Kreasion Poetika i Literaria en Tiempos de Kriza del Puevlo Djudio

Por:
- - Visto 237 veces

En la larga istoria del puevlo djudio uvo momentos de fuertes krizas ke metieron en peligro su existensia mizma. Kriza sinyifika ruptura, un sistema de vida i de valores ke parese derrokarse por diversas razones ke tokan tanto al mundo eksterior ansi komo al mundo interior del ombre.

Kuando a partir del siglo 14 i en el siglo 15 tiene lugar el trajiko proseso ke se termina en 1492 kon el Edikto de Ekspulsion, despues de serka de 15 siglos de vida en un teritorio ke konsideravan komo propio, se produse una kriza muy profonda en la istoria de los djudios sefaradis.

Todo parese pedrer su sinyifikasion. La posibilidad de dar repuestas razonables i objetikvas a una tala situasion traumatika se alesha mas i mas. Otras dimensiones del esprito umano, non rasionales, entran en aksion. En este universo de sentimientos i emosiones enflorese la kapachidad de kreasion poetika i literaria.


Munchos de entre los ekspulsados se demandaron ke era el pekado ke avian kometido para mereser un tal kastigo del sielo, i al no poder dar repuestas rasionales eyos bushkaron a ekspresar sus angusia de otras maneras, entre eyas, la ekspresion literaria.

Una de las formas de reaksionar a la ekspulsion fue de deskrivirla, segun lo izo kon muy bivas imajes, don Isaac Abrabanel (1437 – 1508) ke trato, sin reushidad, de anular el Edikto de Ekspulsion. Tokando a este tema el eskrive:

“I todos se alevantaron kontra rikos i proves de muestra komunidad, ekspulsando a ombres i mujeres, padres i ijos de los desendientes de Sion, tomando todo lo ke tenian asta undirlos en la mayor ruina. Uvo ke abandonaron sus relijion por el miedo de ver sus sangre vertida komo la agua, o de ser vendidos a estranjeros ke se yevavan en sus naves kativos, ombres i mujeres, chikos i grandes, sin kompasion por sus yoros, ke me se apretava el korason, ovligandolos a abandonar sus ley i kontinuar en sus kativerio”.

Otra de las formas ke tienen los djudios para enfrentar krizas es el enfuertesimiento de las esperansas sovre la venida del Mashiah. Esta tematika aparese en la ovra del poeta Joao Pinto Delgado ke nasio en 1508 en Lisbona onde su famiya se avia refujiado despues de aver salido de Espanya. En 1624 el se aresento a Rouen i despues se trezlado a Anvers i Amsterdam onde fue direktor del Seminario del Talmud Tora. Murio en 1653. En su ovra “A la salida de Lisbona “, de la kuala trayemos aki las 2 ultimas koplas, se puede konsentir su dezeo de yegar a la Tierra Santa :

Los desterrados vendran
Al nuevo Templo a vivir,
Y a quien hicieron servir.
Tus Reyes le serviran

Sagrada Jerusalem
Dulce bien, dulce memoria,
Viva en nos, si no la gloria,
La memoria de tu bien.

Tambien otro eskritor, Salomon ibn Verga deskrive las sufriensas del puevlo djudio, uzando datos istorikos i istorias kurtas kon dialogos, en su livro ” La Vara de Yeuda”.

Munchos de los djudios konvertidos por la fuersa en Portugal , podian salir de este paiz kuando topavan lugares adekuados i sirkontansias favorables. Esto pasa kon algunas eminentes personalidades komo Menashe Ben Israel (1604-1657) ke fondo la primera imprimeria en Amsterdam, lucho para ke el parlamento inglez permetiera la entrada de djudios a Ingletierra, estava konvensido ke los trivos pedridos de Israel se enkontravan en Amerika del Sud i fue tambien de los ke kreeron ke Shabetay Zvi era realmente el Mashiah tan asperado.

Temas atados a la Inkizison , al martirio i a la salvasion entraron en la kreasion literaria de otros eskritores tambien, komo Diego Enriquez Basurto i Antonio Enriquez Gomez ansi ke Miguel Levi de Barrios (1635-1701) ke malgrado el largo tiempo ke paso desde la ekspulsion, kreia firmamente en la yegada del Mashiah i fue partidario de Shabetay Zvi.

Ademas de la ekspresion de la ekspulsion en ovras literarias uvo otra forma tambien de enfrentar la kriza kavzada por la ekspulsion. Esta tresera forma uza una lengua alegorika i metaforika, ke no es rasional ni sientifika, para interpretar los tekstos i tratar de la kriza. Mos referamos a la Kabala ke es la ekspresion del mistisizmo djudio. Empesa en Babilonia en el siglo 7 ma es muncho mas tadre, en el siglo 12, en el Languedoc, ke esta doktrina mistika adkiere prestijio. Eya pasa imediatamente a Espanya, en primero a Gerona i despues a Avila onde Moshe de Leon (siglo 12) reune el pensamiento kabalistiko en el Zohar. De la mizma epoka es el savio Avraam Abulafia.

Malgrado ke la eksperiensa mistika existia al seno del puevlo djudio desde los tiempos biblikos, es en Espanya ke la Kabala enfloresio i devino, mas tadre, un refujio para los exilados espanyoles, en los lugares onde se avian aresentado despues de la ekspulsion o onde yegaron mas tadre. En Safed, por exemplo, se arekojeron munchos kabalistas, el mas importante de entre los kuales fue Isaac Luria (1533-1572).

La teoria de Luria, sovre la kreasion del universo i las “emanasiones” o “sefirot”, propoza al ombre un kamino mistiko. La ovligasion del puevlo djudio es de aunar de muevo las partikulas de la luz orijinal ke se dispersaron en el mundo i unirlas a la divinidad, lo ke traera la yegada del Mashiah i la restorasion politika del puevlo djudio.

Es interesante konstatar ke la tendensia a la kreasion poetika se ve en algunas mujeres tambien, sovretodo en Italia, onde basho el impulso de la mueva konsepsion del ombre traida por el Umanismo i el Renasimiento, aparesen mujeres kultas ke pueden ekspresarsen por medio de poezias. Sovresalen de entre eyas Deborah Ascarelli, Sara Copio Sullam i Batsheva de Modena ke manifestan en sus poemas sus amor a la Tierra Santa i sus devosion al djudaizmo.

Esto mos yeva a bushkar a definir el proseso kreador ke aparese en epokas de kriza. En lo mas ondo del inkonsiente del ombre ay potensialidades kreativas ke aparesen en su konsensia en epokas de kriza. Esto se ekspresa de munchas formas: suenyos, viziones i fantazias, ovras de pintura, muzika i poezia, eksperiensas relijiozas i tambien viziones de la realidad eksperimentadas por grandes ombres de sensia ke bazaron sus lavoros i deskuvrimientos en semejantes manifestasiones i eksperiensas ke tuvieron, kuando estavan en un estado inkonsiente.
Komo lo vemos, en epokas de krizas el ombre topa repuestas kreativas, poetikas i literarias, para responder a eyas. Es komo si rekupera, desde lo mas ondo de su espirito, la unidad ke tenia de antes. Desha de bivir superfisialmente i bushka a rekuperar la sinyifikasion de su existensia, en medio del proseso istoriko por el kual esta pasando.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: