Todas las fotos de mi chikez, i mizmo de la chikez de mi mama, tenian i tienen la marka de Foto Gagin. El magazen de Foto Gagin se topava en Karatash, muy serka de muestra kaza, i por esto yo no solo ke pasava munchas vezes por ayi, entrava muncho alientro para darle a Mosyo Gagin rolos de filmos a desvelopar i imprimir (despues ke tuvimos muestra propria makina de fotografear. ) Meldi ke este fue el primer studio de fotografo profesional en Izmir.
Agora en la muevamente restorada kehila (kal/sinagoga) Ets Hayim de Izmir ay una ekspozision titulada “Del Ojo de Foto Gagin (1902-1968)Los Djudios de Izmir i Karatash (“Foto Gagin Gözünden (1902-1968) İzmir Yahudileri ve Karataş”) realizada kon los esfuersos de Selim Bonfil (investigador, djuntos kon su mujer Sarit, de la istoria de los djudios de Izmir) i la kolaborasion, entre otros, de Sebastian Gagin, bizinyeto en Buenos Aires, Arjentina, del primer “Mosyö Gagin” ke establesio el studio en Izmir.
Yo avia entrado en korespondensia kon Sebastian achakes de mis fotos i mis memorias del magazen de su bizpapu, i kuande supe de esta ekspozision le eskrivi de mi alegria. El tuvo la jantiyeza de mandarme el teksto de Introduksion ke eskrivio, en inglez i kastelyano, para la ekspozision de Izmir. Esta tan ermozo ke lo traduizi al ladino, i vo lo meto aki en anekso para ke todos lo podash meldar.
Las fotografias estan djuntos kon tekstos eksplikatorios, i mizmo una poezia eskrita a esta okazion. Yo esto meldando todo lo ke se publika en jurnales turkos sovre esta maravioza ekspozision, i aunke ya enkomendi el livriko tambien, no puedo no enselarme de todos los ke tienen la oportunidad de viijitarla en persona!
Rachel
Me enchachie de buena manera meldando lo kjualo mos mandaste sovre las estampas de Izmir i especialmente de Karatash. Mi mama avibia en esa kalecha i kuando niñios mos daba lachon sobre lo kualo facian kuando eya era una niña.
Mensionas ma no mandas las estampas i komentarios para poder disfrutarlos.
Asi vibas muchos i buenos ke espero mos los mandes.
Eduardo Hadjes Navarro
David ben Jaim