Diario Judío México - Bracha Zefira nasió en Yerushaláyim (1910) de djenitores yemenitas i kedó guérfana a la edad de tres anyos. A la edad de sesh anyos fue mandada a una kaza de guérfanos en Yemín Moshé i de ayá pasó de una famiya a la otra, ande se ambezó kantes de munchas etnías. Eya sintió sus primeras romansas djudeo-espanyolas de una mujer del vizindado de Yemín Moshé. A la edad de 16 anyos entró komo kantadora en el Teatro de Erets , i después pasó al Teatrón Hakumkum” de Avigdor Hameiri. Hameiri se empresionó de su boz i por su inisiativa eya se fue a Berlino, para perfeksionarse en la Eskola de Arte de la Shena de Max Reinhart.

En Berlino enkontró al kompozitor i pianista Nahum Nardi, i endjuntos eyos izieron un djiro de konsertos muy reushidos en munchos paízes del mundo, yevando la konosensia del kanto en ebreo a las komunitás djudías. El tur tuvo lugar kon el patronaje de Albert Einstein, i las kompanías “Columbia” i “Decca” produsieron 5 diskos de los kantes de Bracha Zefira. Eya dio munchos konsertos al prinsipio del 1930, i varios kompozitores israelís izieron aranjamientos de los kantes ke eya deskojó, aziendo una sinteza entre la múzika oriental i la múzika oksidental, inkluzo Nahum Nardi, kon el kual eya se kazó, tuvo una ija – Naamá Nardi, ke fue kantadora i eya – i se kitó después de ocho anyos. En el 1942 Bracha Zefira aparesió por la primera vez kon la Orkestra Sinfónika Israelí kondukta por el maestro Paul Ben-Hayim, ke lavoró muncho kon eya, por Marc Lavri i Garry Bertini. Bracha Zefira fue una meskla rara de kantadera i muzisiana, de artista i investigadora, ke trusho al públiko múzika yemenita, sefaradía i áraba.

Eya estudió las kantigas sefaradías tradisionales kon Alberto Hemsi i Yitzhak Navón. Las performansias públikas de Bracha Zefira izieron konoser por la primera vez al ancho públiko los kantes sefaradís, ke eran en estil de kanto “a la franka”. Sus rejistrasiones personales datan del 1937. Sus interpretasiones en ebreo salieron en 78 djiros, komo la versión en ebreo de la melodía “Yéndome”, kon las palavras en ebreo de Bialik “Yesh li gan”. Las kantigas kantadas por Bracha Zefira komo “Hitrag’ut”, bazado sovre “Mama yo no tengo visto”, “Durme durme” i “Morena, Morenika” ayudaron a formar la alma del moderno repertorio israelí sefaradí.

De las primeras aparisiones de Bracha Zefira, munchos auditores amerikanos toparon sus performasias eksitantes i yenas de kolor. El New Times, avlando de primer resital en los en el 1949, eskrivió: “… Fue la natura exótika de sus interpretasiones ke les dio un ayre de novitá i una spesial fasinasión. Su boz es esensialmente de timbro oriental…”. Otras resensiones en los jurnales amerikanos alavaron la kalidad oriental de su boz.

Bracha Zefira se kazó por la sigunda vez kon el violonista Ben-Amí Zilber i tuvo un ijo – Ariel Zilber, ke es kantador él mizmo. Eya murió en el 1990.

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorEl nuevo Medio Oriente
Artículo siguienteLas 10 plagas que azotan al mundo
Noticias, Reportajes, Cobertura de Eventos por nuestro staff editorial, así como artículos recibidos por la redacción para ser republicados en este medio.