Goa es una sivdad i un distrikto en la kosta Oeste de la India. Fue una kolonia del Portugal entre los anyos 1510 i 1961. En las primeras dekadas del siglo XVI, se aresentaron ayi munchos kristianos muevos del Portugal ke se enfrentaron kon la opozision de los dirijentes portugezes, molestados por sus influensa, sus solidaridad en la vida ekonomika i, sus aderensia al Djudaismo. Esta deskontentes provoko el establisimiento en 1560 de la Inkizision en Goa. Munchos muevos kristianos fueron persekutidos i entre eyos, el sientisto Garcia da Orta ke fue djuzgado i kondanado despues de su muerte.
La Biografia
Tembro postal komemorativo.Garcia da Orta nasio probablamente en 1501, en Castelo de Vide, Portugal. Sus djenitores eran djudios espanyoles de Valencia de Alcantara, ke se avian refujiado en Portugal, en segito al dekreto de ekspulsion en 1492. Da Orta estudio la medisina, los artes i la filozofia en las Universidades de Alcala de Henares i de Salamanca, en Espanya. Despues de ser graduado, en 1523 abolto a Portugal. Pratiko la medisina, en primero en la sivdad ande nasio i del anyo 1526 en Lisbon, ande en 1530 fue nominado profesor en la universidad i en segito, miembro de su senato.
En este periodo el se interesa en los raportos de los viajadores. El mundo viejo le parese chiko i limitado, i el aspira a konoser de serka las tierras, vejetasiones i puevlos muevos ke son raportados.
De otra parte, los muevos kristianos kontinuan a ser persekutidos, i en 1536, la Inkizision es ofisialmente establisida en Portugal. Garcia da Orta i su famiya, aun ke ofisialmente avian adoptado la relijion kristiana, estavan kontinuando a observar en sekreto la Ley djudia.
Posiblamente, por espanto de la Inkizision, i para pueder evitar la interdiksion de emigrasion dirijida kontra los muevos kristianos, en 1534 el navigo a la India en tanto ke Mediko en Kapo de la flota del Viserey Martim Afonso de Sousa, partisipo a sus diferentes viajes, i en 1538 se aresento en Goa, kapitala del Estado de India.
En estos tiempos Goa era una sivdad prospera i un sentro komersial aktivo, atirando merkaderes no solo de Portugal i de Espanya, ma i de Italia, Gresia, Persia i Asia tambien. Da Orta fue el mediko de la nobleza indiana lokala, i en mizmo tiempo de los Visereyes i governadores portugezes suksesivos de Goa; uno de estos le akordo la propriedad de la Izla de Bombay.
Edision ulteriora de la ovra de Garcia da Orta. Burgos: Martin de Victoria, 1578Su okupasion lo yevo a konoser munchas kostas del Oeste de la India i los merkados de espesias i de piedras presiozas, i le permetio de estableser kontaktos kon merkaderes i medikos de munchas partes del Sud de Asia i del litoral del Oseano Indiano. En la sima de su kariera, el dezvelopo una pasion por las plantas medisinales de India, lo ke lo yevo a krear guertas botanikas, prinsipalmente en Goa i en Bombay.
Da Orta, aparte del portugez i del kastiliano, avlava el ebreo, el latino, el grego i el arabo; su ovra amostra ke tenia konosimientos de persano, marati, konkani, sanskrito i kannada.
En 1540, se kazo kon Brianda de Solis, una pariente mueva kristiana rika. Aun ke les nasen dos ijas, al pareser este no fue un kazamiento alegre. En 1549, su madre i dos de sus ermanas, ke avian sido enkarseladas en Lisbon, parvienen a topar refujio en Goa i se adjuntan a el.
Los ultimos anyos de su vida son yenos de sufriensas por da Orta ke deve konfrontar apretos finansieros i litigas familiales. Muere en 1568 de una malatia grave.
La Ovra
Asigun lo tiene dicho el mizmo, Garcia da Orta fue fasinado por “todas las kozas i puevlos de la India”. Su konosensia eksepsionala de las espesias del Este es revelada en su unika ovra, Colóquios dos simples e drogas he cousas medicinais da Índia (Dialogo sovre plantas, drogas i substansias medisinalas de la India), publikada en Goa en 1563. La ovra eskrita en portugez, trata de una seria de materias, ke lo mas no eran konosidas o eran objektos de konfuzion i de mizinformasion, en akeyos tiempos en Evropa.
Da Orta deskrivio las malatias tropikalas de la Asia, partikularmente la kolera. La otopsia ke izo sovre una viktima de esta malatia, es el primer examen de esta sorte ke fue enrejistrado en India. De mizmo, su ovra se remarka por su kontenido, independiente de los tekstos gregos, latinos i arabos, reverados en este periodo. Kon la aparision de sus traduksiones al latino – la lingua franka de la sensia en akeyos tiempos – i a otras linguas, Colóquios fue konosida despues de un kurto tiempo en toda la Evropa. Aparte de ser konsiderado entanto ke “el primer eskritor evropeo sovre la medisina tropikala” da Orta es konsiderado tambien komo “un pioniero de la farmakolojia”.
Colóquios es redaktada en forma de un dialogo entre su otor i un mediko, yamado Ruano. Da Orta responde a munchas demandas de su amigo, en dezvelopando sus komentarios personales, revizando no solo las plantas medisinales, ma en mizmo tiempo munchos produktos de la India komo el marfil, lakas i diamantes i tambien, sigun lo adjusta, “munchas kozas, ke son mas poko de la medisina ke de la istoria, ma ke meresen lo mas de ser konosidas”.
Aparte de la deskripsion de las malatias tropikales, la ovra prezenta 45 plantas medisinales, inkluyendo sus klasifikasion, sus deskripsion botanika kon los kriterios de sus identifikasion, i a la fin, el kapitolo mas importante, “sus uzo en la medisina i sus efetos terapeutikos”.
Una otra partikularidad de la ovra es ke inkluye los primeros versos publikados de su amigo Luís de Camões, konsiderado en muestros dias komo el poeta nasional de Portugal.
La salvasion del olvido
Es kuaji siguro ke la ovra de Garcia iva kayer en el olvido, si por un orozo azardo, no era deskuvierta por el ilustro botanisto fransez, Charles de Lecluse, konosido komo Carolus Clusius o, en kurto – Clusius. Es en 1564 ke, durante un viaje en Portugal, Clusius topa uno de sus exemplarios, en un albergo ande mora. Konsiente de su valor sientifika, la treslada al latino en forma de un rezumido en lugar de su forma orijinala de dialogo. Clusius publika sinko edisiones de la ovra, la primera en 1567 i la ultima en 1605. Aparesen de mizmo, sus traduksiones al italiano i al fransez.
La Inkizision en Goa
Muy probablamente, la inseguridad relijioza i politika de los djudios en Portugal determino la desizion de da Orta de abandonar este paiz, i kontribuyo ansi a su fasinasion por el paradizo de Goa, ma, la Inkizision lo estava asperando ayi tambien.
Es en 1560 ke un tribunal de la Inkizision fue establisido en Goa por el Viserey de India. En konsekuensia, empeso la persekusion de los djudios sekretos, indues i muevos kristianos. La Inkizision en Goa turo 252 anios, de 1560 a 1812, i fueron kemados en autos da fe mas de 39.000 almas – non solo muevos kristianos, ma i goanos tambien ke se avian konvertido al katolisizmo.
Inkizision en GoaMunchos de la famiya de Garcia da Orta fueron i eyos viktimas de la Inkizision. No solo en Goa, ma i en Portugal tambien. Todo kon esto, Garcia muere de hazinura. Su ermana Catarina, ke avia reushido a fuyir de la Inkizision en Portugal i se avia refujiado en Goa, es arestada por erezia en el anyo de la muerte de da Orta, i kemada biva en la plasa del merkado en 1569.
Garcia do Orta fue konsiderado entanto ke kristiano todo tiempo ke estuvo en vida. Portanto, los Aktos de la Inkizision, publikados en 1934, revelan klaramente ke fue un konverso militante, ke avia bivido una vida relijioza doble a lo largo de sus 30 anyos en Goa.
Asigun la konfesion de su kunyado, Garcia da Orta uzava afirmar en privado ke “la Ley de Moshe es la verdadera Ley”, lo ke konfirma ke da Orta, kon los otros miembros de su famiya, kedaron fideles al Djudaizmo.
12 anyos despues de su muerte, en 1580, da Orta fue kondanado a titolo postumo por aver observado la Ley djudia. Sus restos fueron kitados de su tomba i kemados en auto da fé, i sus sinizas fueron echadas al Oseano.
* * *
Su ovra, eskrita en portugez, Colóquios dos simples e drogas he cousas medicinais da Índia, avia sido aprobada por la Inkizision i rekomendada por el mediko ofisial del Viserey de Goa. Fue aklamada komo uno de los prinsipales logros del siglo XVI, una realizasion ke otorgo una grande onor al paiz de su otor, Portugal.
Artículos Relacionados: