La posta de Portugal uza publikar serias de timbros postales kon temas istorikos akompanyados de un livro kon artikolos ke eksplikan los akontesimientos mostrados en los timbros. A la fin del anyo 2010 fue emetida la seria “Las Judiarias (juderias) de Portugal”, para la kuala eskojeron tres de las 14 juderias ke avia en en este paiz.
La Sinagoga de Tomar Timbro de 0.32 C.
La primera prova sovre la existensia de una komunidad djudia enTomar es la tomba de Rabi Josef de Tomar, 1315, i un dokumento de esta komunidad, de 1384. La juderia se topava en la kaye Rua de Esnoga onde estava la sinagoga, la Rua Direita de Varzea Grande i el merkado djudio, en la Rua de los Arcos.
En los siglos XIV i XV bivian en Tomar entre 250 a 300 almas djudias, entre eyas las famiyas Alegria, Arondian, Barve, Capao, Cassuto, Levi, Nahar, Pinto, Salomoa, Sapaio i Tsevi. La mayoria de los djudios fueron baftizados por la fuersa en 1497, despues de la proklamasion del Edikto de Ekspulsion, en vigor del kual los djudios ke no avian salido de Portugal asta la data fiksada evian konvertirsen, si kerian o no.
La Inkizision fue aktiva en Tomar desde 1543, bushkando i arestando los konversos ke en el sekreto de sus kazas kontinuavan a kumplir los ritos i mandamientos de la relijion djudia. Se save ke munchos de eyos fueron kemados en autos-da-fe, komo Beatrice Goncalves, Jorge Manuel, Caspar Zuzarte i otros mas. En segito a estos kavzos munchas famiyas de orijin djudia fuyeron a Amerika, Holanda i Almanya.
En 1821 la Inkizision fue abolida. En 1992 la sinagoga fue avierta de muevo para los servisios relijiozos de Dia de Kipur.
Rua Nova de Lamego Timbro de 0.57 C.
En Lamego avia dos sinagogas ke ya no existen mas, ma se save ke uvo ayi djudios ainda en el siglo XIV. Eyos bivian en dos juderias: la una al lado del kastiyo Santa Maria de Almaceve, i la otra en la kaye Rua Nova i la Praça de Comercio.
En estas juderias avia kazas, butikas i atelies de produksion industrial. Lamego fue una de las pokas juderias ande las puertas no se serravan durante la noche.
Djuderia de Castelo de Vide Timbro de 68 C.
La komunidad de Castelo de Vide fue kreada entre los anyos 1441-1490. Ayi se topavan los miembros de las famiyas Amiz, Sarfate, Molfio, Cohen, Negrin i Adida.
La juderia se topava al lado del kastiyo. Los nombres de las kayes eran Rua de la Judairia, de Conte do Mestre Jorge, i mas. A la entrada de las kazas ainda se pueden ver las trasas del lugar onde estava la mezuza.
Arkeologos deskuvrieron el mikve, para el banyo ritual, i la kaza del haham. Esta juderia tenia puertas ke eran serradas a la tadre.
La Inkizision kondano en Castelo de Vide, entre otros, a Alfonso Fernandez, Manuel Rodriguez i Duarte Alvares.
Durante una vijita espesial en Castelo de Vide, en el 17 de Marso 1989, el Prezidente de Portugal, Mario Soares, demando pardon a nombre de Portugal, por el mal ke fue echo a los djudios.
Agada de Barcelona Timbro de Bloko de 2.50 C.
Este timbro esta en un bloko kon la reproduksion de una de las pajinas de la Agada de Barcelona, del siglo XIV, ke se topa agora en la Biblioteka Britanika en Londra.
Artículos Relacionados: