Ya no esta mas…. Se muryo en Oktobre 2009. Teniya 74 anyos. Ken era Mercedes, la boz de la Amerika Latina ? “La Negra” komo la yamavan pormodo de sus largos kaveyos pretos… Una meskla de sangre Franseza, Amerikana i Indiana (Quechuan)… No se puede dizir ke era ermoza… Ma supo tokar los korasones kon su personalitad, su fuersa, su maraviyaza boz de un “alto” profundo, adedmas de su dulsura i saver dar esperansa a las personas. Una kantadera del Folklor Argentino ke manyetizo las salas internasyonales por mas de un medyo siglo.
A la edad de 15 anyos gano el primer lugar de un konkurso de kantaderas por la radio lokal. Esto le permetyo de kantar durante 2 mezes en la radio i ser profesyonal. Empeso a kantar kantikas populares.
Se kazo kon el muziko Manuel Oscar Matus i endjuntos trataron de azer novitades en las kantikas latinas. En 1960 lansaron la “Nueva kansion” ke asemejava mas al Folklor Amerikano. Ganaron el sukseso kon “Grasyas a la Vida” i “Si se kaya el Kantor” . Kito unos 70 munchos albumes.
Kuando Manuel i Mercedes se espartyeron Manuel lavoro por si en Argentina i tuvo una gloryoza karyera.
Mercedes era de la Siedra. En los empesijos del 1970 travo un filmo “el Santo de la Espada” i en 1972 “Hasta la Victoria” selebrava el grito de los lavorantes. En 1979 Kuando Sosa estava dando un konserto en la Universitad de La Plata, los soldados la arestaron kon 350 personas ke estavan en el konserto. La menasaron de muerte i tuvo ke fuyir a la Europa.
Dyo konsertos kon Pavarotti, Sting i Shakira. Obtuvo 3 vezes el Grammy. Gano el Premio del Fundo por las Mujeres por tomar el partido de las mujeres. Estava kontra, tambien, del Prezidente de Argentina Carlos Menem.
“No so yo ke desidi de kantar por la gente, es la vida ke me pusho a azerlo” disho Sosa. Ya era obeza des de muy munchos anyos i su salud empeso a ir mal… Estava sufriyendo muncho de su pezgo i de las hazinuras…. La internaron al hospital por problemes del ilgado. Empeso problemes kon los rinyones i termino kon una kriza del korason….
Eskrivyendo sovre eya me akodro ke aviya eskrito un artikolo relatado a su invitasyon a Israel…. Era en el anyo 2007… Vo lo propozo de meldarlo aki abasho :
LA RED DJUDIYA SE OPOZA A LA VIJITA DE MERCEDES SOSA A ISRAEL….. Fui informada ke Mercedes Sosa esta envitada para dar un resital en Isrel. Me emosyoni i me alegri muncho de esta vinida porke para mi sus kantikas de amor, de pena i de esperansa kon su presyoza boz es una maraviya de oyir.
Eya fue la boz ke lucho kontra la opresyon i las injustiyas ke sufriyeron la djente en la Amerika Latina i por siguro ke esta artista es la amblema de la dinyitad de estos payises, la boz de los derechos del hombre, de los proves i de los marginados.
No vos merikiyesh ! Su boz no se va transformar en ambasadora de opresyon por ke en Israel dinguna nasyon es humilyada o tiranizada komo okure en munchas otras nasyones. Muestro chiko payis lucha heroikamente durante munchas dekadas para no ser destruida i derrokada i no ser efasada de la mapa del mundo, para pueder sobrebivir en medyo de una mar de paises arabos obsedas por su egzistensya ke eyos, si, opresan i tiranizan sus puevlos. EStos payises ke estan dominados por ideolojiyas atrazadas de la Edad Medya, fundamentalistas, entre eyos esta mueva Palestina yenna de fanatikos i inyorante djente kon sed de sangre, yamando en las kayes la muerte de los djudyos i la abolisyon de Israel ! I es este puevlo ke estash sosteniyendo kontra Israel ! Este puevlo ke alava fina los sielos i yama “our heroes” los ke matan o mataron almas innosentes dentro los otobuses, en las eskolas en los merkados, en los kafes, en los hospitales, en las sivdades i en todo modo de lugares, enfiltrandosen en muestras kalejas para kavzar mas danyo…mas danyo….
Una ideolojiya hitleryana de un mundo ande no egzistara un sol djudyo …
No vos merikiyesh ! Su boz ne se va transformar en ambasadora de limpyeza etnika, de jenosidyo o asasinato de masas ! En Israel dingunos pensan a kozas asemejante ! No se matan djente por sus relijyones, kolores, o ideyas de la siyerda o de la derecha ! Son todos iguales. Druzos, Kistiyanos, Muzulmanos, ateistos, homosexuales.
Vos paresyo ke estash avlando de otros payises i de otras epokas! Israel guerreya lejitimamente por defender su egzistensya. No asemeja al nazizmo, a lo ke se paso en Kambodjya, Ruanda i en las Diktaturas Latino-Amerikanas.
No vos merikiyesh ! Su boz no se va transformar en uzurpadora de tierras. Esto no se aze en ISrael. Ay djustisya i tribunales i leyes i el derecho de la propriedad se observa en todos sus teritoryos ! Israel esta preokupada kon un terrorizmo mas sofistikada kada diya, eksplozivos ke dezgrasyadamente kavzan mas i mas muertos, ay mas i mas alienados para kometer suisidos kon bombas.
Mercedes Sosa no trahizonara sus ermanos en kantando, No ! Eya viendra para kantar en un payis del mundo ande ay muy munchas personas ke la admiran ke la aman por su boz i por si mizma, por sus mesajos humanos maraviyozos ke egzisten en las palavras de sus kantikas i por el gusto mizmo de tener la Negra en Israel.
Eya kantara “Kuando tengo la tierra” en un payis ande la tierra se lavora por todos los sivdadinos i los kampesinos aze 2000 anyos fina oy.
Va kantar “Honorar la vida” para una odyensiya ke manda sus mansevos, sus vidas, a luchar kontra la terror i defender su tierra i su derecho de bivir kontra las menasas de muerte de sus enimigos tan serkas…a su doredor !
Mercedes va kantar “Hermano dame tu mano” en un estado ke es la unika demokrasiya en la rejyon i las leyes son igualas para todos.
Va kantar “Sobrevivyendo” en una sala kon “SIGURITAD” en un payis kon leyes siviles, lavorales i penales i ande se puede bivir kon dinyitad i la mijor kalitad de vida.
Eya va kantar ” Alfonsina i el mar ” en un payis ande esta libre para todos los chikos de ver la mar, jugar banyarse en estas plajes enkantadoras de Haifa, Hertzliya, Tel-Aviv Ashkelon….i no komo en Gaza ande solo sus devotos islamikos pueden banyarsen en estas kalores eksesivas.
La lucha de los puevlos Latinoamerikos no tiyenen nada ke ver kon el terrorizmo en el Oryente Medyo. Mozotros tenemos ke luchar kontra las viejas, tristes i oskuras epokas del pasado, de la historya de muestra humanitad.
Grasyas Mersedes, kerida Negra Mersedes Sosa por vinir i kantar para mozotros todos. Grasyas por no oyir la boz de eyos ke saven odyar solo, grasyas por todo lo bueno ke azes por la humanitad.
Ke seyas bienvenida en muestra tierra Israel
Artículos Relacionados: