Los judios de Fransa estan an peligro, esto no es koza mueva ya se saviya de muncho tiempo… ma ya empesaron a avrir sus meoyos, i munchos estan pensando a emigrar a Israel o ya estan emigrando i es en sus payis ke van a prosperar !
Estan merkando kazas en Israel. Las sivdades las mas amables a estos judios son Natanya, Bat-Yam i Rishon Lezion.
Ya se save ke no es fasil de deshar la gola i empesar todo de muevo, ma esto es la solusyon.
Joseph Negrin
———————————-
Me kerido amigo,
Sarcelles es konosida komo la “chika Yerushalayim” de la komunitad Judiya Sefaradi…. A unos 14 kilometros al Norte de Paris, sus anchas avenidas, sus kafes son las scenas de las violensyas etnikas i antisemitas de los emigrantes ke yegaron del Norte de Afrika i del Karibo. En la foto vemos sus manifestasyones kontra Israel ke kavzo la muerte de los salvajes de Gaza kijyendo entrar en Yerushalayim….. Sus odyo dava espanto ! Una sinagoga i el patron de un merkado fueron atakados en gritando “Muerte a los Judos ” “Kortaremos el garon de los Judos” “Hitler teniya razon”. Un injenior Judyo ke bive des de 49 anyos en esta komunitad disho al “Sunday Times” ke lo ke vido le akodro las violensyas de 1938 !!!
Es inkreyivle ! Fransia vendida a los Arabos… La van a azer sal i siniza !
Van a dizir ke sus skulturas i sus pinturas son idolatriya i van a derrokar todo !
Sus eglisyas seran ermozas meskitas ande se va darshar el odyo a la humanitad komo lo azen agora en las kayes ! Lo merese… Lo meresen ! El Di-o es Grande.
Tienes muncha razon porke esta es la unika solusyon para muestros ermanos de Fransia… Ke salgan de aya antes de peryer miembros de sus famiyas kon los salvajes ke los atakan en todos los lugares i ande no tienen proteksyon de la polisiya i del govierno !
Natanya Rishon Lezion
Batyam La mueva riviera de Israel…. Batyam
Ke lo bueno miyo de Natanya, Bat-Yam i Rishon Lesion ! Ke manko tienen de ande moran agora, dime ! Muncho mas ermozo i fasil de bivir en estas sivdades luksuozas, allado de las mas ermozas plajas ke egzisten en el mundo, kon todo justo i nada manko !
No es fasil de deshar la gola para vinir a lo mijor ? Ya vide sus kazas ! Aleskuro i viejo i chikitiko lo mas del tiempo… Ande estan muestras kazas yennas de luz, briyando i konfortavles… Tienen mazal ! A lo manko salir a la kaya kon la frente alta i sin espanto ! Saver ke los mansevos seran entre sus amigos i ke vayan ke se namoren de ken keren !!! Respirar la libertad… Por fin ! Gozar del Shabat i fiestar komo benadam en muestro payis ! Kon vizinos judyos i merkados judyos … Ah no saven ke dulse es de bivir en Israel, kon kriza, sin kriza, kon problemes i malas horas a vezes ma kon una alegriya en el korason ke no se puede ni deskrivir !
Les suheto muncho mazal i horozos ke se sientan… Ke vengan kon berahot i sorizas a las tierras de sus Padres…. Ande engrandeseran sus chikos i enterraran sus aguelos…..
Sharope Blanco
[email protected]
Artículos Relacionados: