La agua es vida II

Por:
- - Visto 207 veces

Dospues de echar un ojo a  LA AGUA ES VIDA en el DIARIOJUDIO del  16 de Marzo 2019 vos propozo de meldar este eskrito estrechamente konnektado…..  Lo devo al Senyor Daniel Benbanaste ke me embiyo un mail maraviyozo !

Lo kero reingresyar aki espesiyalamente por aver avlado de la chanakita de agua ke devemos todos meter allado de la puerta de la kaye ande moramos. Es un djesto de zahud i de amor por todo lo ke el Santo Bendicho kriyo.  Lo mas vemos la angustya de los pasharikos, los perros, los gatos, i ken save ke otros animalitos de la kaye, ezmayandosen de kalor i de ser en los enveranos muy duros!

Para mi es komo un orasyon al D-o i una razon para ke me siente mas livyana i bien en mi miente. Un djesto tan chiko komo inchir una chanaka de la fuente i azer unos pasos fina la puerta, puede salvar vidas i allivyanar tantas sufriyensyas..  Tener una konsiensya limpya i repozada.   La agua es sakrada i es la VIDA…


Vamos a pueder demandar una kupa de agua a la fin de muestra vida ? Ken save…. Da i ke el Sielo te lo torne en siyen i en mil… No lo vash a oyir ma vash a VER el “Grasyas ” suyos en sus ojos !  Nunka me vo olvidar de muestro viaje a  AVSHA kon las kreaturas… AVSHA es una chika izla en la mar MARMARA i malhorozamente la gente ke se van a pasar las vakansyas en esta izla enkantadora deshan munchas vezes detras, sus kompanyeros, los perrikos ke los bushkan kon grande dezespero sin dinguna manera de toparlos….  Mueren kon muncha sufriensya de hambre, de ser i lo mas de eskarinyo….

Es en estas sirkunstensyas ke vimos un diya, espandido en la arena al bodre de la mar, un ermozo perro blanko i preto ke se puediya entender ke era un perro de kaza ma ken save de kuando soltado, sin dingunos, a mitad muerto de ser i de kanserya….  Lo yami ma no puido alevantarse…  Aparejimos un bol kon agua limpya i se lo trushe a su lado.  Mizmo en su estado no bevyo la agua sin lamber en primero mi mano i mirandome kon sus ojos tristes dizyendome “Grasyas.. El DI-o ke te lo page.”

Durante muestras vakansyas mos okupimos de el…. Lo tomimos, le dimos a komer i a bever.   Se arrebivyo i los vizinos estavan lokos por el…. Se viya ke era edukado, limpyo i muy karinyozo.   Una famiya kon dos kreaturas lo kijyeron yevar a sus morada en Istanbul.   Muestra alegriya era koza inimajinable !  El perro los siguio sin ser attado i se asuvyeron todos enjuntos a la nave !  Un momento, el perro se les fuyo i vino a muestro lado !  Lambio las manos de las kreaturas i las miyas dospues i koryo a su mueva familya ke no kreiyan sus ojos de lo ke aviyan visto !   Nunka me olvido de el i de muestras vakansyas en Avsha…. Seriya Di-o ke mos metyo en su kamino ?  Este se aviya salvado… ma miles i miles estan soltados de la mizma manera… en las kayes… Ke la piadad del DI-o los alkanse AMEN.

Avlando de la agua, no va pueder no mensyonar mi ermozisimo payis ISRAEL i uno de sus lugares ke amo lo mas… GAN HASHLOSHA o  SAHNE.  Es un park nasyonal en el kamino de la GALILEA.  El vedre de los entornos, los esplendidos  lugares de piknik, el bleu i la limpyeza de las aguas ande la gente adoran nadar i pasar un diya de los mas agradavles es komo un mirakolo en medyo del dezyerto !   Es vedra ke Israel no es dingun dezyerto oy en diya !

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: