Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes ke vyene 23 de mayis, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko.
http://www.radioj.fr
Antes de empesar mi emisyon de oy, me tengo de eskapar la del djueves pasado, sovre Lag Baomer, ke no pude eskapar por manko de tyempo, kuando vos estava kontando el empesijo de la rebuelta de Bar Kohba, en los anyos 130, del tyempo del emperador romano Adriano.
Vos estava dizyendo ke, en el mismo tyempo ande el jeneral romano Julius Severus arrekojiya lejyones de la Evropa entera para rekonkistar la Judea pedrida por los Romanos i ke se aviya echo independyente, fue el momento ande Rabi Akiva se kedo de sostener a Bar Kohba. Ke se aviya pasado? Bar Kohba aviya matado Rabi Elazar, akuzado de aver dado informasyones militares sekretas a los Romanos. Parese agora ke era falsa akuzasyon. En todo kavzo, Rabi Akiva penso ke Bar Kohba no teniya mas las kualidades para ser el Mashiah, komo lo aviya pensado en primero.
Fue en este momento ke empeso esta hazinura yamada askera, embiyada por el syelo porke los elevos no teniyan, dize el Talmud, bastante kavod el uno por el otro. Se metyeron a morir el uno despues del otro, i kon eyos tambyen la esperansa mesyanika, por miles de anyos.
En los kombates para defender la sivdad fortifikada de Betar, Bar Kohba i su armada fueron destruidos kompletamente. Rabi Akiva fue aferrado i torturado a muerte, dizyendo el shema.
Asigun el istoryano Romano Dion Cassius, 580.000 djudyos fueron matados en la batalya de Betar. Despues empesaron las matansinas en toda la Djudea. Los djudyos ke no fueron matados fueron tomados komo syervos, Esta desgrasya fue la fin de toda esperansa de independensya i el empesijo del galut.
Esto es la razon del luto de la Sefira. No es solo por la muerte de 24.000 elevos de Rabi Akiva; es por la pedrita de muestro païs i por todas las desgrasyas ke sigyeron esta pedrita para los djudyos durante tantos siglos.
Ama en esta mizma noche de Lag Baomer, Rabi Shimon Bar Yohaï empeso a ambezar a sus elevos los sekretos del Zohar, de la Kabala. La esperansa nunka se muryo. En Lag baomer, empeso de muevo.
Esto es lo ke meldi del haham Pinhas Stolper. No tengo savidura relijyoza para pueder dar una opinyon sovre todo lo ke disho.
De toda manera, mismo el haham Stolper no tyene la repuesta a todas las kestyones. Por egzemplo, el mismo no save deke los 24.000 elevos de Rabi Akiva pagaron de sus vidas la kulpa de no tener kavod el uno por el otro. Naturalmente, esto mos ambeza ke kada uno deve tener konsiderasyon i kavod, no solo para padre i madre, no solo para kapo o maestro, ama tambyen para el ke es su igual. Ama una koza es la kulpa, otra koza es el kastigo. Mismo si es djusto ke sean kastigados estos elevos por esta kulpa, deke un kastigo tan terrivle? A esto el haham Stolper no tyene repuesta, sino puede ser este verso de Corneille: “Plus cher est l’offenseur et plus grande est l’offense”. Vinyendo de ombres de esta kualidad, la kulpa era mas grande ke para fulano.
Ansina se deviya eskapar el djueves pasado mi emisyon sovre Lag baomer.
I agora puedo venir a mi emisyon de oy, empesando por dizirvos dos byervos sovre el aktor de teatro, de sinema i de televizyon Victor Lanoux ke mos desho la vida el 4 de mayis, ke teniya por haliz nombre Nataf, syendo ke su padre era un djudyo tunizyano de Sfax. Nasido en junyo 1936, tuvo, komo yo nasido el mismo anyo, de eskonderse de los Almanes komo djudyo afillu si su madre era kristyana. Paso el tyempo de la gerra i mas despues, leshos de sus padre i madre, en un kazaliko en medyo de los kampos. Deke se kedo aya asta los onze, dunke asta 1947, no topi la razon en lo ke meldi sovre el.
Ama lo ke me akodro muy byen, es ke djugo en los dos famozos filmos Un éléphant ça trompe énormément i Nous irons tous au Paradis el rolo de Bouly, un bovanchon, i kuando sus amigos se arravyan kontra el, uno le dize ke tyene kara de antisemit, lo ke lo enkanta muncho. Kara de antisemit? Komo, kara de antisemit? Uno puede tener kara de djudyo, ama de antisemit kualo kyere dizir? Kuando vide el filmo en los anyos 70, no saviya ke el aktor teniya un padre djudyo, lo ke da mas savrozor a la koza…
Esto dicho, es tyempo de ayegar al sujeto de mi emisyon de oy.
Kuando estava aparejando la emisyon ke ize el 20 de avril pasado sovre los pedasos deuterokanonikos en el Livro de Esther, bushki sovre internet de ande se travava ke de lo ke Esther (en la Megila i no en el pedaso deuterokanoniko) avlo “en nombre de Mordehay”, kaliya syempre dizir sus fuentes. La repuesta era el Pirke Avot, i para topar esta repuesta Google me embiyo sovre un teksto eskrito en ingles por un haham liberal ingles: John D. Rayner, trasladado i adaptado al franses por otro haham liberal, este en Genève, François Garaï. Este teksto, bastante largo, es intitolado “El Mundo de las Mitsvot (Etika djudiya)”; me intereso i me pensi ke yo puediya azer, kon la amavle otorizasyon del autor, una emisyon o mas para darvolos a konoser.
Por siguro, puedesh pensar ke lo ke dizen los hahamim liberales no es lo ke diriyan los hahamim ortodoksos, sino no uvyera diferensya entre los dos movimyentos. Ama yene, yo ke no so haham, i kon lo poko ke se, me pensi ke un haham ortodokso no seriya tan opozado a lo ke meldi, porke, afillu si, de manera jenerala, es vedra ke los liberales se amostran mas universalistos ke los ortodoksos, kale yene akodrarse ke el haham Elie Benamozegh, ke eskrivyo un livro intitolado “Israel i la Umanidad”, era universalisto sin por lo tanto ser un haham myembro del movimyento liberal.
Esto dicho, agora vengo a lo ke meldi.
La etika djudiya se manifesta en onze direksyones: de la persona, sosyala, familyala, de la edukasyon, de la ekonomiya, medikala, de las gazetas, legala, politika, de las relasyones internasyonales, ekolojika.
Empesaremos por la etika de la persona.
Entre las personas.
La imitasyon del Dyo
Tenemos de imitar al Dyo, en sus kualidades. El mos disho (Vayikra, XIX, 2) : “Santos seredes, que santo yo, Adonay vuestro Dyo.” I de la misma manera ke el Dyo es yamado fuente de kompasyon, mozotros tambyen devemos ser piyadozos verso los otros.
La figura divina
Bereshit I, 26, 27: “Y dixo el Dio: fagamos hombre en nuestra figura como nuestra semejança (…) Y crio el Dio al hombre en su figura.” Por esto no se puede despresyar al otro, porke despresyarlo es despresyar El en la figura de kyen este ombre a sido kriado.
La santidad de la vida umana
El ke destruye una sola vida umana es konsiderado por el Tanah komo si teniya destruido todo el universo i el ke salva una sola vida umana es konsiderado komo si teniya salvado todo el universo (Sanhedrin IV,5) Esto vyene de la santidad de la egzistensya de kada ombre. (Avro aki una paranteza para akodrarvos ke es esta palavra ke se topa en el papel ke Yad Vashem remite a un Djusto entre las Nasyones).
La ley de oro en su negativo
Asigun Rabbi Hillel, “lo ke es negro a tus ojos, no lo agas a los otros” (Shabbat 31a). Todo lo ke es proibido en las relasyones umanas se trava de esta manera negativa de dizir.
No asasinar
Es una mitsva de no asasinar, asigun esta eskrito: No mates (Shemot XX, 13). Esto vale para el omisido veluntaryo, no por el kavzo ande uno, para defender su vida, es ovligado de matar el ke lo kyere el mismo matar.
No matar para vengarse
Es una mitsva de kriar sivdades de refujyo para protejar a los ke mataron sin kererlo, afillu si por siguro kale azer muncho dikat para no azer kozas ke pueden azer danyo a los otros.
No vyolar
Es una mitsva de no uzar de la fuersa para tomar una mujer. En Devarim esta eskrito (XXII, 25) a propozito de una manseva topada en el kampo, ama asigun los hahamim esto vale en todos los kavzos.
No “hurtar”
Es una mitsva de no hurtar a alguno, hurtar es arrovar, ama aki kijo dizir azer kidnapping. (Shemot XXI, 16)
No ferir a alguno
Es una mitsva de no ferir a alguno, i entonses kale azer muncho tino kuando se uza una koza sekanoza para los otros, komo una araba, por egzemplo, ama tambyen un tejado: kuando se fragua una kaza, kale fraguar tejado de ande no se pueda kaer (Devarim, XXII, 8).
No sobrefuerser
Es una mitsva de no sobrefuerser a alguno, kijo dizir tomar su byen por fuersa (Vayikra XIX, 13)
No arrovar
Es una mitsva de no arrovar. No furtedes (Vayikra, XIX, 11)
No avlar mentiras
Es una mitsva de no avlar mentiras, komo esta eskrito: No neguedes y no falseredes (Vayikra, XIX, 11), i tambyen Shemot XXIII, 7: De palabras de falsedad te alexa. Misma mitsva: no azer genevat devarim (rovo de palavras, kijo dizir plajyo, Yirmiyau XXIII, 20) ni genevat daat (rovo de penseryo, kijo dizir azer yerrar maksus, Tosefta Megila I,5).
No renyegar sus nederes
Es una mitsva de no renyegar sus nederes, asigun esta eskrito: “Varon cuando prometiere promessa a Adonay (…) no abiltara (renyegara) su palabra ” (Bamidbar XXX, 3)
No azer lashon ara
Es una mitsva de no azer lashon ara, asigun esta eskrito: “No andes mesturero (kalomniyador) en tu pueblo” (Vayikra XIX, 16)
No arrebashar
Es una mitsva de no arrebashar, de no meter alguno en verguensa. El Talmud (Baba Metsia 58b) lo trava del pasuk No engañedes varon a su compañero (Vayikra XXV, 17) dizyendo (asigun lo ke entendi) ke, aki, no enganyesh (lo tonu en ebreo) puede ser tambyen no agash danyo kon la palavra, no metash en verguensa, komo akodrar a un konvertido ke su padre era pagano. Disho un tana: azer verguensa a alguno en publiko es komo azer korrer su sangre. Se yama alvanat panim (blankamyento de la kara antes ke se aga kolorada por yegada de sangre)
No kovdisyar
Es una mitsva de no kovdisyar al byen del otro, asigun esta eskrito: “No cobdicies casa de tu compañero, no cobdicies muger de tu compañero, y su siervo y su sierva, y su buey y su asno, y todo lo que a tu compañero” (Shemot XX, 14).
(Aki avro una paranteza ke no se topa en el teksto del haham Garaï: ay ande mozotros una dicha: “Eyos ke tengan byen, i mozotros tambyen!”)
No djuzgar presto
Es una mitsva de no djuzgar presto a alguno, ama de aprovar de entender lo ke izo metyendose en las mismas kondisyones ke el. Diziya Hillel: “No djuzges a tu kompanyero asta ke ayeges en su lugar ” (Avot, II, 4).
Djuzgar kon induljensya
Es una mitsva de djuzgar al otro kon induljensya, tratando de entender las razones de lo ke izo i sus sirkonstansyas. Yeoshua ben Perahya diziya: “Djuzga a todo ombre kon induljensya” (lehaf zehut) (Avot, I, 6)
No echar maldisyon
Es una mitsva de no echar maldisyon. Se topa en Vayikra XIX, 14: “No maldigas sordo”. Se topa tambyen en Shemot XXII, 27: “Juezes no maldigas, y mayoral en tu pueblo no maldigas”, i en Shemot XXI, 17: “Maldizien su padre y su madre, matar sera matado”. En vedra no kale maldizir a dinguno, kual ke sea.
No aborreser
Es una mitsva de no aborreser a su proksimo, asigun esta eskrito: ” No aborrescas a tu hermano en tu coraçon (Vayikra XIX, 17). La Tora avla solo del ermano, ama la mitsva es la misma kual ke sea la persona.
No mirar por la otra vanda
Es una mitsva de no kedarse sin azer nada kuando alguno se topa en sekana.
Vayikra XIX, 16: “Lo taamod al dam reeha”: “No estes sobre sangre de tu compañero”. La Biblia franseza del Rabinato traslada ansina: “No seas indiferente a la sekana de tu proksimo”. Los hahamim adjuntan ke es la misma koza kuando un testimonyo puede salvar la vida de alguno. No kale kayarse.
Amar al otro
Es una mitsva de sentir para los otros un sentimyento fraternal, asigun esta eskrito: “Amaras a tu compañero komo a ti” (Vayikra, XIX, 18). Asigun Rabi Akiva, esta ley era el prinsipyo fundamental de la Tora. El kompanyero puede ser toda persona, ama la ovligasyon legala, asigun la alaha, es solo verso otro djudyo.
Amar el ajeno
Es una mitsva de amar al ajeno, komo esta eskrito: ” Amaras a el (el peregrino pregrinan con vos) komo a ti” (Vayikra XIX, 34)
Respektar la dignidad del otro
De todas estas mitsvot sale la de respektar la dignidad del otro. Rzbi Eliezer diziya: “Ke sea el onor de tu proksimo presyozo komo el tuyo” (Avot II, 10)
Respektar la propriedad del otro
La mitsva de amar al serkano mos ovliga a tener kudyado de lo ke le pertenese. Rabi Yossi diziya: “Te sea el byen de tu proksimo tan presyozo komo el tuyo” (Avot II, 12)
Dizir la vedra
“Fablad verdad varon a su compañero” (Zeharya, VIII, 16) i esto kale azerlo ke sea en privado komo en puvliko.
Akojer el otro i alegrarse kon el.
Shammay diziya: “Resive a la djente kon kara de sonriza”(Avot I, 15)
Azer paz
Asigun Hillel, “Bushka a ser komo un elevo de Aaron, ke amava la paz i la bushkava (Avot I, 12) (komo lo demanda el psalmista: ” Teilim XXXIV, 15: “Busca paz y siguela”).
Komo vyene el tyempo de eskapar esta emisyon, me vo kedar aki, sin tener eskapado kon las munchas mitsvot de etika ke azen puede ser la mijor karakteristika del puevlo djudyo. Uvo syempre puevlos mas fuertes, komo los Romanos, mas intelijentes, komo los Gregos, ama me parese ke la karakteristika del puevlo djudyo es esta bushkedad para fraguar una etika.
Si kyere el Dyo, el kusur para el otro djueves!
Artículos Relacionados: