Esta semana en Israel vo a markar un anniversario personel.50 anios pasaron desde ke parti de la Australia para entrar en la Yeshiva”Kol Torah”de Jerusalem.ay muncha istoria a kontar.Partiendo del Aeropuerto de Essendon en Melbourne i tomando el vuelo kon la kompania de”BOAC” a las 09.30 de Lunez en Febrero 1965 me topi en Tel-Aviv el proximo dia a las 07.40.Era un vuelo ke duro 30 oras pasando de”Brisbane, Darwin, Singapore, Colombo, Bombay i Tehran.”Las relasiones entre Iran i Israel no eran malas en el tiempo del Shah.
En los anios 1964/5 los viajes en avion no eran mas un luxo grande.Ma no eran tampoko baratos.La ida i vuelta venia a 600 Libras Esterlinas.Esto representava el sexto de lo ke ganava uno en un anio.Un anio antes de esto los ke se ivan a las Yeshivot de Bnei Barak i Kfar Chabad azian el viaje en mar tomando un mez.Se ivan a Italia i de ayi a Israel. Ma para las famiyas era un sakrifisio grande de embiar a sus kriaturas en viaje.Savian la valor ke tenia la edukasion de Yeshiva.Kuando uno se iva ayi,se kedava por la durasion de sus estudios.No avia kestion de azer idas i vueltas por kualkier kosa.Ir a Israel por unas kuantas semanas era una kosa ke se azia una vez en la vida.Antes de salir en kamino se azia un Kiddush entre famiya i amigos i akompaniavan a uno al aeropuert.En su regreso se organizava una fiesta i todos kerian oir komo Israel estava avanzando.
Oy el Estudio de la Yeshivah para los ijos i el Seminario para las ijas entra basho”SHNAT/Un anio”.Mismo si la distansia es grande entre los 2 paises,el porsentage de los ke vijitan Israel es muy alto.Mas ke en otros paises.Salir en viaje forma parte del Estilo de Vida.Mismo si viene karo,kaie mas barato de lo ke era antes.Kisas no savemos apresiar tanto a Israel.Por sierto devemos aumentar nuestra apresiasion del milagro de tener oy un Estado Judio.
***
Mis experiensias de Israel i la manera de viajar fueron diferentes.La primera vez ke me fui a Israel era 64 anyos antes,kuando Israel venia de naser. Komo un muchacho de 14 anios me embiaron a un kibbutz i vide lo ke era ser un pioniero i idealisto.El viaje entre Istanbul i Haifa se azia en vapores yenos de imigrantes.A mi me metieron en BUNTASH un vapor ande los passajeros dormian i kosinavan en la kuvierta.Nos tomo 5 dias para yegar a Haifa.Abashando del vapor nos metieron DDT i nos kortaron los kaveyos,mismo de las ijas.En estos tiempos no avian tantos echos i se davan kupones para merkar siertos alimentos.La gerra avia terminado,ma el espanto de una otra gerra se kedava ayi.
Mi segunda vijita tomo lugar en 1967,48 anios antes,indo ayi komo voluntario.Esta vez me iva de Sydney a Tel-Aviv en avion pasando por Hong Kong.Komo aparadas avia Colombo i Tehran.No pensava ke Iran se iva azer un enemigo grande..Era un otro mundo esta vez topandome kon Judios viniendo de los paises Anglofones,Frankofones i Hispanofones.En lugar de tener 14 anios tenia 30 anios.En un espasio de 19 anios Israel se avia tornado kaji a un pais Oksidental.Ma no avia fin a las gerras.Unos venian en Aliya i otros se ivan en Yerida.La poblasion se avia kedado chika.Kisas ser rodeados de enemigos traia un sentimiento de klostrofobia.
Israel konto siempre para mi.Mismo si no pude estableserme ayi.En los anyos siguientes 2 destinos dominaron mis viajes.Istanbul i Tel-Aviv.
Trezladado i presentado por Shimon Geron. Sydney
Artículos Relacionados: