Esto vyendo ke munchas personas tienen el mizmo karinyo ! El karinyo de las frutas ” de otra vez ” !
A dizir la verdad, yo no se mas lo ke estamos komyendo ! Merko serezas, fragulas, sheftelis(peach), kayisis (abricots) ! ” i te azen el ojiko 🙂 Mintira ! |Una grande mintira i no vos kreyesh !
Todos estos tienen la savor agreyada de las primeras avramilas ! Son duros i sin savor ! Me parese ke el ke los “kreo”, kon los “hormones” ke les dyo, penso a los ke tienen el diabetis ! Se olvido de meter a la “supa de hormones” la asukar ke da savor a las frutas ! A pensar ke estas frutas s’engrandesyeron arriento de kutis (boxes) i nunka vyeron el sol, la karika merikiyoza del ke los engrandesyo en su guerta o en su kampo ! No tienen amor ! No….no tienen la golor ke tenian “otra vez”…
Yo saviya kuando mi madre merkava fragulas o sheftelis (peaches) kuando entrava en kaza de la golor maraviyoza …. Lo mizmo por las domatas….. A las povretikas de las domatas tambien les kitaron la savor, la golor i la blandeza…. Son duras ! Ermozas ! Ariyento enblankesidas ! Asemejan a las domatas ma es mentira ! No son ! Son djugetikos de plastik i mozotros jugamoz a kreyer ke son domatas… sheftelis….. serezas ….. ke pekado….ayyyy ke pekado !
En istanbul agora la kolor de los merkados esta una lokura ! La persona se tresale de ver la ermozura de las frutas ke le da ganas de merkar… i ke diziluzyon kuando las gosta !
Si…. Ya tenemos de todo ! no mos manka kiwi, banana Chikita, mansana ingleza, peras de todos los payizes, domates mansevas kon fostanes de novya…. Todo lo ke keresh ! Ke mundo ! Estamos bivyendo kon el espanto ke no va aver agua para darles, afilu a estas frutas jugetes ! Ke mundo estamos deshando a las almikas ke van a kreser i mas negro, ke van a vinir al mundo !
Porke esto tan pesimista, tan amarga oy ? Deve de ser pormodo de las serezas de ayer i eran las mas karas del merkado !
Ke nunka vos manke la savor de boka…
[email protected]
Artículos Relacionados: