Diario Judío México - Keridos amigos i mis amigitas, oy kije kompartir kon vozotros los rekuerdos de mi chikes, en los anyos 1950, i komo se biviya en estos anyos tan leshanos para los mansevos de oy i tan serkas para mi kuando serro mis ojos..

Papi i yo en 1950, Taksim Istanbul

Me akodro por egzemplo del sutchi (letero) ke viniya kada diya kon kalderikas estrechas, largas i silindrikas (de un kuarto de litro o medyo o un litro kada una) i vendiya una leche muncho mas pura ke la de oy. Me akodro ke el “kaymak”, la krema, dospues ke la buyivan era godro godro i me la komiya yo kon
asukar o miel. (ah mi madre la mas dulse del mundo ! Nunka penso ke estos son kozas ke matan o a lo manko enfeyesen kon gudrura las mas ermozas !)

El fregado ! Me namorava yo estar al lado de la persona ke fregava. El shavon vedre del fregado teniya una golor de limpiyeza i dava muncha spuma kon la kuala aziya balones bastante grandes ! Otra koza era la arena i el algodon de metal kon la kuala se fregava los tendjeres (las kalderas) i kaliya ke esten briyando komo el sol.

Los tendjeres (kalderas) de kovre se davan al “kalay” (estanyo-etain) ke kada kuanto tiempo sonava a la puerta para tomarlos i briyarlos. Sino mos puediyamos entosegar del kovre. Mo los tornava dospues de 2 o 3 diyas, o el mizmo diya si no eran munchos.

No va pueder no mensyonar los mantelikos ke se uzavan en el mupak (la kozina) ensima de los “rafes” (etageres), las prostelas (tabliers) unas mas ermozas de las otras i los tenedores para kitar de la lumbre los tendjeres muy kayentes…

Ke broderias fantastikas !…Las kolores eran bivas ! El vedre, el amariyo, el korolado i la kolor de la berendjena para brodar las berendjenas eran las mas uzadas… Para el mupak se brodavan dantelas, figuras de frutas i zarzavat (legumes) i las kozas ke se topavan en el mupak; komo bokales, tendjeres, un gizandero kon su chapeyo blanko, kucharas i piron ets….

La novya se trayiya en su ashugar afilu kanyamazos (torchons) brodados (yo tenia !) para enshugar el fregado. Era verguensa (los vizinos oy oy oy !) de deshar el fregado sin alevantarlo a su lugar !

Me akodro ke mi madre aziya tezpishti en Pesah….Un dulse kon muez i arina de matsa.. El dulse (asukar agua i limon buyido) se echava dospues ke saliya del orno de la kuzina ke se asyendiya kon lenyos !

Eskrivere mas i mas kada vez ke me akodro de estos tiempos…..

Sharope blanco

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.