Moshico Cohen nasió en Izmir (Turkía) en el 1953 de David i Rahel Cohen de bindicha memoria. Era el sején de sus siete ijos. El es inyeto del Rav Itzhak Karmona de bindicha memoria, ke era rabino i sofer stam (eskrivano de Séfer Torá) en Izmir. Moshico era miembro del “Moadón Tzofim” (el Klub de los Scouts) en Izmir, i en el 1968, tres anyos después de la muerte de su padre, izo su aliyá a Israel, en el kuadro de la “Aliyat Anóar”, i arivó a la eskola de Kfar Anóar Nitzanim. Después ke se ambezó el ebreo en el ulpán, entró komo interno al liseo en los estudios de agrikultura. En el 1973, después ke izo el bakaloreato, se aroló en la armada en la ingenyería de bataya. En la armada pasó todos los grados kon grande sukseso, inkluzo el kurso de ofisieres. Moshico sirvió por 10 anyos en la armada de karriera.
En el 1983 salió de la armada kon el grado de major. En el kuadro de su primer periodo de rezerva tomó sovre sí la tarea de fondar la division de salvasión de todo el paíz i estuvo a su komando por dos anyos. Durante la fondasión de esta división konosió a un mansevo ke le propozó de dirijir una impreza en el kampo de la agrikultura moderna. Moshico se fue a Olanda para perfeksionarse en la kompanía-madre i fondó la impreza en todo i por todo. Después de sinko anyos de direksión de la impreza, en el 1988, Moshico dechizó de azer de su pasatiempo su profesión. La difisil dechizión de deshar la direksión de la impreza i azerse artista de divertimiento fue tomada por él en ségito al fakto ke azía parte del grupo “Magafaim” (Botes), (Grupo reprezentativo de los miembros del moshav de Beer Tuviá) i el viaje del grupo en tur de reprezentasiones en las komunitás djudías en los Estados Unidos, en el kuadro de los 40 anyos del Estado de Israel. Del 1988 Moshico aparese en Israel i en el mundo en veste de artista en munchos kampos – moderador, kantador, aktor kómiko, majisién i artista de telepatía. Además él arivó primer en el 1998 en la kompetisión de todo el paíz en telepatía.
En Pésah del anyo pasado Moshico fue envitdo por la komunitá djudía de Izmir a apareser delantre de un públiko de 600 personas en el otel Hilton. En este espektaklo él amostró todos sus talentos, i sovre todo las kantigas en djudezmo, en las kualas kresió. Este anyo Moshico aparesió en la Universidad de Ben Gurión, delantre de estudiantes de djudezmo en la fiesta de serradura, en su programa “Kantamos i kontamos”. Kuando demandan a Moshico kualo es para él kantar en djudezmo él responde kon una sunriza: “Kantar en djudezmo es respirar, sonyar i riyir de korasón”.
Moshico kanta en munchas linguas, i el públiko se delisia de su boz onda, ke toka las telas de korasón. El prezenta las kantigas kon palavras de atadijo, yenas de umor i de kuentos de la vida de kada día. El da al públiko kon todo su korasón i alma, i kuando le demandan kualo kere azer kuando se va azer grande, él responde “Yo kero ser chiko, i kontinuar a azer alegrar las personas, porké yo penso ke el regalo ke resivimos del Patrón del mundo se deve divizar kon todos, porké los kantes i las sunrizas son la savor de la vida”. Moshico kitó un CD, entitolado “Késem ashir” (La majía del kanto), ande se topan kantigas de munchas provenensias, i entre eyas kantigas en djudezmo.
Artículos Relacionados: