LA OPERASYON DE ENTEBBE – UGANDA
EL TIEMPO PASA MA LA HISTORIA KEDA
LO KE MOS KONTO EL CHEF DE LOS PILOTES
El Brigadier General Yoshua Shani fue el pilot prinsipal de la Operasion Entebbe : Piloto el primer avion de karga Hercules C-130, kon todas las fuersas para salvar las personas detenidas por los terroristos en Entebbe.
*” Mis padres biviyan en Ukrania. En akel tiempo era parte de la Polonia. Puedyeron salvarsen de los nazis i se refujyaron en Siberia ande nasi en 1945. Fuimos refujyados en todos los lugares ke fuimos..
Poko dospues de la fin de la guerra, mi familya biviya en el kampo Britaniko de los prizonyeros salvados del Kampo de Bergen-Belsen en Alemanya. Kedimos ayi kuaji un anyo antes de yegar a Israel, a traves la Fransia i el Egipto.
Mis padres eran sionistas de gueso kolorado i avlavan muy bien el Hebreo. Yo mizmo fue edukado en esta lingua des de ke nasi. Estavan muy emosyonados de yegar a Israel, empesar una mueva vida i nunka mas ser refujiyados.
No pensava ser pilot ! Keriya ser injenior elektriko. El diya de mi rekrutamiento, estava asentado sovre la yerva kon los otros kompanyeros en el Bakum (la baza de los rekrutados por la armada). Vino un ofisyal kon alas en su uniforme, se aserko de mozotros i mos disho ke todos los ke estavamos prezentes ayi eramos aptos para estudyar en la eskola de volos. Mos demando ken no keriya ser voluntaryo… Yo kije alevantar mi mano ma me ezvachi viendo ke dingunos teniyan la intensyon de alevantar las suyas….!
Esto era en el anyo 1963…. Arresivi mis alas de pilot en 1965 de Ezer Weizmann el-mizmo ke era el Komandante de las Fuersas Aereas de Israel en akel tiempo.
El primer avion ke voli fue el Noratlas Nord, un avion de transporto. Fui instruktor de Fuga tambien durante 2 anyos.
Dospues me enviyaron a los Estados Unidos para ke me ambeze a volar el avion de karga HERCULES C-130. Al empesijo me topava en Little Rock – Arkansas, mas tadre en el Papa – Carolina del Norte. Fue mi primer viaje a los Estados Unidos.
Hercules C-13
En 1967, durante la Guerra de los Sesh Diyas, estava transportando kombustible i munisyones a muestros soldados ke estavan kombatyendo en la peninsula de SINAY.
En 1973, durante la Guerra de Yom Kipur era un komandante de escuadron. Partisipava en las misiones de rekonosimiento kon la Stratofreighter C-97. Tambien voli el Hercules C-130 a traves del Kanal de Suez, en territorio Egipsyano para approvizionar kombustible i munisyones a las fuersas ke defendiyan el territoryo al este del Kanal. Estas fuerzas fueron dirijidos por Ariel Sharon.
Tuve en todo 13.000 horas de vuelo durante mi karyera en la Fuerza Aerea de Israel.
El 27 de Junio en 1976, un avion de Air France ke salyo de Paris para su destino a Tel Aviv via Athenas fue sekestrado i boltado de fuersa por los terroristos a Entebbe Uganda… Dos de los terroristos eran miembros de la organizasion terrorista Baader-Meinhof, i dos otros del Fronte Popular para la Liberasyon de Palestina. Egzijiyan la liberasyon de 53 terroristos enkarselados en Israel.
“The Baader Meinhof Complex,”
En el treser diya de la kriza, los terroristos separaron a los pasajeros Israelianos i Judyos de los otros. Liberaron a los non-Judios i los embiyaron a Fransia el dia siguiente. En silensyo, alora ke el resto del mundo avlava ma no aziya nada, las Fuersas de Defensya de Israel planearon una mision de reskato.
Yo estava en una boda kuando el Komandante de las Fuersas Aereas de Israel, el General de Divizion Benny Peled, se aserko de mi i empeso a pozarme kestyones sovre las kapasitades de la C-130. Era sorprendyente ke el Komandante de la FAI demande informasyon de un Teniente Koronel sovre este avion ! El C-130 era muevo i el Estado Major de la armada se aviya siempre konsentrado a los aviones de kombate i no de transporte !…
Peled me demando si era posivle de volar a Entebbe, kuanto tiempo tomariya i kualo se puediya yevar kon este avion. Lo deshi kon la impresion ke un reskato seriya posivle.
Empesimos muestro viaje de Sharm-El-Sheikh- Egipto ke aziya parte de Israel en akel tiempo. La despegada de Sharem fue uno de los mas negros de este avion ! Yo no tenya ideya de lo ke se pasariya. El avion estava yenno de gente. Yo yevava el ekipo de asolto del Sayeret Matkal kon Yonatan Netanyahu a la kavesa.
Yonatan Natanyahu Z”l
Yevavamos tambien una Mercedes para konfundir los soldados Ugandezos en el aeropuerto. Se puediyan enganyar savyendo ke Idi Amin, el diktator de Uganda teniya la mizma oto ! Ademas yevavamos un Land Rover i un grupo de parachutistos.
Entebbe estava a 4000 kilometros… Tuvimos ke volar muy serka de la Arabiya Saudita i de Egipto, sovre el Golfo de Suez. No mos espantavamos de violar el espasyo aerial de kualker payis porke es una linya internasyonal. El problem era ke mos puediyan detektar en el radar. Volavamos muy basho – 100 pies sovre la agua, en una formasyon de kuatro aviones.
El elemento prinsipal era la sorpreza. Solo se nesesitava un kamion para blokar la pista i la operasyon se terminariya ! Pormodo de esto, el sekreto era fundamental.
En algunos lugares ke son espesialmente danjorozos volavamos a una altitud de 35 pies. Me akodro ke fui aterrado kuando meldi elaltimetro ! En esta situasyon no se puede volar en formasyon serrada. Komo el lider del volo,yo no saviya si dayinda teniya los aviones 2,3 i 4 detras del miyo pormodo del silensyo total de la radio. En un C-130 no se puede mirar detras. Mazal ke eran pilotes intelijentes i los puediya ver kuando se aserkavan de mi para mostrarsen i dospues tornavan a sus lugar en la formasyon. Es ansina solo ke puide saver ke teniya mi formasyon kon mi…
Mi espanto el mas grande no era ke me traven ensima de la tierra, ma kometer un error de pilotaj ! Me diziya siempre ke no deviya kompremeter esta operasyon en dingun kavzo ! Por seguro ke los rizikos de peryer la vida eran reales ma yo estava sovre todo preokupado kon el atterisaj ! El sukseso de la operasyon era mas importante de todo ! Kuantas personas seriyan muertas si yo kometiya una error ?!!! Estava preparado a lo mas negro ke puedriya afitar. Yevava un kask, un jile para stopar balas i un Uzi. Me aviyan dado tambien muncha moneda en efektivo, en kavzo ke nesesiteriya paras para fuyir de Uganda… Mazal ke no tuve de uzarlos. Les di atras la moneda ke me dyeron dospues de tornar a Israel.
Dospues del atterisaj me detuve en el sentro de la pista, i los parachutistos saltaron de las puertas laterales i illuminaron la pista kon luzes elektrika, para ke los otros aviones pudieran tener un aterrisaj mas fasil ; dospues koryeron para meter mano sovre la torre de kontrol.
El Mercedes y la Land Rover salieron de la puerta de karga de detras del avion i los komandos entraron kon muncha vayensya en el edifisiyo del terminal viejo ande estavan detenyendo los sekestrados. El chef del asolto, Yonatan Netanyahu, el Komandante de la Sayeret Matkal, fue dezgrasyadamente firyido fatalmente por la arma de un soldado Ugandes.
