Kobi Zarko nasio en Israel en el 1952 de djenitores provenientes de Turkia i de Salonik. Se ambezo las kantigas ke kanta de sus nonos i de su madre. Es uno de los reprezentantes de la mas djoven jenerasion de kantadores del folklor sefaradi prezentado en manera la mas autentika. El es tambien aktivo en el kampo de la konservasion i el arrebivimiento de la kultura i del folklor djudeo-espanyoles.
Su romanso kon el ladino (komo lo definio el mizmo), empeso despues de una nochada en Yerushalayim en memoria de Yitshak Levy, ande se metio en kontakto kon Kamelia Shahar de “Kol Israel”. En prinsipio enrejistro kantigas i romansas en el studio de la Radio, en el Teatro de Yerushalayim, kon al piano Haim Tsur.
Empeso a kantar en las nochadas organizadas por la asosiasion “Sefarad” en Yerushalayim ansi ke en el Seminario Levinsky i ayudo a fondar el Sirkolo de Ladino en Tel-Aviv.
Kon todo lo ke tenia en si i lo ke estuvo arrekojendo de kantes, romansas, imnos ets. empeso a dar resitales en kazas de repozo i sentros komunitarios kon el enkorajamiento de la Asosiasion “Sefarad”.. En el 1992 partisipo al primer kongreso mondial de ladino ke tuvo lugar en el “Muzeo ‘Haaretz” en Tel-Aviv, i en el 1999 partisipo al kongreso mondial organizado en Yerushalayim por la Autoridad Nasionala de Ladino i su Kultura.
El demonstra un grande dominio de la shena i una grande komplisidad kon el publiko. Su konosensia del ladino es perfekta. El da i konferensias sovre el kante djudeo-espanyol, suy raizes i sus enfluensias. Izo tornos de resitales en Almania, Fransia, Espanya, Mexico i Sud Amerika. En Israel es konosido i amado en todos los sirkolos de ladino, komo kantador, komo moderador de evenimientos i konferensiero. Su repertorio es inmenso, i va de romansas a kantigas en ladino, en turko, en grego i en ebreo.
Kobi enrejistro kon el Instituto Renanot la komedia muzikala “Los kantes de Ester” de Shlomo Reuven (1994). Partisipo komo aktor en el radiodrama de Matilda Koen-Sarano “Sefaradis de dor en dor” (1999) i en otros skeches de inisiativa de “Sefarad”. Partisipa kada anyo al Festival de los Kontadores komo kontador de kuentos i moderador en ladino i en ebreo, i es el animador de lo 4 “Dias de leche i miel”, organizados por el Sirkolo de Ladino de Haifa, ke ya tiene 8 anyos de vida. Partisipo komo ko-prezentador en el primer Festiladino (2003).
El esta aprontando un CD de kantigas i romansas en ladino i en estos ultimos tiempos esta lavorando kon la muzikologa Dr. Shoshana Weich-Shahak, para la Fonoteka de la Universidad Ebrea de Yerushalayim, en la enrejistrasion de romansas antikas i ulvidadas ke el resivio de su madre i de su nona, entre eyas una version de “Tres damas van a la misa”, ke data de la Edad Media.
Kobi Zarko mora en Tel-Aviv, tiene 3 ijos i es viche direktor de una banka en Tel-Aviv.
Eskushe a Kobi Zarko en SaveTheMusic.
Artículos Relacionados: