Existio un “Toledo de las tres kulturas”?

Uno de los grandes peligros ke amenazan a los investigadores de la istoria es el de akseptar los dogmas i kayer en simplifikasiones. Los manuales de istoria de mi paiz, Espanya, estan yenos de eyas. Una de las mas repetidas, al tratar sovre los tiempos en los kualos kristianos, musulmanes i djudios bivieron djuntos en la Península Iberika durante la Edad Media, es la ke los kalifika komo “tiempos de toleransia”, i se avla de “konvivensia de las tres kulturas”, inkluzo de “konvivensia armonika” i de “kooperasion interkultural”.

Toledo – Vista panoramika Parese bien, de kara al turizmo, prezentar la sivdad de Toledo, por avlar del kavzo mas sinyifikativo, komo un lugar en el kual djentes de tres relijiones konvivieron armonikamente durante munchos anyos, respektando los preseptos ajenos i kooperando de manera solidaria en un proyekto komun; ma el estudio rigorozo de akel tiempo mos amostra ke no uvo armonia ni kooperasion, ke no fue una konvivensia de tres kulturas i ke el respekto, si lo uvo, fue kondisionado i nunka kontinuo: se tolerava a los djudios porke no azerlo kavzava mas danyo ke benefisio. Ma la toleransia era limitada, a la espera de ke a los impios se les kayese el bandaje de los ojos i akseptaran el kristianismo komo relijion verdadera. En resumen, sus derecho de existir komo djudios era provizorio, i sus tiempo se akavo en 1492, kuando fueron definitivamente ekspulsados de Espanya.

Entre los musulmanes de Al-Andalus o entre los kristianos de los reynos rekonkistados, los sefaradis siempre konstituyeron una minoria ke dependia de la proteksion real i de la konyunktura sosio-ekonomika: en momentos de kriza fueron los ke mas sufrieron. La suvida de algunos djudios a las altas sferas de la administrasion i de la korte fue siempre izolada i osilante. Es tipiko el kavzo de Samuel ha-Levi, el djudio mejor situado de su tiempo, mesena de la sinagoga del Transito, konsejero i trezorero del rey de Castilla Pedro I, asta ke fue matado por orden del mizmo rey, a kavza de dezavenensias finansiaerias.

Kon kriza o sin eya, la kultura sefardi nunka pudo dezveloparse yenamente, porke la manifestasion de una kultura minoritaria depende de unas kondisiones sosiales de akseptasion de la diferensia, lo ke no existia en la Edad Media. Los sefaradis fueron kapaches, esto si, de dezvelopar nukleos kon un funksionamiento partikular, adientro de las juderias, ma esto era limitado por las kondisiones eksteriores. La publisidad avla oy del “Toledo de las tres kulturas”, kuando la djudia nunka pudo manifestarse de manera avierta ni kompletamente. No konvivieron kulturas, siempre uvo una dominante (la musulmana o la kristiana) ke dava a las otras solamente chikas oportunidades para ekspresarse.

Santa Maria la Blanca Ma esto fue aze muncho tiempo, i el renkor no es bueno. Si miramos bien podremos ver ke Toledo supo mantener i aprovechar su erensia multirelijioza de forma admirable. La trasa kristiana, naturalmente, siendo ke fue la relijion vensedora, ma la musulmana i la djudia tambien fueron rekuperadas i pulidas konvenientemente.

De esta ultima, la trasa djudia, ay tantos detalyos atraktivos ke konsiderar a Toledo la kapital sefaradi no es, en este kavzo, ninguna simplifikasion: Las kayes i las puertas, las ventanas i las reshas, los banyos, las sinagogas, todo en la djuderia de Toledo, mizmo si konserva pokos elemen-tos orijinales, evoka akeyos tiempos en los kualos los sefaradis bivian, lavoravan, diskutian i kreavan en esta sivdad. No es difisil pedrerse en alguna de estas kalejikas i sentir el esprito de tiempos pasados, la majia de akel espasio mitiko del kual salieron las famiyas djudias en 1492, kon la esperansa de tornar algun dia a lo ke konsideravan sus ogar.

*Istoriador, profesor de Siensias Sosiales en Essuni (Universidad Complutense de Madrid).