Ke savor tiene la vida sin los kuentizikos ? Los Judyos se namoran por los kuentizikos i no les manka el humor ! Esta vez vos prezantare un kuentiziko de Kristyanos ma ke topi muy savrozo i muy a mi gusto… I es ke…..
Charles era un viyejiziko de 87 anyos ke biviya en un kazal del norte de la Fransia. Su perro Bobby lo akompanyava a todos los lugares ande se iva. Eran muy attados i dinguno en el kazal puediya akodrarse de ver el uno sin el otro. Malhorozamente por Charles, una ermoza demanyanada de primavera Bobby muryo. Charles estava muy muy triste. Se vistyo su kostum preto i se fue a avlar kon el pretre de la iglesya ke frekuentava. El saserdose viendolo entero de preto vistido i los ojos aunflados de yorar metyo su mano en su ombro i le demando komo puediya ayudarlo en estos diyas difisil :
– Peryi mi kompanyero de munchos anyos i sufro de su absensya Padre.
– Es ansina la vida… No peryas tu fe. El te esta mirando agora del paradizo ande se topa i por seguro ke no kijyera verte demoralizado.
– Por sierto ! Era tan alegre…..
– El DI-o ke te de pasensya….
– Vine para demandarte komo vamos azer los funerayes porke le devo este d’alkavo gesto de amistad. No teniya dingunos a parte de mi….
– Dingun problem. Yo me enkargare de todo. Del serkolyo, de las flores, i de la seremoniya… Ken era tu amigo Charles ?
– Bobby mi perro bien amado ! I tu lo konoses. Siempre estava kon mi !
– La seremoniya sera por tu perro ?
– Si ! Yo esto bivo dayinda !
– Ma no puedemos azer funeraryos para un perro !
– No ? Me puedes ayudar puedeser a topar una eglisya ke lo akseptariya ?
– No se de verdad… Puedeser la Iglesya Anglikana del puevlo vizino. Eyos son manko relijyozos de mozotros.
– I te parese ke ke mi donasyon de 10.000 Euros les va abastar? Es todo lo ke tengo i no me kedaron munchos diyas mas de bivir! Mi pensyon ya me abasta…
– Charles mi amigo ! Porke no me dishites ke tu perro era Katoliko ? No vas a tener menester de ir ande los Anglikanos… Le vamos azer un ermozo enterrimiento aki mizmo !
Ke nunka vos manken las sorizas….
Sharope blanco
Artículos Relacionados: