La famiya Carasso i el famozo yogurt Danone

Por:
- - Visto 2717 veces

Isaac Carasso, fondador de las imprezas Danone, i el primero a komersializar el yogurt, nasio el 19 de Avril 1874, en Saloniko i era miembro de una de las mas eminentes famiyas sefaradis de esta sivdad. El era mediko i en mizmo tiempo ombre de negosios.


Primera fábrica de yoghurt, Barcelona.
Isaac Carasso al centro con las manos cruzadas, padre de Daniel Carasso.

Su tio, Emanuel Karasu, ke troko su alkunya de Carasso a Karasu, ke en turko sinyifika “agua preta”, fue deputado en el governo otomano, uno de los lideres de la masoneria en Saloniko i miembro del movimiento nasionalista los Djovenes Turkos, ke mas tadre i despues de duras luchas fueron los ke metieron la baza para la fondasion de la Republika Turka.


Kon el desbrochamiento, en 1912, de la I Gerra Balkanika, Carasso tomo a su famiya i paso a bivir a la sivdad de Barcelona, en Espanya ande avrio su klinika. Su ijo Daniel, ke en akeya epoka tenia 7 anyos, empeso a ser yamado por sus amigos i vizinos Danone, ke es el diminutivo i nombre de karinyo de Daniel, en katalan.

Isaac Carasso se dio kuento ke munchos de sus djovenes hazinos estavan sufriendo de problemas en el sistema dijestivo i en los intestinos. El avia sido impresionado, en akeyos anyos por el lavoro de Elias Metchnikoff, investigador ukrainyano ke en 1904 avia ganado el Premio Nobel por sus estudios segun los kualos, la djente ke bivian en siertos lugares de los Balkanes eran mas sanos i tenian mas larga vida ke el resto de la povlasion, a kavza de la konsomasion de leche fermentada o sea al yogurt.

El se akodro ke el yogurt, muy popular en Saloniko, Bulgaria i otros paizes de los Balaknes era vendido al kilo i ke semejantes problemas eran tratados kon yogurt desde largos anyos atras. El desidio de fabrikar el mizmo el yogurt aziendo traer, prinsipalmente de Bulgaria, los materiales nesesarios para su fabrikasion. El vendio su produkto, por primera vez kon el nombre de Maya-Santé, komo kura en las farmasias. En segito a la reushidad ke tuvo este tratamiento, en 1919, el fondo una chika impreza para la fabrikasion de yogurt, ke asta epoka no era konosido en Evropa Oksidentala, i ke kontinuo a ser vendido en las farmasias, esta vez basho el nombre de “Danone”.

En akeyos primeros anyos Daniel noto los prinsipios kon los kualos su padre yevo adelantre la impreza, prinsipios ke son valables asta oy dia: Los efektos saludazos del yogurt eran eskritos sovre kada djarriko de porselen: “Alimento potente i rekonstituyente para el estomago i los intestinos”.

En 1930, grasias a Isabel, ermana del rey Alfonso XIII de Espanya, ke era adikta de los yogurtes Danone, la impreza se kenvertio en el produktor de yogurtes de la Kaza Real. Dizen ke esta kustumbre yego asta la reyna aktuala de Espanya, Doña Sofia, de orijin grega, ke por seguro konosia las vertudes de este alimento,i ke no avia dia ke no dava a su ijo, el Prinsipe Felipe, un djarriko de yogurt.

Tomando en konsiderasion la ekspansion de la impreza, Daniel desida de estudiar komersio en Marseille verso la fin de 1920 i kompleta su formasion en el Instituto Pasteur, en Paris. El es agora un sientista tambien i empesa a interesaerse en la kreasion de muevos produktos komo el yogurt kon diversas savores. Para el la sensia era la baza del negosio i nunka desho de aplikar muevas teknikas.

Despues de aver terminado su servisio militar en Espanya, Daniel Carasso fonda la impreza Danone, en Fransia. La reushidad fue imediata grasias a la perseverensia i dezeo de modernizar el kamino ke avia fiksado su padre, Isaac Carasso ke murio, en 1939, en Fransia.

“Para mi padre el yogurt era un produkto terapeutiko ke se vendia en farmasias. Para mi, tenia ke ser un alimento de plazer ke devia yegar a una muy ancha klieantela. La djente de los Balkanes ke bivian en Paris me dizian ke esto no es yogurt, ma por kontra esta pasta asida i espesa ke via vender en mi chikez en Saloniko enkanto, al prinsipio a los parizianos,despues a todos los abitantes de Fransia i mas tadre al mundo entero” avia dicho Daniel Carasso.

Durante la II Gerra Mundial el, mas prudente, paso a bivir a Estados Unidos. Su ermana Flora ke avia kedado en Evropa, fue matada por los Nazis, djuntos kon su marido, en una kamara de gaz, en uno de los kampos de eksterminasion. En Bronx, New York, fondo la firma Dannon Milk Products. Siete anyos mas tadre torno a Fransia kon una innovasion muy importante para su futuro: la pasteurizasion de la leche.

A su retorno el rekupero de muevo el kontrol de Danone i yego a una ekspansion komersiala sin presedente, asta djuntar 300 milyones de konsomadores i 80.000 empleados, shifras aktuales de las imprezas. Daniel Carasso, el ombre ke yevo Danone a ser un firma mundiala murio el mez de Mayo, 2009, a la edad de 103 anyos, en Paris. Nunka sufrio de kualkier hazinura, i ainda tenia proyektos para el futuro. El se asento en su kanape, komo kada dia, para azer su siesta i no se desperto mas. En este mizmo dia avia aparesido en el jurnal Le Monde, su ultima entrevista, kon okazion de los 90 anyos de la impreza.

De akel beveraje lechoso yamado Danone ke Isaac Carasso avia lansado en Barcelona, unos 90 anyos atras, se konsumen oy 80 milyones de unidades al dia en el mundo

1 comentario en «La famiya Carasso i el famozo yogurt Danone»
  1. Todo lo bueno que hay siempre es de algún judío o hecho por judíos, son los mas emprendedores. Siempre le he dicho a la gente que si no hubiera judíos en México ya estaríamos hasta el pozo.
    Dios bendiga a Israel y a todos los judíos.

    Responder

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: