Fue antes unos diez anyos ke konosi FOCHA (Phocaea), el nombre de lakuala proviene de los fokes ke biven en las kuevas de esta rejyon. Focha se topa en los bodres de la Mar Agea a unos 70 Km. al Norte de Izmir. Es un chiko i ermozo puevlo de peshkadores ande la gente del payis aman ir los enveranos para gozar de la natura i de la mar maraviyoza, nadar en las aguas klaras i tansparantes de sus entornos….
Antes biviyan solo en Focha unos 23.000 Gregos. Oy no kedaron mas… Avlo de los tiempos ande los gregos biviyan en las provinsyas de la kosta del Ouest de Turkiya, el Emporyo Otomano en akeyos diyas… Uvyeron progromos desgrasyados kontra los minoritaryos i espesyalmente kontra los gregos a los empesijos de la Primera Guerra Mundial. Estos fuyeron o fueron forsados a partir i deshar sus bienes para pueder arresivir i dar a los imigrantes Otomanos muzulmanos ke yegavan por miles de los Balkanes. El Emperyo Otomano aviya perdido estos territoryos dospues de las guerras en los Balkanes. Oy en diya se pueden ver las ermozas kazas de akeyos tiempos deshados por los Gregos Otomanos…
Focha ke era un puerto importante en la Edad Medya, aziya partido del Emperyo Byzantino. La aviyan alkilado a los Genovezes para ke ekspluaten sus rikas minas de alum ke se uzava en la fabrikasyon de los tekstiles.. Estos guadraron el kontrol de la rejyon mizmo dospues de la konkista Otomana pormodo del akuerdo datando de 1275 ke teniyan kon Byzance. Otras konsesyones echas por los Byzantinos era de darles las izlas de Lesbos, Imbros, Samos, Lemnos i Thasos i la sivdad Aenos (Enez de oy) komo dota para el kazamiento de Maria, la ermana del emperador Byzantino Palaiologos kon el Genoveze de la familya Gattilusio.
Yo me namori de Focha al primer momento ke la vide ! La vista del golfo de ariva, kuando se yega de las montanyas ke la enkuadran komo una joya presyoza, es una fiesta para los ojos. Sus miles de kolores se ven de los muy leshos. Son las kolores de las barkas, de las guertas yennas de flores, de las kazas, de los magazenes ke venden todo modo de objektos de arte i artizanales. En las alturas se goliyan el tomillo, los pinos i la adelfa. Al bodre de la kaye las payizanas vendiyan bokales de azeyte de oliva, olivas ke son el produkto el mas relevante de esta provinsya, miel, variyos dulses i enkurtidos (pickles), frutas i verduras de sus guertas, gueyvos freskos, panes, kezos i manteka tambien. Me demanderiyan “ke es el Ganeden ?” i les responderiya “Es sin duda Focha !”
Kije i topi un chiko hotel, mas kaza ke hotel, en el sentro mizmo, en medyo del merkado debasho de las solombras de los arvoles, kon restaurantes de 4-5 mezas, el orno, magazenes ke venden vistimyenta i kalsados, produktos artizanales i todo lo ke se puede tener de menester en el lugar mizmo o yevarse a kaza, a la sivdad….
Se sintiya la vida, el diya i las tadradas ke pasavan kon keyf (gozo). Todos eran amigos, tomavan un kafe o un te delantre de las kazas o en sus guertas o mizmo en el merkado en los konfortavles sofas en la kaye mizmo….para arepozarse un poko ! En este lugar no se puede murir la persona. No es posivle ! La vida bate tanto fuerte ke no ay tiempo de sintirse hazino o deprimido…. El tiempo pasa muncho mas rapido i ni entendi komo esto es posivle ! La verdad es ke la kaye aze partido de la kaza para los chikos komo para los grandes ! No kale olvidarse ke es un sityo para las vakansas i la gente vienen para arepozarsen, pasar un buen tiempo, olvidarsen de las responsabilidades de la sivdad, nadar lo mas posivle, kaminar los sityos vizinos, durmir kuande se kere i kuanto se kere ets…
La noche es un mundo diferente… Todos se visten ermozo, salen a kaminar kon sus maridos o sus namoradas, se ven grupos de mansevos ke riyen i baylan en las kayes porke de kada lugar se oye una muzika ke no desha reflo o una melodiya romantika ke gusta a todos. Kuaji ke no ay personas ke se asentan en frente de sus televizyon ! A lo mas oyeran las novitades del bar o del restaurante ande se asentan para komer, para un ice-cream, para un aperitivo…
En los mizmos lugares vienen para ver un match de football i los veygo a todos saltando o fuego i flama asigun el match les da plazer o se inyervan !
De diya lo mas de las personas partisipan a los toures de los grandes barkos ke salen a las 10-10.30 h. de la manyana para tornar a las 6h. Se kome pishkado, salata i fruta en el barko mizmo. Se van a las plajas, a las rokas, a las kuevas, a las chikas izlas i por seguro ke se banyan en kada lugar. Es muy divertido porke, otra vez, todos se sienten amigos de siempre…. ! Ay kompetisyones, juegos, hora de kontar kuentizikos, baylar mizmo…. Un enkanto para todos a ken no gusta la soledad ! Por seguro ke ay siempre la posibilitad de aferrar un buen livro i ir a espandirse a la solombra de un arvole o asentarse en una chaise-longue para meldar kon keyf i kedar durmido kon el ayriziko fresko leshos del sol…
Una vez a la semana trayen el grande merkado ke, para mi, la vista de todo lo
fresko i todo lo ermozo ke se vende es reelamente una kaverna de Alibaba. Me tresalgo de ansina de merkados lokales ke no tienen dinguna asemejansa kon los super merkados a loskualos somos auzados. Se venden en estos todo modo de komidas ke se guizan aya mizmo i son muy savrozas. Se topan siempre mansevos ke estan prontos a ayudar los ke se kargan de sus kompras i los akompanyan fina sus kazas kontra un tip.
Un largo kamino al bodre de la mar es el paseo de Focha. Es aya ke se topan los mas luksuozos restaurantes, bares, clubs, diskos ke se inchen las noches. La disparisyon del sol de kolor del kovre komo si se hundriya a la mar es un spektakulo sin igual i todos se asentan al bodre del mar para no peryer de ver las kolores ekstraordinaryos del sielo ke troka de un instante al otro kada momento mas aleskuro, mas misteryozo i mas fasinante….
FOCHA AL AMENESER
Sus ojas son komo mantas a sus frutas vedres dayinda.
Igos muevos nasidos…
FOCHA AL AMANESER
Sinko de la manyana…El diya esta amanesyendo
Leshos al horizonte veygo el sielo korolado
Esta todo kalmo, ni un ayre ni un bruido
Focha entre las kolinas milenarias esta durmiyendo..
Al lado del otel, serka, una pared no muy alta
Echa de grandes piedras brutas, entera blanka
Apartando la guerta, tan ermoza en el silensyo,
Del kamino polveyado, dezierto i muy estrecho
Veygo el sol komo un grande disko de kovre ke briya
Focha se abraza, sus ventanas son espejos en flama
Un largo bezo es el abraso del blu kon el vedre agora
Banyandosen en la kolor del amor del sielo kon la tierra
Un grande arvelo de igos kuvija de su solombra
La kuna de kuedras de un chiko o de una chika
Sus ojas son komo mantas a sus frutas vedres dayinda
Igos, muevos nasidos, i pasharikos alavando la manyana.
Veygo barkos de todas las kolores, de todos los nombres
Barkos de peshkadores, barkos para ir leshos en vezes
Estos durmen i kunan los gatos espandidos en los redes
Ke sonyan de pishkados ke vana rovar para sus bebes
Del orno viene la golor del pan de trigo i de la pita
Es la unika chimeneya testiga de una lumbre asyendida
Ya salyeron los chopchis,los hombres ke barren la kaleja
Los perros se espiyertaron, uno me mira i demanda komida
Si ! Es el momento d’echarme a los brasos de la mar friya
Respiro la savor de las montanyas, del limon i de la menta
Agora es el tiempo de nadar i sintir la agua ke karesa
Djugar kon las ondas, saltar i mas en FOCHA la maraviyoza
SEFARADIMUESTRO
Artículos Relacionados: