Antolojia Djudeo-Espanyola: Seleksion de tekstos eskojidos de manaderos diversos i kopiados adaptandolos a la grafia de Aki Yerushalayim, afin de dar una idea de los diferentes estilos i niveles linguistikos ke se reflektan en la kreasion literaria en ladino a lo largo del tiempo.
Emansipasion en las komunidades sefaradis, fin del siglo 19.
de: Textos poémicos sobre la emancipación de la mujer sefaradi en el mundo de los Balcanes
Elena Romero, en Sefarad, vol 69, No.1 (1-6/2008)
- Noventa anyos antes,
kuando mi padre era mansevo,
kantava armoniozos kantes,
ma sin un feo biervo. - Oy, kuando el ijo kanta
kantigas de amores,
su…boz mas i mas alevanta
i en su tripa ay munchos danyadores. - Noventa anyos antes las madamas
vestian muy modestamente;
eran buenas de korason, buenas de almas,
a sus maridos amavan sinseramente. - Oy las mujeres enteramente trokaron,
visten vestimientas muy lusozas;
de mas en mas eyas se alterearon,
si no les das moneda, devienen mutrozas. - Noventa anyos antes las ijikas
todos sus kuerpos se kuvrian;
sea de grandes komo chikas
ni mizmo sus kalsados no se les vian. - Oy son a la kontra: las ermozas
sus kuerpos kuvren muy poko;
muestran djinoyos i otras kozas
i kada mansevo rindiendo poko. - Antes noventa anyos se savia
ke la ke nase ija, ija kedava;
kortaduras de kaveyos no existia
ni ningua ija no se arapava. - Oy las kozas trokaron enteramente:
las ijas se arapan komo los ombres
ken es ija no se aparta de enfrente,
lo ke les manka es solo….los nombres. - Antes noventa anyos los djenitores
se okupavan por sus ijas de kazar,
las metian en manos de koredores,
lo ke eyos dezian no se devia refuzar. - Oy no ay koredores ni kazamenteros,
las ijas a sus kompanyos apanyan;
ya es bueno kuando salen sinseros,
ma… kualo azer kuando las enganyan? - Antes noventa anyos avia inyoransa,
ke muncha estupidita existia;
ma de dinguna koza no avia mankansa:
amor, sinseridad, onestedad se via. - Oy en este siekolo de sivilizasion,
ke muevos inventos inventaron,
todo lo bueno tuvo disparision,
ijos i ijas enteramente trokaron.
Uno de los medikos djudios ke siivio a los sultanes en el Imperio Otomano, fue Salomon Eskenazi ke en desparte de exersar la medikeria kumplio misiones diplomatikas tambien, i entre otras firmo a nombre del Sultan Murad III, en 1586, un akordo entre Espanya i Turkia.
Durante el reyno de Sultan Mehmet III, Salomon Eskenazi kontinuo a servir el paiz, ma kuando el Sultan Ahmet I suvio al trono el ya no estava mas en vida.
El djoven sultan ke tenia solamente 14 anyos, estava sufriendo de granos en sus karas (exema) ke dingun mediko no les estava topando remedio. Bula Eksati, la mujer de Salomon Eskenazi, ke era konosida komo una buena kurandera, fue yamada al palasio. Eya, kon sus konosensias de medesina popular, reusho a kurar al sultan ke la rekompenso dandole regalos muy valutozos. Un anyo despues de este evenimiento Bula Eksati manifesto su dezeo de estableserse en Venezia. El sultan ke aksepto su demando le dio en mano una letra de rekomendasion para el Doj de la Republika de Venezia ande fue resivira kon grande onor.
Artículos Relacionados: