Moshón era moso en una famiya rika i muy skarsa. Eyos komían tan mucho i bien i al povereto moso le davan sólo azitunas, sevoya i pan.
Un día la patrona gizó una bien grande gayna kon patatas; lo yama a Moshón i le dize:”Va tray este tepsí al forno! Kuando está pronto lo trayes atrás.”
Kuando la komida stava pronta toma el buen djidió el tepsí para tornarse a kaza. En el kamino la golor de la tan ermoza gayna le stava arankando el alma, se va murir de ambre. Non pudo dayanear, aranka una buena pachá de esta gayna i se la kome kon gran plazer. I trusho el tepsí a kaza.
La patrona vido el tepsí, avre grande la boka i los ojos: “Esto kualo es? Ke akontisió? Onde está la otra pachá de esta gayna? Di Moshón!”
“Yo no sé, sinyora mestra, parese ke esta gayna era kosha, tenía una sola pachá.”
“Loko estás, maldicho? Onde se vido gayna kon un solo pies. Ven presto, te yevaré al kumás i vaz a ver si topas gayna kon un piez.”
Lo aferra por la oreja i se van al kumás, ke tenían en la huerta. Justo a este punto avía una gayna ke se estava araskando i se topava kon un pies: “Na, na, vites sinyora mestra, akí está una gayna kon un pies.”
“Bovo, tú mira agora. “Kis, kis, kis” aze la mujer. Presto kon espanto la hayá se mete en sus dos pachás.
“Ves”, le dize la mestra, “komo tiene dos piezes.”
“Eh Sinyora, deké kuando vino el tepsí del forno i vites un solo pies, no izites kis, kis, kis? Puede ser kitava la otra pachá ke estava skondida de detrás.”
Kontado por SARA KENT- 1997
Notado por MATILDA KOEN-SARANO
Photo by Scott Woods-Fehr
Artículos Relacionados: