Diario Judío México
AVSHA…. LA ISLA EN LA MAR MARMARA
18/8/2015,
[email protected]
Keridos amigos i mis amigitas,
Este enverano esta pasando kon interminables vakansyas por aki i por aya al punto ke tengo de neglijar mis eskritos, koza ke no me gusta del todo de vedra….
Empesimos muestra vida nomada al empesijo de Junio kuando la eskola de Bilge se serro, tomimos un reflo en Istanbul unos kuantos diyas i kontinuimos a selebrar el enverano en Avsha (Avsa) una isla en medyo de la Marmara. Estas d’alkavos vakansyas fina el 24 de este mez se realizaron kon la insistensya de mi angelo de ijo ke pensa ke nadar es la mijor aktivitad para mi. La vedra es ke tiene razon i me siento muncho mijor kuando salgo de la mar, kansada, eskuryendo, kon el reflo a mitad kortado porke nadamos Bilge i yo de un lado fina la otra de la izla…. No komemos pan i kozas ke kontienen arina i asukar, patatas, aroz etc… Bivimos de pishkado, salatas, karne, frutas, gueyvos, kezo i muncho vedrura kozida o kruda. El rezultado me sorprende.
Esta izla tan ermoza i kon el soliziko ke mos desha enkantadas kada tadre kuando se va a durmir aryento de la mar tiene malorozamente problemes de koneksion kon el internet. Mos se va kortando a kada punto i a mi me viene inyervos… Serro mi Carolina kon ravya delantre de una Bilge muryendose de riyir…. Adora verme furyoza kon todas las kozas sin vida i inkapaches de arresponderme ! Tiene razon un poko porke me peleyo komo si me oyivan i puediyan entender lo ke les digo…. El otro diya me peleyi kon el dezmazalado de pishkado ke estava alimpyando, entero muerto ma ke me firyo el dedo kon su espina venenoza ! Vos juro ke endjida muy muncho. Fue Bilge ke me izo un “hadji fishfish” (el bandage blanco godro godro) a mi dediko dolorido. En esta izla barminnam no egziste ni un lugar de ir si afita koza a la persona, ni un mediko… Nada…. Nada mas ke una farmasiya ke vende perfumes i mata-moshkitos sin mizmo un chemisto en la botika…. Mos disheron ke viene las tadres solo… No save nada de toda manera….. Ke azen las personas ? Mueren ! El Di-o dyo, el Di-o los tomo…. El otro diya se muryo delantre de muestros ojos una mansevika… Iva bivir si estavamos en Istanbul…. Ma las plajes una lokura… La mar almendra.. Los merkados inchidos kon todo bueno… Miliuna koza sin valor, feyo para los ke keren yevarsen “souvenirs” de Avsa…. Clubs en kada kanton kon sus muzika fina los sielos las noches…. Leshos de muestro hotel ma oyemos las dezgrasyas fina aki…. Muzika de sinkena kualitad kon mansevos sin kola i sin kavesa tratando de olvidarsen de la mizerya de sus vidas…. Otra vez aki ? NUNKA….. Portanto era un ganeden antes munchos anyos…. Oy me esto azyendo hazina de ver los perros i los gatos de la kaye ambyertos, sin agua, hazinos i sufriyendo de la kalor insuportavle….
Me demando si esto en un infierno o un ganeden…. Mozotras estamos en el mijor lugar i leshos del puevlo ke inchen las kayes de sus gritos i de sus vistimienta sin dingun gusto, ekstranyo a muestros ojos i a muestras kostumbras….
Vos saludo i vos embiyo mi karinyo a kada uno kon la esperansa ke estos diyas van a pasar muy presto para mozotras i tornaremos a muestros kantonikos inchidos de muestros gatikos, al repozo de muestra kazika i muestras kamikas..
…. Al balkaniko de maraviyas i a muestros keridos….
Kon karinyo – Sharope blanco
———————————-
Enviado: martes, 18 de agosto de 2015 20:13:37 CEST
Kerida Sharope
Gracias por el relato que aqui nos brindas, de lo que vienen siendo tus vacaciones junto a tu nietecita Bilge el cual resulta altamente “descriptivo” y conforma como tal, una inmejorable targeta postal de tu veraneo !!!Que no daria yo por poder acompañaros a las dos en tan sugerente periplo, y disfrutar junto a vosotras, de la aventura de vivir descubriendo !!! Para ámbas deseo desde aqui, una venturosa continuacion del mismo, y un feliz regreso a casa, donde os esperan ya vuestros adorables y fieles gatitos … Lo dicho; pasadlo bien, cuidaros mucho, y recibir este Abrazo que aqui os envio (os enviamos todos) con ternura y Karinyo
Eliseo
Artículos Relacionados: