Esta istorya se puede meldar komo algo realista o surrealista. Algunos van a dizir “si non e vero e ben trovato”, otros van a meldarla con ekseptisismo, maraviya o inkredulidad. No so un arkeólogo, istoryador o un medium. So un ombre de negosios, kon un doktorado en étika de negosios. Do kursos en varias universidades, eskriví livros akademikos, artíkulos, un sitio internet, ma también una novela, ovra de teatro, i algunos poemas. Kada uno a su manera…
El 10 de agosto de 1998 eskriví una letra al Alcalde de Coria anunsiándole ke tenia la intensión de vizitar su sivdad, ya que se suponga ke el nombre de mi familia Cory problabamente signifika de Coria. Le dishe ke mi lingua materna es el ladino, ma ke también estudyi el castellano. Le dizía ke moro en Israel, nasí en Egyto, de padres y nonos provenientes de Gresia i Turkía, i ke estuvi munchas vezes en España por negosios.
El 20 de agosto de 1998 me eskrivio el Alcalde de la Ciudad de Coria: “Saluda a D. Jacobo Cory, y siendo conocedor del interés que tiene por visitar nuestra Ciudad me complace en invitarle y recibirle, dada la importancia de la empresa que le mueve venir hasta nuestra tierra. José Ma. Alvarez Pereira aprovecha esta ocasion para expresarle su consideracion personal.” El mismo día resiví un email de Juan Pedro Moreno, Arkeólogo responsable del Servicio de Asesoramiento Historico Cultural del ayuntamiento de Coria ke me eskrivió: “El motivo de su visita me parece muy interesante y apasionante. El señor alcalde me ha transmitido su intención de visita. Coria, guarda en su memoria histórica el nombre de Calle de la Sinagoga, y hay dos posibles ubicaciones. Esperamos verle pronto por nuestra/su ciudad, sera bien recibido.” El 24 de agosto de 1998 le eskriví ke: “Me gustaría mucho visitar con Ud. la ciudad y ver las ubicaciones de la sinagoga y de la juderia. Quiza, puede ser que con mi DNA podré después de 500 anos, ayudarle a hallar la localización exacta donde mis antepasados vivían. Es muy importante por el turismo de su ciudad… Ya ve Ud. que soy todavía un localpatriota y espero hacer algo para contribuir a la economía de nuestra ciudad…”
El día de 8 de oktubre visiti la vieja sinagoga de Castelo de Vide del otro lado de la frontiera en Portugal. Observí ayí komo havía sido konstruida la sinagoga i el 9 de oktubre viaji kon mi mujer Ruthy a Coria adonde fuimos recivido por Juan Pedro Moreno. Moreno me mostro tres posibles lugares de la sinagoga pero deskarti los dos primeros (DNA, intuisión o mazal?) Kuando arivimos al terser lugar, me disho Moreno que ayi avia un problema porke la ansiana ke vivía ayí no asheptava avrir a ninguno. En subito, la ansiana (la señora Castañera), ke se asemejava exaktamente a mi madre, salio de su kaza. Le dishe ke vengo de Israel, me yamo Cory i ke la orijina de mi familia es de Coria. Keremos averiguar donde esta la sinagoga i la pedimos ke nos permita entrar en su kasa. Eya sonrió i nos invitó a entrar. Moreno estaba asombrado. Kuando entrimos, vi ke la kasa estava konstruída exaktamente komo la sinagoga de Castelo de Vide. Ma el portal era kuadrado i no en arko komo en la sinagoga de Vide. Kuando le demandi deke, me disho ke sintio de su familia ke morava en la misma kasa durante siglos, ke el portal original era en arko ma se destruyó durante el terremoto de 1755. Bashimos al sótano i nos mostro antiguos livros ma el mas antiguo era de 1500, después ke los jidíos fueron expulsados de España en 1492. Disho a Moreno ke estava de akuerdo a ke se hagan exkavasiones en su kasa para investigar los vestigios de la sinagoga.
Moreno me regaló un livro “Coria y Sierra de Gata” y eskrivió: “Para nuestros amigos israelitas, que este libro suponga un paso mas para el encuentro de unas culturas que nunca debieron separarse.” En 1999 la kasa de la señora Castañera fue vendida a un privado i asta 2011 no se izieron las exkavaciones ma Moreno me disho en 2011 ke bushkando en los arkivos de Coria komprobó desde algunos anyos ke esta kaza era efektivamente la kaza de la sinagoga. No se puede vizitar la sinagoga porke viven ayí privados. En internet meldi ke la komunidad djudía de Coria se remonta al siglo XII. En la judería vivían aproximadamente unas 46 familias ke se dedikaron a los ofisios de tornero, shastre, platero, arrendador de impuestos, etc. Kon motivo del dekreto de expulsión algunos djidíos se establesieron en Portugal donde se konvirtieron al kristianismo, komo Yuda de Alba. En realidad, estas son los fechas.
Yo presumo ke los djidíos de Coria (kon mis antepasados probablamente) se fuyiron al Portugal en 1492, siendo Coria en la frontera del Portugal que resivió djudios asta 1497. Pensavan que atornaran pishin a España y desharon la sinagoga al kuidado de una familia, ke troko su nombre komo munchos marranos kon nombres de arvoles – Castañera, los antepasados de la mujer ke ayinda morava ayí en 1998. Tomaron kon eyos todos los livros hebreos i por esto no avía en la kasa ningun livro anterior al 1500. Los djidíos de Portugal fueron forsados a konvertirse al kristianismo, ma munchos se fuyiron despues kon la kolaborasión de Dona Gracia Mendes i otros a Turkía, Gresia i Italia, donde mi familia moro asta ke emigraron a Egyto, Israel, Fransia o Brazil. La señora Castañera, ke problabamente savia ke su kasa avía sido la sinagoga, siendo marrana, desidio a su vejez permetir ke se agan exkavasiones i devolver su kaza a la funksion inisial de la sinagoga. Su semejansa kon mi madre no es una ilusión óptika porke tenemos fotos con eya, ma munchas djudías sefardías se asemejan hasta agora a espanyolas, porke no se kazaron kon otros ke Sefardís durante 500 anyos. La simpatía ke nos amostro, avriendo su kasa a un Israelí djidío kuando no kería avrirla a sus konsiudadanos, prueba probablamente ke savía algo sovre sus antepasados ebreos. Ma ken save komo se pasan las kosas, deke desidí vizitar Coria, deke el Arkeológo me demando ke le ayude a topar la sinagoga, deke la ansiana desidió avrirnos su kasa, komo un desendiente de Coria viniendo de Israel descuvrió la sinagoga después de 500 anyos? Sera una echizería, una koza de nada, una historia logica? Ken lo save?
Como me siguen
En fila interminable
Todos los yos que he sido!
Como se abre el ante mi
En infinita fila
Para todos los yos que voy a ser!
Y que poco, que nada soy yo
Este yo, de hoy
Que casi es de ayer,
Que va a ser todo de mañana!
(Juan Ramón Jiménez, La realidad invisible, El presente)
Fotos:
1. Casa de la Sra. Castañera – Sinagoga de Coria: La Sra. Castañera, Juan Pedro Moreno, el arqueológo de Coria, y Jacques Cory.
2. El portal de la casa de la Sra. Castañera – Sinagoga de Coria, con Moreno y Cory.
3. Moreno y Cory examinan un libro antiguo en la biblioteca de la Sra. Castañera.
4. El patio de la sinagoga de Coria – casa de la Sra. Castanera, que asemeja a la sinagoga de Castelo de Vide en la frontera de Portugal.
5. Ruthy i Jacques Cory delante de la catedral de Coria.
Artículos Relacionados: