Diario Judío México - MUESTRO ANIVERSARYO

Baylo mis piezes desnudos …
Kon mi pandero kon pishkules amariyos
Mis fustas boltan boltan kon el ayre
Mis kokas se dezatan en este bayle..

Vazyen el vino, senyores, LEHAYIM !
Las kupas se yennan para YERUSHALAYIM !
Son las horas de alegrarmos ! SM esta en fiesta !
Vinid alavaremos endjuntos muestra lingua !

Oleeeeeeee !

BUEN ANIVERSARIO SM

Es la demanyana
Apenas una klaritad,
No amanesyo dayinda.
Mis ojos yennos de suenyos
Se avren a la lusiditad.

La subkonsiensya i nombres eskondidos
Regresando en la oskuridad,
Kuando me alesho de la realitad,
Dezaparesen, komo inegzistantes,
Komo si apartenesiyan de verdad
A unos mundos sin bruidos rezonantes
I…. Bolan kuando se avren mis ojos
Entre el suenyo i los diyas kargados,
……I una fina boz me yama de leshos.

Esto mas kansada
Mas inkonsiente i mareyada
Del momento ke durmi !….
Kero mas i mas, no me arti…
El esuenyo me se fuyo i m’esperti
Pormodo de esta fina boz ke sinti !

Una boz amiga, yenna de dulsurya,
Komo la de una ija a su madre kerida
Me yama a eya de noche i de diya..
No tiyene horas, ni fiesta ni fin de semana

No le importa si lo puedo o no !
Kere ke le de mi mano
I me asente a su lado !
Ke arrondje i deshe todo
Para estar solo kon eya,

Le de mi karinyo i mi soriza,
Sin pensar a mi vida i en nada,
Aparteneserle totalmente,
Bivir kon eya kontinualmente,
Avriyendole los chorros del tiempo,
Deshar korrer en su guerta i su kamino
Mis mezes, mis anyos, kada momento…

I yo…. Komo una madre en kudyado,
Una namorada adorando su namorado,
O un lavorante lazrando en su echo,
A vezes una amiga, paseyando en el kampo
Yenno de flores kolor de oro i kolorado,
Flores timidas, tremblando en el vento..
Me vo… Detras de una bizba o un pasharo
Los sigo siega, sin kesha i sin penseryo.

La fina boz es la yamada de los amigos,
Los ke mos aman komo keridos ermanos
Mos oyen, i mos dan sus manos
Amigos de SM, el nido de los judyos
Judyos sefaradis i amigos kristyanos
Todos ke avlan la lingua de mis nonos
El Espanyol Sefaradi de los buenos i justos

Akeyos ke sufriyeron i ke eran mis aguelos
Oy eskrivo, konto i kanto por eyos !
Biven en estos kantones kon muestros esfuersos
Estan kon mozotros aki, bendizyendomos….
El Di-o ke mos ayege a estar siempre endjuntos
I fiestar kon alegriya muestros aniversaryos !

LEHAYIM A TODOS !

 

https://groups.yahoo.com/neo/groups/Sefaradimuestro/info