Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes ke vyene 21 de marso, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko. http://www.radioj.fr
Antes de empesar mi emisyon de oy, komo el alhad pasado eramos en fyesta de Purim, dainda tengo la gana de dizirvos sovre Ester i Purim unas kozikas ke no tuve el tyempo de dizirvos el djueves pasado, ande vos meldi un pedasiko del Meam Loez en atadijo kon el taanit Esther.
Primera koza: Dinguno puediya ir ande la reyna, i por esto Ester teniya menester de su sinklavo Hatak para avlar kon Mordehay. Ama la megila despues no avla mas de Hatak, i el Meam Loez, komo vos dishe, mos dize ke Aman mato a Hatak i fueron dos malahim ke tomaron el lugar de Hatak, ke en vedra era el profeta Daniel. Si el Meam Loez mos dize esto, deve ser porke esto se topa en mos midrashim. Ama una koza ke no meldi en el Meam Loez es: komo izyeron los dos malahim para entrar ande la reyna sin ser vistos? Solo sus sinklavos puediyan entrar ande la reyna. Mi repuesta podriya ser ke, syendo angeles, puediyan tomar la forma ke keriyan, i mismo azerse invizivles.
Sigunda koza: Kale ke sepash ke, despues de mi emisyon del djueves pasado, avli kon mi inyetiziko Lior (ke tuvo 10 anyos ayer myerkoles) del tanit de tres diyas i noches ke izo Ester i ke enkomendo ke agan todos los djudyos, el kual tanit kaiya djusto en tyempo de Pesah. Yo pensava ambezarselo, ama tuve la sorpreza de oir mi inyetiziko responderme: “si, ya lo sé”. Estonses me akodri ke se va en una eskola djudiya. I mi inyetiziko adjunto: “Ama los djudyos izyeron tanit un diya solo, afillu lo ke les demando Ester”.
Esto yo no me teniya ambezado, ama me akodri ke una persona puede kedarse sin komer munchos diyas, ama tres diyas sin bever es solo posivle para djente sana i fuerte, sino se muere. Halbuki, Ester demando a todos de azer tanit, afillu los vyejos, los hazinos i las kriaturas, ke no puedriyan sovrebivir a tres diyas sin bever.
En el teksto del Meam Loez, un poko mas leshos, topi esto : “I ay ken dize ke dito tres diyas era lunes i djueves i lunes”, lo ke dariya por parte razon a mi Lioriko: syerto los djudyos izyeron tanit tres diyas, ama no tres diyas en sirà – a la rovez de Ester, ke, sana i rezya, pudo soportar sin morir un tanit de tres diyas en sirà.
Sin morir, syerto…ama en lo ke meldan los katolikos en el Livro de Ester ay pedasos venidos del grego ke no se topan en la megila en lashon ke meldan los djudyos, i en uno de estos pedasos se dize ke, kuando Ester se fue a ver el rey, tanto se espanto ke se desmayo. El espanto puede ser, ama un tanit de tres diyas sin komer i sovre todo sin bever ya la teniya asigun mi bastante aflakado para ke se desmaye sin tener menester de espanto!
Tresera koza keriya kontarvos a propozito de Purim. Arresivi de mi amigo Jose Molho una interesante video israelyana akodrandomos ke los diez ijos de Aman fueron degoyados el 13 de Adar, ama Ester rogo al rey ke el diya de despues los mismos diez ijos de Aman sean enforkados, i lo fueron. Ke menester, syendo ke ya eran muertos?
Asigun los hahamim, kuando la megila dize el rey sin adjuntar Ahashverosh, el rey es el Dyo. Es diya de despues kyere dizir el futuro, i no solo para los ijos de Aman.
La repuesta vino en octovre 1946, en el anyo 5707, kuando fueron enforkados los 10 kondenados a muerte de Nuremberg, inkluyendo Julius Streicher ke grito, antes de ser enforkado :”Purim Fest 1946!”
Los nazis enforkados (Ribbentrop, Rosenberg, Streicher, Kaltenbrunner, Frank, Sauckel, Seyss-Inquart, Frick, Keitel, Jodl) fueron diez komo los diez ijos de Aman, afillu si en vedra uvo onze kondenasyones a muerte, ama Goering se mato el mismo unas kuantas oras antes, i por esto los enforkados fueron diez, komo los 10 ijos de Aman. (Hitler i Goebbels ya se aviyan matado antes).
En la lista, en la megila, de los diez ijos enforkados de Aman faltan tres letras ke son taf shin i zayin, ko ke se eskrive tashaz, manera djudiya de yamar el anyo 5707, el anyo del enforkamyento de los 10 nazis.
Esto dicho, agora puedo ayegar al ombre del kualo kyero avlarvos oy, i ke fue Joseph Kessel. No se si es muy konosido afuera de Fransya, ama por siguro aki en Fransya tuvo muncha glorya, ke me parese meresida.
http://www.rts.ch/archives/tv/culture/preface/3467832-joseph-kessel.html
Wikipedia mos deskrive ansina Kessel: “aventurero, gazetero, reporter, avyador, rezistante, romansyero, akademisyano”.
Joseph Elie Kessel nasyo en Argentina el 10 de fevrero 1898, en la sivdadika de Clara ande moravan su padre Samuel Kessel i su madre Raissa nasida Lesk. Samuel Kessel es un mediko djudyo litvak (de Lituaniya azyendo parte del Imperyo russo). Raissa vyene de una famiya djudiya de Orenburg, sivdadika del sur de Russia al bodre del rio Oural.
Samuel Kessel keriya ser mediko, ama en Rusiya tsarista la Universidad era serrada a los djudyos, por esto vino en Fransya en 1880 para ambezarse la medikeriya en la Universidad de Montpellier, i syete anyos despues obtuvo su diploma de doktor, despues de tenerse kazado kon Raissa, venida eya tambyen en Fransya por las mismas razones ke el.
Ama yo penso ke no syendo franses, no teniya el derecho de lavorar komo mediko en Fransya, i ke es por esto ke se fue despues kon su mujer en una koloniya de djudyos. Ya vos avli aki mismo, aze dos anyos de esto, en una emisyon ke ize sovre los djudyos de Argentina, de estas koloniyas djudiyas. Aya en Argentina, komo lo dishe, nasyo el chiko Joseph en 1898.
Poko tyempo despues, no se porke, la famiya Kessel abolta en Orenburg, i aya nase un en 1899 un ermaniko de Joseph, Lazare, ke se matara a 21 anyos despues de tener komo ijo, en 1918, a la edad de 19 anyos, a Maurice Druon, dunke sovrino de Joseph. Se yama Druon porke su padre muryo antes de rekonoserlo, i ke su madre se kazo kon un Druon ke le dyo su nombre.
De Orenburg los Kessel aboltan en Fransya, i de Fransya de muevo aboltan en Orenburg. Komo mos dize Michel Droit en su diskorso en la Akademya franseza, (kuando suksedyo al fotolyo de Joseph Kessel): “A la edad de syete anyos, el futuro grande reporter ya korryo 25.000 kilometros al asyento del globo”.
En Orenburg, el chiko Kessel se va a la eskola kon su ermaniko, i tyene de pelearse kon punyos kontra los ijikos antisemites de su klasa (komo tuve yo mismo de azerlo en Paris en los anyos 1947-48, afillu si eramos despues de la gerra).
Al kavo la famiya Kessel desha Orenburg en 1908, esta vez para nunka mas aboltar. Kessel tyene 10 anyos. La famiya se va morar en Nice. El chiko Kessel se va en las eskolas de Nice, ama el ultimo anyo de estudyos lo aze en Paris, ande obtyene a 16 anyos el bakaloreato. Empesa en la Sorbonne estudyos de literatura. En mismo tyempo djuga komo aktor de teatro kon su ermaniko Lazare.
A 17 anyos entra en la gazeteriya. La gazeta ande lavora es una vyeja gazeta ande lavoro Chateaubriand el mismo. Komo el padre de Joseph resive dainda las gazetas rusas, i ke Joseph entyende el ruso, se topa ser el espesyalista de la Rusiya en la gazeta…
Enfin, en 1916, Kessel tyene 18 anyos, i pishin entra komo veluntaryo (antes no lo puediya por modo de su edad) en la eskadriya dicha 39, komo observador, al lado del pilota. No se lo ke aze, ama deve ser korajozo porke se topa obtener la medaya militar i la kruz de gerra kon palma i estreya.
En 1918 es echo zabit, i embiyado en Siberiya, pasando por el oeste. Deve irse de Brest el 11 de novyembre 1918, diya ke se topa ser el diya del armistisyo. Se va en Amerika (no se komo, ama por siguro kon eskala, syendo ke es solo en 1927, mueve anyos mas tadre, ke Lindberh va azer por la primera vez Amerika-Fransya sin eskala). En la Amerika de 1918 los fransezes son akojidos komo giborim. De Nex Yok se va en California, Hawaï, Japon, enfin Vladivostock en Siberia. Estamos al empesijo de la revolusyon bolshevika.
Para kualo fue embiyado en Siberia, no se. Ama de kada uno de sus viyajes, Kessel va travar la materya de un roman. De la avyasyon va travar el roman L’Equipage en 1923, i antes eskrivyo la Steppe rouge (la steppa kolorada) en 1922, roman inspirado por su viyaje en Siberia. En todo, Kessel va eskrivir unos ochenta romanes, al punto de obtener en 1926, a la edad de 28 anyos, el Gran premyo del roman de la Akademiya Franseza por Les Captifs (los kativos).
Kuando empesa la sigunda gerra mundyala, i ke la Fransya es okupada, Kessel entra en una red de Rezistansya. En 1943, reushe kon su sovrino Maurice Druon, a entrar en Ingletyerra para kombatir komo avyador en las Fuersas Fransezas Liberas. El ke ya teniya la Cruz de gerra de la primera gerra, fue yene dekorado de la Cruz de gerra por la sigunda gerra.
Aya Kessel oye una manseva de orijen rusa komo el, Anna Marly, ke kanta un kante suyo, muzika i palavras en ruso, el kante de los partezanos. Kessel lo topa tan ermozo ke kon su sovrino Druon eskrive un teksto en franses orijinal, ke no es la traduksyon del de Marly en ruso, i va ser el muy famozo Chant des Partisans :
Ami, entends-tu le vol noir des corbeaux sur nos plaines?
Ami, entends-tu les cris sourds du pays qu’on enchaîne?
Ohé, partisans, ouvriers et paysans, c’est l’alarme
Ce soir l’ennemi connaîtra le prix du sang et des larmes
Amigo, oyes el bolo preto de los kuervos sovre muestros yanos?
Amigo, oyes los gritos sodros del pais enkadenado?
Ohe, partezanos, ovreros i kazalinos, es la alarma
Esta tadre el enemigo va konoser el presyo de la sangre i de las lagrimas
Suvid de la mina, abashad de las kolinas, haveres!
Salid de la paja los tufenkes, los kurshumes, las granadas
Ohe, los matadores, kon bala i kuchiyo, matad presto
Ohe, sabotador, az dikat kon tu karga: dinamita
Mozotros semos ke rompemos las puertas de los prezos para muestros ermanos
El odyo detras de nos, i la ambre ke mos empusha, la mizerya.
Ay paizes ande la djente en la dolsor de la kama azen suenyos
Aki, mozotros, lo ves, mozotros kaminamos i mozotros matamos, mozotros morimos
Aki kada uno save lo ke kyere, lo ke aze kuando pasa.
Amigo, si te kaes un amigo sale de lo brusko en tu lugar
Amanyana sangre preta sekara al grande sol sovre las karreteras
Kantad, companyeros, en la noche la Libertad mos eskucha…
Amigo, oyes estos gritos sodros del pais enkadenado?
Amigo oyes el bolo preto de los kuervos sovre muestros yanos?
No se puede ver kon mi povereta de traduksyon, ama en franses ay rimas en medyo de las rimas, apegadas al ritmo militar, lo ke da una fuersa terrivle a este kante, uno de los mas ermozos del siglo vente.
Despues Anna Marly lo va kantar eya misma en franses:
Despues de la gerra Kessel kontinua su lavoro de gazetero, reporter i eskrivano. Tres vezes se va en Erets. La primera vez en los anyos vente, la sigunda vez el 15 de mayo 1948, el diya despues la Independensya. Le dan el primer visa de entrada de la istorya de Israel. Va mirar de serka la gerra de independensya, i va eskrivir en un livro intitolado “Terre d’amour et de feu” (tyerra de amor i de fuego) komo vido, por egzemplo, askeres djudyos venidos de todas partes del mundo, asentados en el mismo kamyon. I mos konta:
“En supito, estos ombres tan diferentes fueron atados, undidos, yevados todos en djuntos por un kante ke empesaron a kantar komo un imno i komo un desfiyo, en ebreo millenaryo, ama vyejo de dos mezes a lo mas. Komo sonava fuerte i alto en su gravidad, en su alegriya, kontra las plakas blindadas, sovre el kamino de Bet Yosef. Me akodrava estos kantes magnifikos nasidos de la gerra ande los partezanos, en Rusiya. Este, kon su muzika propya, era del mismo chorro, de la misma fuente interyor. I syempre pensi ke askeres ke saven topar tal ermozos kantes ya son medyo viktoryozos.”
La tresera vez ke Kessel se va en Israel, es para el djuzgamyento de Eichman, en 1962.
De manera mas jeneral, komo ya lo dishe, de kada viyaje ke izo, de kada eksperyensa, Kessel travo un livro. De su viyaje en Ahganistan salyo su roman Les Cavaliers (los kavayeros). De sus viyajes en Afrika salyo su roman lo mas konosido, Le Lion (el leon) ke fue trasladado en munchas linguas i tuvo un sukseso planetaryo.
En 1962, Kessel fue elijido para entrar en la Akademiya Franseza, suksedando a un grande aristokrato, el Duke de La Force. Para su espada, Kessel izo meter un magen David, i en su diskorso de entrada, disho:
“Para remplasar el kompanyero del kual el nombre magnifiko sono kon glorya durante un milenaryo en la istorya de la Fransya, del kual los abuelos, grandes askeres, grandes sinyores, grandes dinyitaryos, amigos de los prichipes i de los reyes, izyeron parte de su istorya de una manera brilyante, para remplasarlo, kyen yamatesh? Un Ruso de nasimyento, i djudyo ensima. Un djudyo de Evropa oryentale (…) Amostratesh por el kontrasto estranyo de esta suksesyon, ke las orijenes de un ser umano no tyenen nada de ver kon el djuzgamyento ke kale tener sovre el”.
El 23 de djulyo 1979, a la tadre, Kessel mira la televizyon kon su mujer i su amigo Georges Walter. Se tresale de la ermozura de lo ke le amostra la televizyon, imajenes de speleolojiya: “Mira esto, Georges, el mundo es maraviyozo…” i se muere en supito, a la edad de 81, despues de tener dicho esto.
Era Grande Zabit de la Lejyon de Onor i Komandador de los Artes i Letras.
Al djueves ke vyene, si kyere el Dyo!
Edmond Cohen
Paris Fransya
Artículos Relacionados: