Diario Judío México - Z”L  

Tres anyos pasaron !  Kuando pasaron, komo pasaron ?   A mi edad todo pasa tan presto ke no se mas en ke diya, en ke maz estamos !!! Un fenomeno de la vejes ! I povreta de mi, siguo pensando ke tengo 12 anyos, i a vezes 150 !…

Era en verano 2017… Komo ayer me akodro ke me alevanti una demanyana entera sudando, kon un apretamiento en el korason, komo si una negra koza estava para afitar…. Akel diya me ambezi ke se muryo uno de los maestros de la poeziya Sefaradi.  El patriarko, el grande maestro amado i estimado por todos, , de bendicha memorya, ke los lektores del Diariojudyo konosen bien de sus poeziyas sovre sus amores lo mas i sus relasyones sosyalas…. Akel diya yori, yori por Vitali ke bolo al Ganeden i mos desho la buena vida….

Tuvo un vida larga i ermoza en las mijores epokas del mundo entero, konosyo guerras i paz, rikezas, tuvo una famiya maraviyoza kon la mujer ke tanto amo i dos ijos mijorado de todos !  Tuvo inyetos de loskualas asistyo a las bodas,  eskrivyo enfin su poemeryo ke le dyo la mas grande satisfaksyon en la vida.

Por sierto ke teniya talento i era un grande filantropisto.


El autor de UN RAMO DE POEMAS

Me akodro dayinda de su  «palasyo»  en el mijor sityo de Istanbul, el i su mujer tan modestos entre los objetos d’arte i de grande valor.   Sus manera impekable de arresivir sus invitados, las memoryas tan interesantes de sus viajes I sus vida en sus kazas del Canada i de Florida los invyernos.

Me aviya amostrado todo lo ke eskrivyo en solitreo ke utliziva komo stenografiya !

Se aviya namorado de mis poeziyas en Fransez i todas las otras…. Me tratava de grande maestra i yo riiya de su ayre seryozo i sinsero !  Me  metiya a ensenyarle un poko komo puediya uzar su komputadora… Janet tambien oyiya mis eksplikasyones para akodrarle estos mas tadre.  No…. No teniya dinguna dispozisyon para la teknolojiya… Le viniya difisil porke su miente rechesava otomatikamente lo ke no se aviya ambezado en su manseves….

Vitali era namorado del Amor, de la Buendad, de su familya i de las poeziyas… Puediya pasar oras i oras a kompozar sus versos malgrado los batires de su mujer ke preferava pasar el tiempo kon el…. Eran muy attados el uno al otro.

Me telefonava muncho i avlavamos kon Janet tambien. Me kontava lo ke pensava, me demandava komo kompozar mijor i kualo eran mis impresyones sovre sus poeziyas…

Me diziya ke avlavamos la mizma lingua malgrado ke su stilo era muy diferente del miyo.   Se tresaliya kuando uno alavava su ovra, lo ke entyendo perfektamente !

El sekreto de la larga vida de Vitali , fina sus 98  anyos, era  «kaminar»…   Muncho i kada diya kon su espoza Janet…  Komer poko i tener siempre una buena humor, lo mas,  topar la felisitad en el amor.  Era un grande amorozo komo lo puedemos remarkar en sus poeziyas…

Era un perfekto «gentleman»  siempre kon una flor a la botoniera de la jaketa de su kostum.  Kon su avla tan dulse i una politessa remarkavle para todos.

Era mi buen amigo… EL ke estimava muncho… Uno de los muy raros poetos de muestra lingua.

Un Monsieur komo los ke konosi munchos anyos antes,  kuando Istanbul era una de las sivdades las mas sivilizadas, las mas elegantes, las mas kozmopolitanas del mundo… Ande era ermozo bivir, ande se respirava el arte, el komersyo, la savyedura, la meskla del Oriente i del Oksidente…

No te olvidaremos Vitali, maestro Sadacca, maestro amado i muy estimado poeto, uno de las perlas ke tuvimos en SEFARADIMUESTRO

Mis kondoleansyas a Janet, a su familya i a todos ke peryeron en el   «un kerido…»

Arepozate en Paz…. En la Luz i en la Ermozura de las Guertas de la Eternidad…

PS..   Por seguro ke tus versos seran meldados en muestros kantones de vezes en kuando komo siempre me lo demandates…. Sera una honor i un grande plazer para moz .

[email protected]

DEKLARASYON DE UN OMBRE TIMIDO

TE DEZEYI, TU ME DATES EL AMOR DE MI VIDA

KREYEME TE ADORO !

TE   aviya enkontrado en akel dia de friyo,

DEZEYI   ver la kayida de la inyeve al riyo.

TU   estavas en su bodre kon sonrisa luminoza,

ME DATES   un plazer vyendo tu kaminada ermoza.

EL   sujeto de  mis poesias dezeates saver.

AMOR,  humanismo, feridas, sikatrizes deven ser.

DE   kada linya si los primeros biervos alevantas

MI  sentido kreyo ke salira a luz i te enkantas.

VIDA   pasajera…bive aryento los amorozos

KREYEME  , seras la mujer alegre,yena de gozos.

TE   konsejo a ke siempre sonriyes a los espejos

ADORO  las personas ke son keridas de los vyejos.


Montreal

 

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


Artículo anteriorCapitolio a Pompeo: La Corte Penal Internacional no tiene jurisdicción sobre los territorios
Artículo siguiente¿Por qué se da la violencia de género contra hombres o mujeres? Denise Meade, psicóloga y psicoterapeuta
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.