Tuvimos un chiko problem : Nesesitavamos kombustible para volar atras a kaza. Teniamos de kualo ir aya ma no de regresar ! Aviyamos planeado una seriya de opsyones para kargar kombustible en Nairobi-Kenya i logrimos la informasyon ke esto era posivle. Dospues de 50 minutos en terreno de Entebbe mos yego el orden de despego. Me akodro dayinda la satisfaksyon de ver despegar el avion No. 4 kon todos los detenidos salvados a su bordo.
Dospues de todo esto solo puide realizar ke aviyamos reushido ! Lo aviyamos echo !
La mission se aviya kompletada…
El avion ke transportava los ke fueron rehenes aterriso en el aeropuerto Ben-Gurion , i eyos se aunaron i abrasaron sus keridos. Los otros tres aviones kedaron para dar reportes i informasyon.
Yitzhak Rabin, el primer ministro de Israel, se aserko de mi. Aviya 24 horas ke no me trokava i estava dayinda kon los vistidos de vuelo i kon ensima de 100 grados de temperaturas en el avion. Estava sudando desgrasyadamente…. I me viene supito el Primer Ministro kon los brasos grandes avyertos…. Pensava solo “No me abrases ! Por favor… Te puedes murir !” Me abraso durante muncho tiempo i me disho solo “GRACIAS !”. Dospues se fue al lado de los pasajeros reskatados para darles la bienvinida a kaza.
Despues de la muerte de mi padre, topi sus letras ke me embiyo al Kibutz Mishmar HaEmek. Estas letras kontavan sus eksperyensyas durante el Holocausto, lo ke paso kon su familya, ets. No lo vo diskutir aki. En una de sus letras dize, “La unika koza ke me konsola es Yoshua. El me da la fuersa i la razon de kontinuar a bivir.” Vos konto esto porke dospues de 30 anyos, kuando torni de la Operasyon de Entebbe, mi padre organizo una fiesta en mi honor. La famiya i los amigos estavan prezentes para selebrar la reushitad de mi mission. Mi padre estava de ekselente humor. Yo se lo ke el estava pensando komo un sobrebiviente del Holocausto…Estava pensando ke su ijo era Teniente Koronel en la Fuerza Aerea de Israel i aviya volado miles de kilometros para salvar a otros Judyos. Es esto ke le adjunto otros 10 anyos a su vida !
Komo ya lo savesh, munchos de mis kompanyeros se topan agora en puestos altos. Ehud Barak, el Ministro de Defensya teniya el mismo rango ke yo en estos diyas. Estava en el grupo de los planos de la Operasyon i yo era el chef de los pilotes. Me afita de enkontrarlo a vezes oy tambien.
Shaul Mofaz, nombrado muevamente Vice Primer Ministro, fue el enkargado de destruir los aviones de combate MIG sovre el terreno en el aeropuerto de Entebbe para que no mos vengan detras dospues ke despegarimos de Uganda.
Matan Vilnai estava en la kabina kon mi.
Ephraim Sneh estaba en el avion i era el mediko.
Dan Shomron murio antes unos anyos. Era uno de los lideres de la Operasyon.
I por seguro, el ermano de Yonatan Netanyahu es el Primer Ministro de Israel. Lo konosi al empesijo de los anyos 1980 kuando era el Chef Adjunto de Mision en la Embasada de Israel en Washington, DC. ”
*
Keridos amigos i mis amigitas,
Tendremos todos una pensada i una tefila para el muy kerido i muy kerensyozo, el valyente de los valyentes, un ekselente amigo, Yoni – Yonathan Netanyahu – Z’l ke peryimos, ke pekado, a la flor de su manseves.
El dyo su vida para salvar los rehennes de Entebbe en una Operasyon ke termino kon un grande sukseso ma ke el, malhorozamente, no puido selebrar.
Ganeden bueno ke tenga i repoze en paz….
Artículos Relacionados: