Diario Judío México-
En muestra lingua se puede traduizir por :
EL EMBROLYO KAVZADO POR LA EDAD !
La medisina lo estudya komo el :
AGE ACTIVATED ATTENTION DEFICIT DISORDER..
Mizmo si no es tan grave me afita, i a mi, de deshar unos echos sin eskaparlos, por empesar otra koza…. Lo mas me afita kuando ago bushkadas i mis ojos aferran un pedasiko de lektura ke me trava por las orejas i me veyo meldando otra koza sin dinguna asemejansa a lo ke keriya estudyar antes ! Afita ke se bolta en una kadena i me vo arezvalando de kaleja a kaleja sin akodrarme mizmo de ande empesi ! Las horas pasan i empeso a inyervarme porke otra vez el tiempo no me abasto ! En realitad el povretiko de tiempo no tiene dinguna kulpa. Tiene la kulpa mi edad ke ya empeso a mostrar simptomes del AAADD, el maldito dezrepozo del AGE ACTIVATED ATTENTION DEFICIT DISORDER.. !
——————————–
Nathan konta :
Desidi de dar agua a las plantas de mi guerta. Me fui para tomar los aparatos para esto del garaj kuando vide ke mi oto estava muy suzyo i ke kaliya lavarlo !
A este punto, mis ojos se fueron a la meza ande aviya depozado el koreo de la kasha de letras esta demanyana. Desidi de ver kualo me aviyan embiyado antes de empesar a lavar la voiture.
Meti las yaves ensima de la meza i kije echar al sierkol ke se topa debasho de la meza todo los papeles ke embiyan para publisitad solo, las envelopas ets…
Vide ke el sierkol estava muy yenno ! Deshi ensima de la meza las fakturas ke kaliya pagar i ke aviya seleksyonado del koreo, para echar el kontenido del sierkol al konteyner en la kaleja.
Ma a este momento pensi ke si me esto indo afuera i la kasha munisipal para el koreo esta ay tambien, seriya mijor si pagava las fakturas antes.
Tomi el karnet de chekes de ensima de la meza i vide ke me kedo un solo chek ! Los karnetes de chekes ke teniya en rezerva estavan en mi ofisyo en kaza…
Entri a kaza, me fui a mi ofisyo i vide el PEPSI ke estava bevyendo. Kaliya travar el pepsi para ke no se vazye ensima de todos los papeles i los dosyes en mi meza de lavoro para bushkar el karnet de chekes.
El pepsi kaynte no valiya nada ! Lo tomi para yevarlo al frijider para ke se yele. Indo a la kozina por el Pepsi vide ke el vazo de flores en el koridor teniya menester de agua ! Se aviya sekado enteramente !
Estava para meter el pepsi ensima del marbro ke vide, oh ke maraviya, mis antojos ke estava bushkando komo loko aryento de kaza !
Desidi de meterlos ensima de la meza de lavoro de mi ofisina para no bushkarlos otra vez dospues ! Ma en primera iva dar agua al vazo de las flores.
Inchi un jarro de agua por las flores kuando vide ensima del marbro el kontrol manual de la televizyon ! Ke bushkava aya ? Ken lo aviya deshado ? A la noche kuando iva kerer ver la TV no lo iva topar ! Bueno ke lo vide… Presto presto ir al salon para meterlo a su lugar.. Ma antes dar agua a las flores.
Echi agua a las flores i me se fuyo un poko de agua enbasho.. Meti el kontrol manual de la TV ensima del marbro de la kuzina para tomar un kanyamazo i sekar la agua ke aviya kayido..
Dospues torni del koridor tratando de akodrarme kualo es ke teniya de azer !
A la fin del diya :
No lavi la voiture
Las fakuras no puederon ser pagadas
El bokal de Pepsi esta dayinda kaynte ensima del marbro
Las flores no tyenen bastante agua
Ay solo un check en mi karnet de chekes
No esto puedyendo topar el kontrol manuel de la TV.
No se ande estan los antojos…
I no me akodro ke ize kon las yaves de la voiture !
Empesi a demandarme deke no ize nada diya entero !
I esto kansado… Tan kansado ! Se ke lavori sin kedarme !
Ke kanserya….
Me rendi kuenta ke esto era seryozo i desidi de ir a un spesyalisto para demandar ayudo. Ma en primero kero echar un ojo a la kasha de mi koreo !!!!
——————————–
Kuentiziko o no ma triste si es el kavzo de alguno !
Este meoyo kale ke aga jimnastika para ser sano ! De mil maneras ! Abasho arriva, de lado i saltar ! Otra vez otra vez i ….A la pared ! Boummmmmmmmm ! El meoyo se izo agua o vino en si ? !!!! No vale la pena de aprovar !
Sanos i rezyos i kon buena humor siempre, mis keridos….
[email protected]
Artículos Relacionados: