Keridos amigos,
Mi emisyon de este djueves va ser la kontinuasyon i no el kavo de las dos otras ke empesi aze un mes, sovre la etika djudiya (liberala). Antes, meldo el manifesto eskrito en la gazeta Le Figaro por 17 intelektuales fransezes (djudyos i non djudyos) sovre el eskandalo del asasinato en su kaza de Sarah Halimi en Paris el 4 de avril, por un matador muzulmano entrado ande eya por el balkon de su ventana. I , desde dos mezes, salvo las gazetas i radyos djudiyas, dinguna gazeta, dinguna televizyon, dinguna radio de Fransya disho un byervo. El eskandalo es indimas grande ke el matador metyo ora entera para matarla, eya gritava, la polisiya, yamada del empesijo por los vizinos, era detras de la puerta, i no se meneo, asta ke el matador eche la desmazalada por la ventana de la tresera tabaka.

Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr  Kale klikar arriva a la derecha sovre Ecouter Radio J en direct.

I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya

——————————————————————————————

LA ETIKA DJUDIYA (3)

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar,  vos akodro ke el proksimo atelye de konversasyon de Vidas Largas se tendra el martes 20 de junyo, a las  dos i medya, en el Centre Communautaire. Estos atelyes son avyertos a todos, venid munchos, sovre todo ke este atelye del 20 de junyo va ser el ultimo antes de las vakansas.

Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko. http://www.radioj.fr

Antes de empesar mi emisyon de oy, tengo unas kuantas kozas de dizirvos:

En primero, vos akodro ke no me oitesh la semana pasada por modo ke estavamos en el sigundo diya de Shavuot. I no me oiresh tampoko la semana ke vyene por modo ke tendre de guadrar mis inyetizikos semana entera, i kon mis inyetizikos en kaza, no se puede mismo pensar de pueder aparejar kualkyera emisyon ke sea…

En sigundo, vos akodro ke estamos oy el djueves 8 de junyo 2017, i ke ay 50 anyos, 8 de junyo 1967, ke era tambyen un djueves, obtuvo, al kavo de 4 diyas, la kapitulasyon de la Jordaniya i de Ayifton, despues ke tomo toda la parte de Jordaniya al oeste del Yarden, i a los Ejipsyanos Gaza i el Sinaï. La gerra de los 6 diyas, en vedra, se eskapo en 4 diyas. Los dos diyas de despues, vyernes i Shabat, fueron solo kontra la Sirya, tomandole el Golan. izo tan presto ke por una vez ni los Rusos, ni los Amerikanos, ni la ONU tuvyeron tyempo de ayudar a los arabos.

En tresero, vos akodro tambyen ke, el myerkoles 24 de mayo, el parlamento de la Republika Cheka, por 112 bozes kontra 44 sovre 156 en todo, lo ke aze una mayoriya de kaji 72%, no leshos de los tres kuartos, voto la rekonosensya de Yerushalayim komo kapitala del Estado de Israel. I ensima de esto, voto tambyen de mas no pagar a la Unesco. Este voto vino el diya del Yom Yerushalayim, ke fyesta kada anyo, el 28 de Yar, la liberasyon i reunifikasyon de Yerushalayim el 7 de junyo 1967.

Antes de la republika cheka, no konosko dingun pais ke teniya rekonosido Yerushalayim komo kapitala del Estado de Israel, i esto afillu kuando teniya solo la parte oeste de Yerushalayim, ande se topa la Kneset.

Kon Donald Trump, los Estados Unidos se amostravan dispuestos a azerlo, ama dainda no lo izyeron.

En vez de los Estados Unidos, kyen rekonosyo tambyen a Yerushalayim komo kapitala de Israel? En la persona de sus Prezidente Baldwin Lonsdale, el 2 de este mes de junyo, las Islas Vanuatu (83 islas del oseano pasifiko, ke antes de sus independensya en 1980, se yamavan las Muevas Hebridas).

Esto dicho, una koza es de rekonoser Yerushalayim komo kapitala de Israel, otra koza es de rekonoser la reunifikasyon de la sivdad komo azyendo parte del Estado de Israel. Porke no kale olvidarse ke, oy, el Kotel es konsiderado por toda la komunidad internasyonala komo topandose, no en Israel, sino en la parte “okupada” por Israel. Otra manera de dizir ke el Kotel pertenese a los Palestinyanos…

Afillu kon el ayudo de la republika cheka i de la de Vanuatu, dainda keda muncho, ama si kyere el Dyo, a poko a poko, las kozas van a trokar.

En kuatren, vos kyero meldar lo ke eskrivyeron en la gazeta Figaro del 2 de junyo, sovre el asasinato de Sarah Halimi, una djudiya en Paris,  17 intelektuales fransezes de alto nivel inkluyendo djudyos (komo Alain Finkielkraut, Elisabeth Badinter, Georges Bensoussan) i sovre todo non djudyos (komo Pascal Bruckner, Jacques Julliard, Michel Onfray):

“Matansa de Sarah Halimi: “Ke la vedra sea dicha”

“El 4 de avril pasado, Sarah Halimi, franseza de relijyon djudiya, aedada de 65 anyos , madre de tres kriaturas, i retirada (antes era mediko) a sido torturada en su kaza kon gritos de “Allah akbar”, i echada por la ventana. La viktima biviya en un HLM (han de kira barata) en la male de Belleville desde unos trenta anyos. Esta noche, su vizino, Kobili Traore, 27 anyos, entro ande eya (por su balkon i su ventana) verso las kuatro de la demanyana, la atako i empeso sus torturas. “El raporto de polisiya konfirma ke mi ermana a sufrido de aktos de tortura durante serka de una ora, el la masakro. Las feridas son talas ke mi respekto no me permite de darvos detalyes” disho William Attal, ermano de la viktima. Una parte de la sena a sido enrejistrada por un vizino. La banda de sonido, oyida por los pulizes, konfirma lo ke sufriyo Sarah Halimi. Los golpes sin razon dados por el agresor son de una violensa ekstrema. La otopsia va amostrar mas de vente rompeduras sovre el puerpo i la kara de la viktima. Myentres ke va enriva de Sarah Halimi, el matador la trata de “Sheitan” (demonyo en arabo). Resita surates del Koran, grita “Allah Akbar” mas de diez vezes. Los gritos se oyen asta en basho del han (las torturas se pasan en la tresera tabaka). Dinguno vyene ayudar a Sarah Halimi. Ama vizinos yaman a la polisiya, ke vyene, ama no intervyene.

“Al kavo, despues de tenerla torturada durante serka de una ora, Kobili Traore trava su viktima por los pulsos i la echa por la ventana de la tresera tabaka. Despues, enteramente kalmo, aze una orasyon. Sarah Halimi, eya, yaze, muerta, en el chijo kortijo interyor del han. Son kaji las 5 i medya de la demanyana. Los pulizes prezentes se dechidan entonses a aferrar el kriminal. El aferramyento se pasa sin vyolensa. Konsiderado komo inapto de ser guadrado por la polisiya, el matador es pishin internado en un ospital de lokos. En derecho penal, si la justisya dechidava ke uvo “abolisyon del disernamyento”, el matador seriya deklarado irresponsavle i no seriya djuzgado.

“Portanto, Kobili Traore no tyene un pasado psikiatriko. Tyene la kara de munchos islamistos radikales vyolentes: un pasado de autor de delitos, muy pesgado kon kondenasyones munchas en echos de droga, munchas estansyas en prezo. El diya antes de la matansina, aviya pasado su tyempo en la meshkita de la kaye Jean-Pierre Timbaud, konosida por ser un ogar del islamismo radikal. De otra parte, Kobili Traore no puediya estar sin saver ke su vizina era djudiya.

“La retirada era una mujer sufu ke yevava la peluka karakteristika de las djudiyas ortodoksas. Sus inyetos veniyan a verla yevando kipa. Una de las ijas de Sarah Halimi deklara tener sido, en el pasadao, tratada de “djudiya suzya” por una de las ermanas del matador de su madre.

“Los faktos ke venimos de kontar tyenen por fuente el raporto de polisiya konsagrado a la matansina. Una informasyon judisyarya a sido avyerta el 14 de avril por “matansa veluntarya”. El karakter antisemit de la matansa (ke la rende mas grave) no a sido rekonosido. El prokurador de Paris, François Molins, a konsiderado ke kaliya asperar el rezultado de la enkuesta antes de dechidarse sovre la natura del krimen. Por sus parte, los avokatos de la viktima avlan de un “perde de silensyo” (chape de plomb) i reklaman ke la enkuesta retenga esta sirkonstansya agravante. Serka de dos mezes despues de la matansa, las gazetas empesan enfin a kontar esta matansina ke afito en medyo de la kampanya por la eleksyon prezidensyala.

“Todo da a pensar, en este krimen, ke el nyego de la realidad yene aharvo. Una kuestyon entre otras: deke los pulizes yamados por los vizinos no intervinyeron en el apartamento? Se espantaron? Demandamos ke toda la vedra sea bushkada sovre la matansa de Sarah Halimi.  Ke toda la vedra sea dicha sovre la ondura de las frakturas fransezas. Kale ke la politika del abistru se kede, i ke muestros drijentes tomen konsyensya de lo ke se pasa en el pais. Para Sarah i su famiya, ama tambyen para la Fransya.”

Ansina se eskapa este artikolo del Figaro. Dainda ay muncho de dizir sovre este echo, ke, ensima de la orror de la muerte de esta santa mujer, konosida en la komunidad djudiya por sus grandes kualidades de korason,  da lugar a dos eskandalos inkreivles:

Primer eskandalo: la polisiya yamada, ke vyene pishin i ke aspera del otro lado de la puerta, myentres ke los gritos de la desmazalada se oyen en medyo de la noche.

Sigundo eskandalo: el silensyo de las gazetas, de la radyo i de la televizyon, afillu si las gazetas djudiyas, las radyos djudiyas, la televizyon i24 News avlavan muncho de esto.

Vamos a ver agora komo van a ser las kozas, ama de toda manera la vida de la povereta de Sarah Halimi es pedrida una vez por todas porke la polisiya no izo su lavoro kuando era tyempo de azerlo. Fue enterrada en Israel.

I agora abolto a lo ke empesi ya ay un mes de esto, kontarvos la Etika djudiya, en vedra la Etika djudiya liberala, asigun un artikolo del haham liberal ingles John D. Rayner, trasladado i adaptado al franses por el haham, liberal el tambyen, François Garaï.

Me teniya kedado, ay dos semanas, sovre la Etika sosyala, kapachedades i inkapachedades, dizyendo ke no aviya razon de deshar leshos de los otros el mamzer, ijo de un adulteryo, syerto, ama no es su kulpa. Deke el tendriya de pagar por las kulpas de otros?

I agora vengo al fuerte i el flako

Una de las kuestyones ke okupa muncho el Tanah es la defensa de syertas kategorias de povlasyon: el uerfano, la bivda, el syervo, el ajeno, el prove, el enfermo…Estas personas son vulneravles, i el dever de los ke son mas mazalozos es de no aprovechar sus flakeza, a la kontra de ayudarlos. Esta ovligasyon vale tanto para kada uno komo para la sosyedad i sus responsavles.

Las konvensyones internasyonalas tyenen un rolo de djugar, sovre todo la Deklarasyon Universala de los Derechos de la persona, muy inspirada por las mitsvot de la Tora. Por esto no kale enkantarse ke entre sus redaktores se topa un djudyo: René Cassin.

No profitar de la bivda i del uerfano

Es una mitsva de no profitar de la bivda i del uerfano, asigun esta eskrito: “Toda biuda y huerfano no aflijades” (Shemot, XXII, 21)

No profitar del ajeno

Es una mitsva de no profitar del ajeno, asigun esta eskrito: “Y peregrino no aprietes, y vos supiestes a alma del peregrino, que peregrinos fuestes en tierra de Egypto” (Shemot, XXIII, 9).

Ayudar a los uerfanos, las bivdas i los ajenos

La Tora dize ke el Dyo es “fazien juizio de huerfano y biuda, y aman peregrino para dar a el pan y paño. Y amaredes al peregrino, que peregrinos fuestes en tierra de Egypto” (Devarim, X, 18 i 19)

No profitar del enfermo

Es una mitsva de no aprovechar de la enfermedad de alguno, asigun esta eskrito: “No maldigas sordo y delante ciego no des entropieço (Vayikra, XIX, 14)

Ayudar al enfermo

Es un dever de ayudar al enfermo, asigun aziya Iyov: “Ojos era al ciego, y pies al coxo yo” (Iyov, XXIX, 15). Kale por egzemplo fraguar los hanes de tal manera ke los enfermos puedan andar en eyos por si mismo, ets

Respektar al hazino de meoyo

La hazinura de meoyo es puede ser la peor de todas. Por esto es ke tenemos de akodrarmos de esta palavra de muestros hahamim: “No djuzges a tu proksimo sin meterte en su situasyon” (Avot, II, 4). Tenemos de ayudar a estos hazinos para ke tengan lo mijor ke se puede.

Ospitalidad verso los ajenos

La ospitalidad es uno de los aktos de buendad kontados en la Mishna (Peah I, 1). Avraham es tomado komo egzemplo. Dainda aflakado por su mila, se alevanta kuando ve aserkarse tres ajenos, los akoje i les da de lavarse, de bever i de komer de lo mijor (Bereshit XVIII, 1 a 8). De esto se trava tambyen la ovligasyon de ofreser un ogar al ke no tyene ande durmir. “De cierto, despedaçando al fambriento tu pan, y pobres vagabundos traeras a casa; quando vieres desnudo y cubrirlo as, y de tu carne no te encubras (del ombre, ke es tu karne, no te eskondes) (Yeshayau, LVIII, 7).

(Avro aki una paranteza para dizir ke no so yo ke podriya dizir el kontraryo, yo ke fui akojido i eskondido durante la gerra ande varyas djustas ke no miraron por la otra vanda).

Liberar los kativos

Otra ovligasyon de la etika djudiya es de todo azer para liberar los kativos, asigun esta eskrito en el Talmud: “Pagar el pidyon de un kativo es el mas importante de los komandamyentos” (Baba Batra 8b); Esto vale para un ermano djudyo, ama no solo. Vale para todo ser umano inosente. Kale “sacar de carcel atado” (Yeshayau XLII, 7), “soltando manojos (dezazyendo las kadenas) de yugo, y embiando quebrantados horros (oprimados liberos), y todo yugo arrancaredes” (Yeshayau LVIII, 6).

Ir a vijitar al hazino

Orar para los hazinos i ir a vijitarlos es un akto de buendad (Mishna Peah I,1) i puede aydar a la kura. Por esto Rabi Akiba diziya: “alguno ke no se va vijitar a un hazino, es komo si aziya korrer su sangre”, i Rabi Dimi adjuntava: “Vijitar a un hazino, es azerlo bivir” (Nedarim 40a). Esto vale en primero para la famiya i los serkanos, ama tambyen para todo myembro de la komunidad.

Tomar kudyado de las personas aedadas

Es una mitsva de amostrar respekto verso las pêrsonas aedadas, asigun esta eskrito: “Delante caneza (kaveyos blankos) te levantaras” (Vayikra XIX, 32). Es un dever para las kriaturas de tomar kudyado de sus paryentes kuando eyos no pueden mas ganar paras. Si las krianturas no alkansan, es a la sosyedad de ayudarlos.

Enterrar a los muertos

Es una mitsva de enterrar a un muerto, asigun esta eskrito: “Enterrar lo (el muerto) enterraras en el dia esse” (Devarim XXI, 23) Este pasuk avla de un kondenado a muerte, ama vale para todo muerto. Es a su famiya de enterrarlo, i si no ay famiya o si no puede, es a la komunidad de azerlo. Lo mismo vale si el muerto no era djudyo.

Konsolar las personas en luto

Vijitar a las personas en luto aze tambyen parte de los aktos de buendad. Vijitar a la persona en luto es a la vez un akto de respekto verso el muerto i una konsolasyon para las personas en luto.

Dainda no eskapi kon la etika djudiya. El kusur sera para el djueves 22 de junyo, si kyere el Dyo, syendo ke, komo vos dishe, no podré azer emisyon el djueves ke vyene.

Edmond Cohen
Paris Fransya