Andalusia, Asturia, Aragon
Katalunya, Kastilya i Leon…
Oygo sus gritos en mi korason
Tierras ke reklaman Yehuda i Shimon….
Mis tierras en la dulse Sefarad
Muestras kazas derrokadas sin piadad
Sus ventanas oskuras i serradas
Las guertas ande se engrandesen espinas…
Toko mis rekuerdos, leshos en mi chikes
Veygo mi nonika asentada, yo esto en pies
Del brazero saltan senteyas, se tostan los panes
Los komemos kon manteka, uvas sekas i muezes.
Dospues…. Dospues sus ojos se mojan
Tiene ojos de mar… Una dolor…i sus ojos yoran
Kuando me konta ke grandes barkos mos yevan
Pasamos diyas en mar, fina ke en un puerto mos deshan.
Dospues… Dospues me konta mas : Sefarad aparese
Ke splendido payis….Sus flores, su sielo, aya una fuente…
Sus palasyos, los muros i el kastilyo arriva, en el monte
El viejo simetaryo judyo, la chika sinagoga en el Este.
Muestros bisaguelos antes mas de kinyentos anyos
Desharon atras sus bienes, sus lavoros i sus keridos
No kijyendo inyegar la Ley i sus santos Estudyos
Refuzaron la Kruz, otras kreensyas i ser Christianos.
Los konversos fueron dezgrasyadamente kastigados
Los ke fueron baptizados ma guadraron sus uzos
Fueron arastados, juzgados i kemados bivos…
La inkizisyon firyo i los Judyos fueron egzilados…
Mi nonika kontava lo ke saviya de su aguela
En la dulse lingua de Sefarad tan leshana….
Kantava komo las madres kantavan en Granada
Baylava komo las novyas baylavan en Sevilla.
Sefaradimuestro Kon Sharopeblanco
Oy, yo tengo los anyos de mi nonika
Konto a miles i a miles mi amor por la Espanya…
Eskrivo historyas i poeziyas en mi lingua
“Sefaradimuestro” illumina, briya komo una estreya.
“LOS MUESTROS” i sefarad.org
serraron sus puertas dospues de la
muerte del kerido “padre”..
I.S.E. – Institut Sepharade Europeen – E.S.I.
“Sefarad org.” es su muy amada ermanika
El tiempo bola i la vida es muy kurta
Ventisinko anyos pasaron des del primer diya !
Ventisinko anyos de lavoro, ventisinko anyos de glorya…
Biva “e.sefarad” dedikado al Sefaradizmo !
Una ermozura, la alma de Lilika i Marcelo
Bivan munchos anyos i konten munchos kumpleanyos
Munchas grasyas por el esfuerso i grandes applozos !
Grasyas al ekipo maraviyozo del “Diariojudyo”
Por kitar kada diya un jurnal tan riko i ermozo
Honorando el Yiddish, el Judeo Espanyol i seguro
La lingua de la Peninsula i el Espanyol Meksikano.
La primera koza ke ago dospues ke salto de mi kama
Es korer i ver kual eskrito miyo salyo en la gazetta !
Ke plazer tengo si veygo una artikolo o una poeziya
No importa en Fransez, en Inglez o en mi lingua…
Keridos, no somos mas ke un punyado…
El Holokausto mos korto las alas i el reflo…
Kon todo lo ke pasimos i el duro destino
Devemos aunarmos, sostenermos i siguir adelantando……
Sharope Blanco
[email protected]
Artículos Relacionados: