedar enfrente de la ventana i mirar lo ke se estava pasando afuera asemejariya a Neron azyendo muzika delantre de las flamas ke abrazavan la sivdad ! Dezmazalada Roma ke el loko de Neron kemo por su proprio plazer… Ke dezgrasyas afitaron en los pokos miles de anyos ke el ser humano egziste.. I solo pensar ke los dinozoros egzistyeron miles de milenaryos. No ! Mozotros no vamos a sobrevir tanto a las maldades i a las negriguras ke kavzamos kon muestras manos, malgrado de ser dotados kon la inteligensya kon lakuala Di-o mos kreyo.. I esto sin avlar del todo de la mankura de alimentos i de agua ke mos aspera en el futuro !
El park, enfrente parese a una guerta ande se esta azyendo una boda de zinganos ! De ande se arekojyeron tantas tapadas vistidas kon kolores “ven mirame !”, tantos hombres kon mustachos i barvas, sus jaketas echados ensima de sus ombros, esta gentorya ke biven en el deredor i ke lo mas desharon sus puevlos en Anatolia porke pensaron komo los otros ke “la tierra i las piedras de Istanbul son de oro !!!!” Istanbul se incho de estos… Guadran sus tradisyones i nunka se adaptaron a la vida mas sivilizada, mas moderna de una grande metropol. Forman el “Varosh”. Son milliones. Los ke sienten la difikultad son los mansevos ke se engrandesyeron lo mas en la sivdad… Se sienten aminguados pormodo ke no tienen el mizmo poder finansyal de las familyas installadas de siempre en Istanbul, pormodo ke se averguensan de bivir en los kantones aleshados, nombrados por ser “lugares danjorozos, de provedad i de krimen”,porke tienen muncha diffikultad de ser akseptados entre “los buenos” kon loskuales frekuentan las mizmas universitas, porke saven ke no tienen el “derecho” de “meter ojo” a una ijika o a un mansevo del “otro lado” ! Kuchiyhos o armas pueden “avlar” a la fin…. Los VAROSHES se frekuentan entre eyos i lo mas de las mujeres se van a alimpyar las kazas de los “rikos”… Los hombres son lavorantes duros, shoferes, vendedores en los merkados avyertos. Sus mas grande dezeyo es de edukar sus ijos i verlos en buena pozisyon. Guadran sus kazikas muy leshos en sus puevlos i tratan de ir por un kurto tiempo en enverano. A sus muertos los enterran en el simetaryo del puevlo i nunka en Istanbul. Se meten en kamino kon otobuses, todos los ke se konosen, i lo mas de la mizma rejyon, i azen los rituales endjuntos. Son komo una mizma famiya. Espesyalmente en las bodas i en los funerayes. Muavemente, ir a la armada tambien se izo un evenimiento muy importante… Komo una boda ! Puedeser porke ay munchos ke tornan en serkulyos drapados de la bandiera Turka…. Povretos..
Me sorprende de bivir lado kon lado, kero dizir en una mizma sivdad, i ser tan leshos, tan diferentes i tan apartados kon baryeras enviziblas ma mas realas ke baryeras de ferro ke se ven de la parte de todos…. Lo mas de las mujeres son tapadas i malhorozamente maltratadas en sus kazas.
Sus “odyo” por los “rikos” se entyende fasilmente. Los enkuentro en el merkado tratando de trayer a kaza lo mas barato ke egziste para pueder mantener las munchas bokas ke tienen en sus mezas… Ma… Por Di-o santo ! Deke van azyendo DAYINDA tantas kreaturas ? No veygo dinguna felisitad en sus karas. No son dulses i buenas ma amargas, prontas a gritar, sin pasensya para sus kreaturas. De unas ni se puede oyir un biervo… Se kayan, los ojos embasho.. Komo si teniyan en sus ombros el pezgo de la humanitad.. No se keshan. Komo si nada les importa.. No saven nada de la egzistensya. Nasen, engrandesen kreaturas i deshan la vida. Milyones de vidas ke se asemejan ke son absolutamente identikas…
Kon karinyo
Artículos Relacionados: