En Djulio 1938, reprezentantes de 31 estados se reunieron en la sivdad de Evian en Fransia, para topar solusion al problema de los refujiados djudios ke fuyian de las persekusiones nazistas en Almanya i Austria.
Los estados ke partisiparon de Evropa, Amerika del Norte i del Sud , Australia i Mueva Zelandia, izieron todo lo posible para eksplikar ke no podian resivir a estos refujiados. La Sra. Golda Meir ke partisipo a este enkontro komo reprezentante de la Adjensia Djudia disho ” En Evian konsenti un sintimiento de tristeza, furia, frustrasion i oror” .
El uniko faktor de luz en este enkontro fue la deklarasion del reprezentante de la Republica Dominicana , Virgilio Medina , ke konfirmo la prontitud de su paiz de resivir a los djudios exilados de Almanya i Austria . Mas tadre, el 12 de Agosto del mizmo anyo, los dominikanos deklararon en Londra ke podian resivir de 50.000 a 100.000 refujiados djudios. En Disiembre 1939 eyos eskojeron a la rejion de Sosua para poder aresentar estos refujiados, ma el desbrochamiento de la II Gerra Mundiala kreo graves obstakolos al pasaje de naves en el Oseano Atlantiko i en fin de kuento yegaron a Sosua solo 663 djudios.
En esta epoka se topava al poder en la Republica Dominicana , el diktador Rafael Leonidas Trujillo, i muncha djente se demandavan porke izo este djesto pro-djudio ke podia salvar munchas vidas. La eksplikasion se topa, puede ser, en el livro “La fusion de los sefardíes con los dominicanos” eskrito por Enrique Cicko ainda en la epoka de Trujillo, i onde se eksplika ke en la Republica Dominicana no ay sintimientos kontra los djudios, apuntando ke. “.uvo una fuzion entre el elemento djudio i la povlasion lokala, una fuzion volontaria ke nunka fue forsada.”
El autor adjusta “El djudio evropeo se konvertia para eskonder su pasado djudio i obtener pozisiones, en lugares onde djudios eran ekskluidos, mientres ke el sefaradi dominikano ke se konvertia deklarava aviertamente, mizmo despues de su konversion, ke apartiene a la Nasion Ebrea ” .
Uno de estos konversos, Enrique de Marchena, konsiderado komo kompozitor nasional de la Republica Dominicana disho a este sujeto ” …un fenomeno interesante es el echo ke esta deklarasion, de ser parte de la Nasion Djudia , se kontinua durante sinko a sesh jenerasiones”.
La istoria djudia de Santo Domingo empeso demprano. El istoriador dominikano Carlos Esteban Deibe mos konta ke “. en la primera dekada del siglo 16 Santo Domingo se topava praktikamente en manos de los konversos ke avian sido embiados a la izla por tres personas: el bishop Juan Rodriguez de Fonseca, konverso de Aragon; Lope de Conchillio, konverso de Calatayud i sekretario del rey Fernando; i Miguel Perez de Almazan, el tambien konverso i sekretario del rey”.
Djudios del Caribe se aresentaron en Santo Domingo komo suditos olandezes de Cura ç ao; inglezes de Jamaica i Barbados ; i danezes de las izlas Virjenes. Esto ensanyo a los lideres katolikos ke enkargaron al arkibishop Isidoro Rodriguez kon la tarea de limitar el numero de djudios en este lugar.
Kuando en 1841 Donimicana logro su independensia de Haiti, el primer prezidente de la mueva republika, Santana, resivio una petision de los abitantes espanyoles de la sivdad de La Vega , demandando de ekspulsar de ayi a los djudios sefaradis. El respondio ” La petision no es echa por dominikanos i eya es el rezultado de pasiones bashas. La demanda en el siglo 19, en una republika libre, de persigir personas pasifikas kon el preteksto de relijion es skandalozo i kontra lo ke mos ensenya Jesus. En lugar de eskuchar malas bozes, eskuchad la boz de djustisia i gratitud. Los djudios no propagan sus relijion, ni forsan a otros a tomarla.”
En 1865, despues ke Dominicana se libero de Espanya, el dokumento numero dos de la mueva republika agradese a Rafael Mordehay de Marchena i a los otros sivdadinos olandezes (djudios de la izla olandeza Cura ç ao) por las armas ke dieron a los ke kombatieron por la libertad de esta republika.
Mas tadre, 1881, el jeneral dominikano Gregorio Luperon, eroe de la gerra kontra Espanya, sometio un proyekto invitando a los djudios de Ukraina ke sufrian de pogromes, a venir i aresentarsen en la Republica Dominicana.
Desendientes de los djudios sefaradis ke se konvertieron suvieron a altos grados de la sosiedad dominikana: Francisco Henriquez y Carvajal, ijo de un djudio de Cura ç ao i de madre konversa, fue prezidente de la republika en 1916. Su ermano eskrivio la ovra de teatro ” La hija del hebreo” sovre el tema de los kazamientos mikstos.
Kuando Israel fue resivido komo miembro de la ONU fue Max Henriquez Ureña, ijo del prezidente de Dominicana, ke izo el deskorso de bienvenida a Israel i todos los prezentes yoraron de emosion.
En 1948, kuando Estados Unidos avia impozado un boykot sovre la vendida de armas a Israel, fue el embasador dominikano en Washington, el konverso sefaradi Haim Lopez Peña, ke ofresio armas al djoven estado.
Las antiguas famiyas sefaradis en Dominicana: Naar , Leon , Senior, de Marchena, Lopez-Peña, Henriquez, de Castro, Nahmias de Crasto i munchas mas se konvertieron ma guadran asta oy sus sintimiento de apartener a la nasion djudia. Dominicana onde tuvo lugar una “fuzion” entre sefaradis i dominikanos estuvo siempre del lado de Israel i esperamos ke este estado amigo kontinuara a ser un paiz amigo de los djudios.
Moshe Otero lee este articulo muy interesante para la gente de Rep Dominicana, solo ignora la cantidad de faltas de ortografia que tiene 😉
Shalom hola! muy interesante el articulo pero tengo una consulta: porque tantísimas faltas de ortografía??
No tiene faltas de ortografía, está en idioma Judeoespañol, también conocido como Ladino 🙂