Kale Soriyir!

Por:
- - Visto 209 veces

Diario Judío México-

KUALO MIJOR DE UNA ERMOZA SORIZA A LA DEMANYANA ?

Me dyo ganas d’eskrivir kozikas kayintikas de soriyir ! Ay muncho tiempo ke no eskrivi ‘humor ‘ Veremos si vos va plazer ! Nada sharonfonfon ! 2 vizinos viejos de la Kula se enkuentran en la kaleja. Hombres de setenta i ‘de la buena parte ! ‘



– 2 x 2 = 22
– esto ? hahaha ya lo savemos !

– Bueno ke dizes por mi vizino ke para ir a su kaza kale ke konduizga en un kamino sirkular i torna i torna komo akel gato ke kere apanyar su kola! Torna, torna i no save salir !

– Esto ? hahaha ya lo oyi de su boka !
– Lo konoses ?

– Es el ke me disho en el ‘tor del kupat holim’ (la kola kuando se aspera para ser egzaminado por el doktor de famiya) ke es loko el ke invento la semana de 7 diyas solo ! Es atavanado por mi vida !

– No tanto. Me disho ke no ay luvyas i esta tanto seko porke Di-o no pago la fatura de la agua ! Es posivle ?

– I tu sos torololo komo el parese ! Di-o es el mas riko ke se pueda ser i justo i todo… Komo no va pagar la fatura ! Ya saven la jente mal avlar!!

– Ni yo me kreyi a esto ma nunka se puede saver ! No ay umo sin fuego!

– El es Fuego no ? Moshe Rabenu no disho ke vido akel arvole en flamas ?

– Si si… No te vasa kreyer a lo ke te vo dizir agora ?
– Ke es ?

– Ayer la noche te akodras la kayntor ? Ni respirar estava puediyendo ! Sali al balkon i me vino esuenyo. Tomi la chanaka de la satelita, redondika i de la forma de mi puerpo kuando durmo…. i kedi durmiyendo ayi !

– Esto ? Hahaha ke ay de tante enkreivle !

– Ke dizes Moshon ! Oy vide en las programas de la televizyon todos mis suenyos difuzados en el mundo entero ! De mi al Di-o santo ke lo va dar a la mahkeme ( justisya/ tribunal) i nada me va konvenser !
Ke dezgrasya ! I si viya en mis suenyos kozas ansina… Ya entendites ! De murir de la verguensa ! ESTO no se aze ! Kaliya ke informen kuando lo vendieron ke si se durme aryento esto es lo ke afita ! De ande lo puediya saver yo !!

– I komo no lo saviyas ? Ke te paresyo esto ? Kanape ? Divaniko ? Tu kama ? Es chanaka de satelita Benadam ! Mismo kreatura te va dizir ke tus suenyos vana salir a la Televizyon !

– Puedeser. No pensi a esto ! Tienes razon ! Entre mozotros no somos de los mas hahamim ke ay ! Kon TV mos engrandesimos en la Kula ? Ya esta bastante echo de diavlo esto ke lo puedes ver mismo al Presidente de la Amerika ayi aryento !

– Yo lo vide a Jesus !
– Eh ? Ke dizes ! Vedra ?

– Si ! I a Moshe Rabenu i a Ben Hur i a Napoleon i a la Reyna de Inglaterra i este, el Rey de Fransya del sol. Levi el 16 en ! Los Levis apanyaron a los Kohanim ! 16 Reyes de los Levis i ni uno Kohen !

– Mi TV no me amostro todo esto ! Lo vo trokar ! Oy me vo ir i me vo merkar un muevo. Kualo ke le diga al hombre ? Kero ver Jesus ?

– No ! Mijor estava Moshe Rabenu. Dizele ke keres ver a Moshe Rabenu….

– Dime… Ay i kozikas estas…Ya saves ?

– Si kozas muy savrozas ! Ay la demanyana i la tadre.
Te chupas los dedos !

– Ke me dizes ! Le vo dizir a Sarah de echarse i vo mirar kon keyf !
– No ! Es Sarah ke kale ke veyga esto, lenyo !
– No pasha ! Es mi echo ! Eya a la kama !

– Ya se entyendo ! A ti te kale una mujer manseva ! Esta esta kansada i mismo la komida azes tu !

– Hehehe komida ! Burekas ke lo bueno miyo !
– De kuando por aki kozinas ?
– Hahahaha ! No me akodro ! De siempre !
– I tu madre ? No kozinava ?

– Albert ! Enderecha tu lingua ke shakas puntudas i baratas no me konvienen muncho i mi punyo bola presto !

– Estas hazino o kualo !
– De kuando por aki es hazinura ? Yo se ke se va al doktor …Ya saves… El ke no kozina !

– No entyendo nada ! Keres ambezarte a kozinar tu ?
– Oufffffff ! Ke dizes ! Ven te ambezare si keres !
– Ah bueno ! No saviya ke sos chef !
– Chef de tus pulgas ! So normal !
– I ke kozinas ?
– Poyikos troncho !
– Ayer kozinaron una gayna….. Maraviya !
– Verdad ? Ke me sale …Poyikos Patos Gaynas…
– No, azen i pishkados i karne i verdura
– ES tu ke los ves ansina parese ! Metete antojos !
– No bre ! Entyendo lo ke dizen !
– Parese demasyado torololo estos filmos !

– No. Nada de difisil. Komida de kada diya i fasil a azer. Te dize ke engredientes kale ke merkes para la komida de un diya dospues. Lo tienes pronto. Lo azesh enjuntos kuando lo eksplika. Ma la verdad
pensava ke estos programos enteresavan solo las mujeres ke gizan. A mi me plaze para tener una ideya….Me traye ambre i……

– No !…No te fuygas ! Te vo apanyar i te vo kozinar komo se yo ! Ven akiiiiiiiiiii !


I otros disheron :

El hombre estava viajando i en la frontiera le demandaron si tenia armas. Les respondio : ‘ Porke ? Ke manera de koza tenesh de menester ? ‘

Meti un motor muevo a mi auto ma me olvidi de kitar el viejo. Agora mi auto va a 400 m./hora

La otra semana aviya fuego en la fabrika de las kandelikas. La gente estavan afuera i mirando en kantando ‘Happy birthday to you ! ‘

Karinyozzzzzzzzzz
[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: