Moshe tenia una butika i el dia entero stava arremendando kondurias, metiendo suelas, enklavando, kuziendo. Era para el plazer i ganar paras. Kon todo el dinero ganado, el la mujer i los vizinos kumian i bevian i estavan kantando i baylando kada noche.
El bekchi ke pasava por sus kaza kada ves, los ve aziendo siempre tanto keyf. Pensava: “Ken save komo este ombre aze tanta moneda!” Se va ande Sultan i le konta todo.
“Ah dize Sultan, este djid’o ke gana bueno, agora vamos a ver lo ke le vo azer.”
Kita un ferma ke todas las butikas de kunduriero deven aserar por obligasion del rey.
La manyana kuando Moshon va al echo, topa la gruta serada. Ke puede azer para ganarse el dia? Toma una siya, una tijera, furcha, shavon i gilet, kuchiyo de arapar, i empesa a arapar kada uno ke pasa. Era prestoso, arapa, arapa, kort kaveyos ; ansina se le inche el cheps tan bueno ke la noche otra ves la kaza estava yena de djente, komiendo, beviendo i kantando. Oh ke keyf ermozo!
El bekchi ke ve esto, pregunta kualo izo. “Eh, yo bovo no se. Topi echo de berbelik”.
Kuando sintio esto, el sultan le defendio la lavor de berber.
Ke va azer Moshon? S’empresto un sako del bakkal, lo incho i empeso a vender pipitas, leblebis a buen presio. Al punto se vazio el sako, i se le incho el chep. Ganar, bever, kantar!
Non saliendo abash, el sultan lo yama a asker. Le dan vistido de la armada turka, le kortan kaveyos kabak, i le dan una spada ke se la enkolge al bel.
Esta situasion estava muy desgrasiada para el povero ombre. No ay lavorar, no ay ganar ni un grosh ; se va murir de tristeza. Pensa, pensa ke azer. Va al charshi i vende la spada, i al kelef mete una de tavla.
Kon lo ke gano otra vez va merka raki, mezes buenos, i kumbida los amigos a fiestar.
Kuando el sultan embeza la koza: “Ah, dize, me va vengar d’este djidio!”
Al dia yama a los askeres i dize: “Oy devemos kortar la kavesa de este bandido. Tu, Moshon vas a azer este echo.”
Se va murir Moshon. Kualo disho: o”Eh, grande Sultan, me esta paresiendo ke este ombre es inosente. El Dio lo va amostrar i va azer la spada mia de tavla.”
I ansina fue!
Kontado por SARA KENT- 1997
Notado por MATILDA KOEN-SARANO
Artículos Relacionados: