Ayyyyyyy ke yo me inyervo kuando veyo unos hombres ke les kaye la bava kuando ven estas modelas anoreksikas “KUERO I GUESO” komo diziya mi mamita! A mi me da ganas de darles una supika kon 2-3 revanadas de pan fresko i arroz kon gayna para ke se arten por fin ! Entikeyadas enteras, no se mizmo si puedran komer sus komidas… Estas ke kalkulan los kuartos de gramos !
BLONDAS O BRUNAS ?
KE IMPORTANSYA SI SON ANOREKSIKAS ?
El Di-o ke les page a los ke las ovligan a figurar komo un palo seko, los dizes tremblando i la kara blanka pared, debasho del makiyaj ke se les aplika sin azer ekonomiyas en las kremas i los polvos para la kara! Una dezgrasya… Piadad por eyas… No solo se enfeyesen ma peryen sus salud, sus enerjiya i toda sus attraksyon. No les importa ! Se ven modernas i lo mas importante topan echo en las grandes kazas de kustura ke las bushkan por sus flakor !
Ma… Ay i unas lokumikas, fistukitas ke son de vedra mas atraktivas i paresen mas umanas! Avlo de akeyas modelas kon sus “redondos” bien arrodeyados, kavesalikos para arrepozarse komo si la persona estava en el Ganeden. I ke pensash de Hilda?
Yo la topo fantastika ma es vedra ke no so un hombre ! Si era hombre esto segura ke me namorariya de eya i no solo por su ermozo puerpo ma la manera ke ama pasar su tiempo, su manera de ser, la ekspresyon de su kara, sus gustos. su amor por los animalitos i su buena humor. Penso ke ni ay de komparar ansina de mujer kon las modelas aneroksikas de la fotografiya aki ariva…..
Hilda fue illustrada en los anyos 1950 por Duane Bryers (1911 – 2012). Komo la puedesh ver no tiene dinguna verguensa de su puerpo redondo ande kale….
Deke eskrivi todo esto ? No se ! Ansina me vino de aryento…. Kreyo ke Lunes vo empesar a azer una diyeta de 1200 kaloriyas al diya !
Kon karinyo para todos i todas
Sharope blanco
Istanbul-Turkiya
Artículos Relacionados: