Diario Judío México-
JULYETA
En mi eskrito BUYUKADA - LA ISLA ENKANTADORA DE LA MARMARA http://diariojudio.com/idioma/djudeo-espanyol/buyukada-la-izla-enkantadora-de-la-marmara/265004/
vos aviya prometido d'eskrivir la istorya inkreivle de Julyeta, muestra kuzenderika grega ke viniya ande mi mama " a la journee ..."

Julyeta teniya 23 anyos kuando empeso a kuzirmos. Mos aviya kontado ke se ambezo a kuzir en un atelye muy alavado durante anyos i anyos. Teniya un talento espesyal i reushiya todo le ke le pasava por las manos. El patron, no keriya pujarle la mezada i eya kon todos las klientas ke konosiya, i ke se namoravan por lo bueno ke kuziya, demisyono de su lavoro i empeso a ir en las kazas para kuzir. Me akodro ke tomava el dopyo de lo ke tomava Donna - la kuzendera djudia "a lajournee" de mi mamita - porke era muncho mas "kalifyada".

Julyeta era blanka ma teniya kaveyos pretos kurtos kon ojos grandes grandes vedres. Una boka chikitika chikitika ma karnuda i una naris de tresalir. Sue puerpo era fino i no era muy alta. Agora ke me esto akodrando de eya puedo dizir ke teniya un ermozo puerpo i una karika muy sempatika. En akeyos tiempos no saviya kualo es la ermozura de una mujer.. Aviyan buenas i malas ma no ermozas o feyas para mi ke teniya unos 10 o 11 anyos ! Es dospues de los 14 anyos ke empesi a darme kuento de lo ke es ermozura, amor, la diferensya entre los chikos i las chikas, las miradas i todo la parsandata ! Agora se meten enfrente del espejo a 9 anyos...

Un diya Julyeta mos konto ke merkava kada semana una revista grega i ke le plaziya meldar sovre todo i nada, las konsejikas, la moda, el gizado, los regalos i la kaza, kurto todo lo ke se topa en una revista para mujeres.

Julyeta biviya kon su madre i una tiya aedada. Era a eya ke le kayiya de mantenerlas, yevarlas ande los mijores doktores i abastar por las kuras karas, todo lo ke kaliya por la kaza etc. Lo aziya todo kon plazer i metyendo toda su alma porke las keriya muncho bien. Ma todo esto no le deshava tiempo i dinero para salir i entrar, tener amigos i la vida de una mansevika. Julyeta estava sola i enfasyada por no estar kon mansevos de su edad.

Viniya ande mi mamita para esbafar kon eya porke mi mamita saviya tener todos los anyos si lo kaliya....Diziya ke era su sigunda madre i por siguro yo era su ermanita ! No es ke me plaziya muy muncho todo esto ma no lo tomava muy negro tambien. Mi mamita mos tomava una de kada parte i saliyamos a kaminar, a los sirkos, al sinema, a los magazenes, a komer afuera ... Mos engleneyavamos muncho kuando lo aziyamos. Esto de madre sigunda i ermanika no halis me dyo una idea mala mas tadre en mi vida....Vos vo kontar ke ize agora i dospues va tornar a la de Julyeta .....Komo lo ize, porke lo ize ? No se ! Lo demasyado bueno i derecho me enfasyava parese !

--
Mi tiyo en un primer kazamiento teniya una mujer ermeniya. Una kuzendera alavada ke kuziya solamente para los grandes artistos i a las dammas rikinyonas de Turkiya. Kada nada se iva ande su ermana en Paris para yevar ropas i modeles muevos. Un diya el guerko no teniya nada de azer ! Me fitledeyo bueno bueno (me incho la kavesa kon las kozas suyas) i pensi ke iva ser interesante de ver la kara de mi novyo tan kerido si le diziya ke yo no so la ija de mi madre i de mi padre ma la de mi tiyo kon la ermeniya !...

Estavamos asentados amorozamente en una patiseriya de Gumushsuyu en frente del Park Otel, en una guartizika chikitika chikitika ma muy sempatika. Lo miri derecho en sus ojikos bleu i kon la mas dulse de mi sorizas le dishe avagarito si su amor por mi iva trokar de kolor si le diziya una vedra (!) ensima de mi ......Se le emblankesyo la kara i me kedo mirando... Estava muy kontente de mis talentos de aktrisa... Ize mi kara ansina muy seryoza i kon un soplo le dishe ke yo so la ija de mi tiyo i ke me dieron a mis paryentes porke eyos no puediyan tener kreaturas i ke mi tiyo estava akel tiyempo para kitarse de su mujer !

Mil guerkos del gehinnam ! Madre miya bendicha ! Por todos los lonsos de la Alaska i del Kazakistan ! Fue una katastrofa de kolor zurzuvi ! Dezgrasya de las dezgrasyas....Mis talentos de aktrisa parese ke eran mas de perfekto !!! Tuvimos una dospues-de-midi komo los filmos d'espanto para mi ! Disho ke era muy importante para el i ke teniya de pensar. Espartirse !!! Di-o miyo ! Ke ize yo ! Troki pishin ma imposivle era de konvenserlo ! No sierviyo a nada de dizir ke lo enventi para djugar. ( Ize otruna ves ansina de bovedad para una koza muy similar...Para ke seya interesante...Fue demazyado interesante !!!!)

Kurto, vinimos a mi kaza i solo dospues ke mi mamita lo konvensyo ke se kreyo ke era un djugo etc.....Loka loka de atar era yo ! Kuanto mi madre se inyervo kon mi dospues de esta historya.... No es mi kulpa... Si todo esta bien, a mi me empesa a vinir ideyas tuguertas ! Kale ke se aga todo siniza para meter pimienta i sal en mis relasyones ...Yo lo ago por shakas kon innosensya i sale ....El Di-o ke guadre !
*
Tornaremos a Julyeta.....

Dunke dishimos ke Julyeta estava abonada a una revista de mujeres i kada semana era su bueno de meldar enteramente su jurnal preferido. A mi me plaziya mirar a las figuras komo kada kreatura. De toda manera no lo puediya meldar porke era en grego. Una kolona de esta revista era konsakrada a los lektores ke keriyan eskrivirsen kon amigos en grego por siguro.... Muestra "ermana no halis" respondyo a un mesaj asemejante. La persona metyo ke keriya koresponder kon chikas al doredor de 25 anyos en grego i en inglez. Mas nada.... NADA, i Julyeta disho ke se estava ambezando inglez i le konto ken era, kon ken biviya ets... Le vino una repuesta de un sierto Nikos de Gresya sin dar dinguna enformasyon sovre el... De aki i de aya.....tiempo i borekas ! Esto del tiempo i de las borekas sin kola ni kavesa sureyo/duro un anyo. No ke edad tiene el benadam ni ke echo aze, su famiya... eskola... nada... Un nombre Nikos. La muestra empeso a salir loka... Ken era este hombre de ken no saviyamos nada ? Mi madre le disho ke venga a Turkiya ! I Vino ! Vino ande ? Ande mozotros por siguro ! A mi me plazyo ! Yo teniya 12 anyos i avlava en Inglez. Le dishe a Julyeta "Kazate kon el !" Tan simple....

Mi madre avlava perfektamente en grego. Mi padre ni una palavra ! Ma todo se pasava de diya.... La noche el monsieur estava en un hotel. Ni saviyamos en ke otel ! Julyeta se namoro de el i parese ke el tambien salyo loko por eya. Kontinuaron a eskrivirsen unos kuantos otros mezes fina ke le demando si se kazariya kon el. Julyeta aksepto kon la kondision de kazarse en primero en Turkiya. Es mi madre ke la inchiya ! El no vido dingun inkonveniente i empesimos a aparejarla por la boda. El disho ke teniya un echiko chiko ke les iva abastar ma ke no puediya azer una grande boda ets.. Ay amor !...Se estan entendyendo... Mi mamita disho ke van a ser felis i ke la moneda es koza segundarya...
Vino Nikos... Le trusho un ermozo aniyo i una kruz de oro. Se izo la boda en una eglisya Grega Ortodoksa kon las klientas de Julyeta, las dos mujeres aedadas i mozotros kon las amigas de mi mamita. I se fueron a Gresya.

Las dos aedadas kuando tornaron a kaza vieron ke aviya ensima de la meza una chantika/sac inchida de Dolares kon una nota.. "Vos vo embiyar muncho mas - Nikos" !

En Gresya la estava asperando a Julyeta un avion - Jet privado ke los yevo primero a Paris, para ke Julyeta se eskoje su garderop i sus djoyas i dospues a Singapor ! El ombre era un armator muy konosido, ma kijo estar siguro ke iva ser un kazamiento de amor i no de intereso.

Mi madre topo en kaza a la torna de la boda una brosh de brilyantes kon su nombre por debasho i "thank you". Para mi una kukla kon todos los vistidos, su kamareta d'echar i el salon kon el mupak. (Julyeta le konto ke nunka vino kuando la yami para azer vestidos a mis kuklas).

Julyeta mos embiyo letras kada semana fina ke mi mamita se bolo al Ganaden. Arresivyo un grande shok. Tuvyeron 3 ijos i 2 ijas komo en los kuentos ! Nunka Nikos bolto la kavesa por otra mujer...Teniya 32 kuando se kazo i estava arto de mujeres i de la vida solevantada ! Digo yo...... Mijorado de todas las ijikas muestras !

Es una verdad i se eskapa aki kon mis mijores oguros para una vida allegre kon paz en los korasones los mas duros i el Di-o ke no mos de hazinuras i oras malas, ke mos aga ver el bueno i la sanedad de muestros ijos i los animalitos ke no sufren ....AMEN I AMEN
sharope.blanco@gmail.com

SIN COMENTARIOS

Deja tu Comentario

A excepción de tu nombre y tu correo electrónico tus datos personales no serán visibles y son opcionales, pero nos ayudan a conocer mejor a nuestro público lector

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anteriorComo Extraño
Artículo siguiente‘Darkeinu’ Launches Mega Youth Contest for New Year
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.