Kuento:El kanapé muevo

Djohá merkó un kanapé muevo para el salón, i kada vez lo admirava kon orgolyo.
Un día tornó a kaza a la tadre, mas presto de siempre, i vido a su mujer enriva del kanapé, abrasada kon su haver.
chico-besa-a-chica-en-sofaDjohá no disho nada i, yeno de amargura, salió de kaza i fue a asentarse en la kavané.
Entró su amigo Moshón i lo vido ayá beviendo rakí kon una kara de Tishá Beav.
Le disho: “Ke tienes, Djohá?” i Djohá le kontó todo.
“Kualo ke aga yo agora? Asina no puedo kontinuar!” le disho al amigo.
Le disho el amigo: “Kítate de tu mujer!”
“No!” le disho Djohá, “No puedo! Tiene dos ermanos komo dos almarios… Me espanto de eyos… Me van a matar!”
“Alora despártite de tu haver.” le disho Moshón.
“No puedo!” disho Djohá, “De ande ke le dé su parte de dinero?”
“Si es ansina, me desplaze,” le disho el amigo, “no sé kualo konsejarte.”
Pasaron unos kuantos días i Moshón entró a la kavané i vido ayá a Djohá beviendo rakí, alegre i kontente.
Se le aserkó i le demandó: “Ke tal?”
“Todo bueno! Ya topí el remedio!” le disho Djohá.
“Ke remedio?” le disho el amigo.
“Vendí el kanapé muevo!” le respondió Djohá.