Yael Badash nasió en Pétah Tikvá en una famiya de orijín sefaradía, poloneza tripolitana. Su nona de parte de madre nasió en la Sivdad Vieja de Yerushaláyim en una famiya ladino-avlante kon raízes en Salonik i en Fez. En su chikés Yael empesó a estudiar múzika i a tanyer el piano.
En la armada sirvió en el grupo de la “Mifkadat helot hasadé” (Komando de las fuersas del kampo). Terminó los estudios de B.A. de djogo en la fakultad de arte de teatro en la Universidad de Tel-Aviv. En el 2002 aparesió en el Festival “Jazz be Yam ha-Adom” (Jazz en la Mar Kolorada) komo parte del grupo “Funkapella”. Ayá enkontró el kompozitor yugoslavo Goran Bergovich, ke la oyó i la envitó a apareser kon él en Evropa. Del 2003 al 2008 aparesió komo solista al lado de Bergovich en una sería spesial de konsertos “My heart become tolerant” (Mi korasón se aze tolerante) en toda la Evropa. En la reprezentasión Bergovich metió endjuntos tres solistas de tres religiones: la kantadera franseza-tunizina Amina Annabi, la kantadera de Mekedonia Vaska Yankovska, (ke intérpreta la kantiga “Ederlezi” del filmo “Ora de zínganos”) i Yael Badash, endjuntos a la “Orkestra de bodas i funerales” de Goran, al grupo de muzisianos del Maroko i al koro ortodokso de Moska. En el 2005 Yael ganó el primer premio en el Festiladino, kompetisión internasional de múzika orijinal en ladino, interpretando la kantiga “La lingua de kaza”, palavras i múzika de Ziva Atar. En el 2006 Yael empesó a lavorar kon Goran Bergovich sovre un album en ebreo, produsido i muzikado por Bergovich mizmo. El album fue enrejistrado en Belgrado en el 2009 i no fue deynda publikado. A lo largo de los anyos Yael enrejistró bozes para los projektos de munchos artistas, komo Shlomo Gronik, Yoni Rehter, Arkadi Duhin i munchos otros. En el 2011 Yael arivó de muevo primera kon la kantiga “La lingua de kaza” en los diez anyos del Festiladino, ande aparesieron las mijores kantigas de los 10 anyos. Yael empesó a apareser en Israel kon un grupo ke interpreta los kantes del projekto kondjunto kon Bergovich, ke esta para ser publikado. En esto dias eya aparese en el mundo en el grupo “Baladino” kon los mujisianos Tomer Moked, Yoni Dror, Adam Ben-Ezra i Ishay Afterman.
I su kariera de aktrís es muy enteresante: en el 2003 djugó komo kantadera en el filmo “Amor kolombiano”. En el 2006 djugó en la sería “Ha-haverim shel Naor” (Lo amigos de Naor), en “Tzlilé ha-múzika” i “Rehov tov” en el teatro Amsabel de Hertzliya. Djugó el rolo de Bar en una piesa para kriaturas, i de eya fue envitada a djugar en el “Festival de Hanuká”. Su primer rolo internasional lo resivió kuando en el 2005 interpretó la figura de María Magdalena en la sería “Terra X” de la televisión almana, ke konta la vida de Jezús. Del 2008 entró a azer parte del teatro Ha-Cameri, ande interpretó la figura de la ija en “Kanar al ha-gag” (Violonista sovre el techo). Además djugó en “Sálah Shabati”, “Zoar” (bazado sovre la vida de Zoar Argov, i mas i mas. Oy Yael es la kompanya de Tómer Moked, i diviza su vida i su aktividad artístika entre Tel-Aviv i Berlino.
Artículos Relacionados: