Desde aze munchos anyos me entereso en el djudezmo[1]. Fue en 1980 kuando me topí kon un grupo de personas ke favlavan i meldavan en akeya lingua ke se asemejava al espanyol, ama definitivamente no era el mezmo espanyol ke yo favlava, Tambien me akodri de la lingua ke mi madre, ziherona livraha, favlava kuando yo era una kriaturika.
En el mez de Febrero, en el kuadro de mi anyo sabatiko de la Universidad onde ensenyo, empesi a estudiar djudezmo onde el Prof. David Bunis, en la Universidad Ebrea de Yerushalayim. Tomí tres kursos: Introduksion al Djudezmo, Djudezmo para Adelantados i Muevos Kaminos para Investigar el Djudezmo. Kada uno de los kursos me aserkavan mas i mas a mi pasado i al pasado de la lingua ke durmia en algun lugar de mi memoria i de onde kalia despertarla para arebivirla.
El Prof. David Bunis aklarava mis dudas dandome la oportunidad de partisipar a sus lisiones komo una eleva mas de su klasa. Kon el me ambezi palavras muevas, a konjugar verbos i a distingir las diferensias entre el espanyol muevo y el djudezmo. Fue el ke me ayudo a entrar al mundo de la investigasion de esta lingua.
Kada semana, relijiozamente, iva a las lisiones kon el gusto de ambezarme mas i mas el djudezmo. Al prinsipio, devo rekonoser, me fue duro, sovre todo porke no me akodrava bien la eskritura Rashi; ama este no fue un motivo para abandonar mis estudios. Poko a poko, aunke me se travavan las palavras kuando meldava, davka non me deshava venser, i es ansina ke pudi adelantar.
En desparte de estas lisiones iva, una vez a la semana, al Instituto Maale Adumim a investigar mas sovre la lingua i la literatura djudeo-espanyola. El Dr. Avner Perez, kon nkreivle pasensia i dedikasion, se djuntava a mi para favlar sovre su lavoro, sovre las kantigas i piyutim de Shabat, sovre muestros interesos komunes i mas. Me ayudo a gravar diversas versions de kantes i informasion muy importante para mis investigasiones sovre las Zemirot (los kantes) de Shabbat.
Aki, en Israel, empesi tambien a fazer mis primeras entrevistas para mi investigasion linguistika. Mis primeros informantes fueron miembros de la famiya Amir, de Tirat Yehuda, i la famiya Maya de Petah Tikvah i en la Galilea. Kon karinyo muy espesial, yevo en mi korason la boz de mi distingida i dulse “doda Malka”, ke kon su dulsura, tirnura i amor me kanto kantigas en ladino, komo eya yama a esta lingua, i me permetio de enrejistrarlas. Kada vez ke terminava de favlar kon eya, me bendizia kon un refran i un konsejo para la vida. Mil grasias tambien a Hagay, a Ami (Amir) i a Moshe (Maya). A kada uno de eyos mi profondo agradesimiento i beraha.
Sin el ayudo del Prof. Dr. Bunis i del Dr. Perez de una parte, i las konversasiones kon las famiyas Amir i Maya, de otra parte, mis konosimientos sovre la lingua de los sefaradís seria muy muy poka. Al tornar a Estados Unidos trushi kon mi un mundo de konosimientos, rekordos i nostaljia; deshando al mezmo tiempo en Israel un pedaso de mi ke no kere alesharse de las klasas de djudezmo.
Ke mos topemos en fiestas i prezentasiones de livros, sin mankura de ninguno. Ke muestra pendola i muestra komputadora eskrivan muncho i bueno, para bien de todos. Ke el Dio vos guadre, a kada uno de vozotros, kon salu i vida.
[1] Sigun disho una vez Moshe Shaul, redaktor de la revista Akí Yerushalaym: “No me importa ke nombre uzan para muestra lingua.. Lo importante es ke la avlen i ke la melden, i ke traten de escrivir letras, poezias, artikolos i livros en esta lingua porke solo de esta manera puedra kontinuar a bivir”.
- Dichas sovre la kara:
-
Tiene kara de ashufre – para una persona antipatika
Tiene kara de fiel – persona de mala umor
Tiene kara de miel i korason de fiel – persona ipokrita
Tiene kara de luna en kinze: persona grasioza, alegre
Tiene kara de pokos amigos: persona poko sosiable
Artículos Relacionados: